शिमला, 18 जुलाईमासः (हि.स.)।

मुख्यमन्त्री सुखविन्द्रसिंहसुक्खू शिमलास्थितस्य दन्तमहाविद्यालयस्य नाम परिवर्त्य राजीवगान्धीदन्तमहाविद्यालयः शिमला इति करणस्य घोषणामकरोत्। एतेन सह तेन हमीरपुरे त्रिशतकोटिरूप्यकव्ययेन दन्तस्वास्थ्यअनुसन्धानकेन्द्रस्य स्थापनायाः अपि घोषणा कृता। मुख्यमन्त्री उक्तवान् यत् अस्मात् अनुसन्धानकेन्द्रात् रोजगारस्य नवानि अवसराणि उत्पत्स्यन्ते तथा जनाः दन्तचिकित्सायाः आधुनिकाः उत्कृष्टाश्च सुविधाः प्राप्स्यन्ति।

मुख्यमन्त्री शनिवासरे शिमलायां एसोसिएशन आफ ओरल एण्ड मैक्सिलोफेशियल सर्जन्स आफ इण्डिया हिमाचलप्रदेशचैप्टरस्य चतुर्थवार्षिकसम्मेलनम् सम्बोधयन् आसीत्। तेन उक्तं यत् ओरल तथा मैक्सिलोफेशियल शल्यचिकित्सकाः केवलं रोगिणां चिकित्सामेव न कुर्वन्ति, अपितु तेषां आत्मविश्वासस्य पुनःस्थापने जीवनस्य गुणवत्तायाः उन्नयने च महत्त्वपूर्णां भूमिकां निर्वहन्ति। तेन उक्तं यत् एतत् सम्मेलनं प्रदेशे स्वास्थ्यसेवानां अधिकसुदृढीकरणस्य दिशि महत्त्वपूर्णं सिद्धं भविष्यति।

मुख्यमन्त्री उक्तवान् यत् प्रदेशसर्वकारः स्वास्थ्यक्षेत्रे व्यापकान् सुधारान् करोति तथा तेषां सकारात्मकाः परिणामाः अपि प्रकटितुं प्रारब्धाः। तेन उक्तं यत् कतिपयवर्षेभ्यः पूर्वम् एतत् कल्पयितुमपि कठिनम् आसीत् यत् हिमाचलप्रदेशस्य राजकीयचिकित्सालयेषु रोबोटिकशल्यचिकित्सा तथा त्रिटेस्ला एम आर आई इत्यादयः आधुनिकसुविधाः उपलब्धाः भविष्यन्ति। अधुना सर्वकारः सर्वेषु चिकित्सामहाविद्यालयेषु जनपदचिकित्सालयेषु च आधुनिकचिकित्सातन्त्रज्ञानस्य उन्नतस्वास्थ्यसुविधानां च विकासाय कार्यं करोति, येन जनाः स्वप्रदेशे एव उत्कृष्टं मितव्ययं च उपचारं प्राप्नुयुः तथा अन्यराज्यानां प्रति आश्रयः न्यूनीयेत।

मुख्यमन्त्री उक्तवान् यत् सर्वकारेण प्रदेशस्य सर्वैः चिकित्सकैः सह विस्तरेण चर्चा कृता तथा स्वास्थ्यसेवानां सुदृढीकरणाय अनेकानि महत्त्वपूर्णानि पदानि गृहीतानि। तथैव कार्यक्रमः शीघ्रमेव दन्तचिकित्सकैः सह अपि आयोजयिष्यते। अस्मिन्नवसरे दन्तमहाविद्यालयानां अधिकोन्नयनस्य तथा जनेभ्यः आधुनिकगुणवत्तायुक्तदन्तचिकित्सासुविधानां प्रदाने विषये चर्चा भविष्यति।

तेन उक्तं यत् शिमलातः अध्ययनं सम्पन्नवन्तः वैद्याः देशे विदेशे च स्वसेवाभिः हिमाचलप्रदेशस्य नाम उज्ज्वलयन्ति। प्रदेशस्य वैद्याः प्रतिभासम्पन्नाः सन्ति तथा आधुनिकतन्त्रज्ञानस्य माध्यमेन स्वास्थ्यसेवानां उन्नयने महत्त्वपूर्णं योगदानं प्रददति।

---------------

Hindusthan Samachar / Dheeraj Maithani