राममन्दिरस्य व्यवस्थां तथा अन्यान् विषयान् अधिकृत्य शङ्कराचार्येण प्रश्नाः उत्थापिताः

अयोध्यानगरम्, १८ जुलाईमासः (हि.स.)। शङ्कराचार्यः स्वामी-अविमुक्तेश्वरानन्द-सरस्वती ‘गोमाता-जनजागरण-यात्रायाः’ अन्तर्गतं अयोध्यानगरं प्राप्तवान्। शनिवासरे सः हनुमानगढ्यां दर्शनं कृतवान्।

अस्मात् पूर्वम् अयोध्या-बाइपास-मार्गस्य समीपे सागर-पैलेस इति स्थले आयोजितायां पत्रकार-वार्तायां तेन राममन्दिरस्य व्यवस्थां तथा अन्यान् विषयान् अधिकृत्य स्वाः आपत्तयः प्रकटिताः। तेन उक्तं यत् प्रभोः श्रीराममन्दिर-प्रकरणे विराजमानस्य श्रीरामस्य नाम्ना न्यायालये वादः सञ्चालितः आसीत्, किन्तु अधुना मूल-प्रतिमां अपसार्य अन्या प्रतिमा स्थापिता अस्ति।

तेन एतदपि आरोपितं यत् सामान्य-सन्तेभ्यः गर्भगृहं प्रवेष्टुं अनुमतिः न दीयते, यदा तु केवलं केभ्यश्चित् विशिष्ट-व्यक्तिभ्यः एव दर्शनस्य अनुमतिः प्रदीयते।

Hindusthan Samachar / Divya Ranjan