धमतरीनगरम्, १८ जुलाईमासः (हि.स.)। दूरस्थ-वनाञ्चल-प्रदेशस्य विद्यार्थिनः एतत् सिद्धवन्तः यत् प्रतिभा न संसाधनानाम्, अपितु अवसरस्य दृढसङ्कल्पस्य च अपेक्षां करोति। नगरी-विकासखण्डस्थितस्य एकलव्य-आदर्श-आवासीय-विद्यालयस्य, पथरीडीह-शाखायाः विद्यार्थिनः नीट्–२०२६ चिकित्सा-प्रवेश-परीक्षायां उत्कृष्टं प्रदर्शनं कृत्वा जनपदस्य गौरवं वर्धितवन्तः।

अस्मिन् वर्षे विद्यालयस्य २४ विद्यार्थिनः देशस्य प्रतिष्ठितायां चिकित्सा-प्रवेश-परीक्षायां सहभागिनः अभवन्, तेषु द्वादश-विद्यार्थिनः सफलतां प्राप्य नूतनं कीर्तिमानं स्थापितवन्तः। विद्यालयस्य मेधावी छात्रः राधेश्यामः ३८८ अङ्कान् (८८.४९ प्रतिशताङ्कः) प्राप्य सर्वोत्तमं प्रदर्शनं कृतवान्। अन्ये च डिम्पल-कँवर (३४९), मनीषा (३००), पूर्णिमा (३००), दयानन्द-मरकामः (२८०), दिव्या (२७१), हरिकेश-कुमारः (२६३), सोनम-दीवानः (२४४), मेनका (२२०), प्रीति-कश्यपः (१९६), गुञ्जा (१८२), तथा आराधना (१८०) अपि परीक्षायां सफलतां प्राप्य विद्यालयस्य जनपदस्य च यशः वर्धितवन्तः।

एषा उपलब्धिः विशेषा मन्यते, यतः एकलव्य-आदर्श-आवासीय-विद्यालयस्य उद्देश्यं दूरस्थ-जनजातीय-प्रदेशानां विद्यार्थिभ्यः गुणात्मक-शिक्षां, आधुनिक-सुविधाः, प्रतियोगिता-परीक्षाणां समुचित-प्रशिक्षणं च प्रदातुम् अस्ति। पथरीडीह-विद्यालयस्य एषा सिद्धिः प्रमाणयति यत् सम्यक्-मार्गदर्शनेन, समर्पित-शिक्षकैः, सकारात्मक-शैक्षणिक-वातावरणेन च वनाञ्चल-प्रदेशस्य विद्यार्थिनोऽपि राष्ट्रिय-स्तरीय-प्रतियोगिता-परीक्षासु उत्कृष्टं प्रदर्शनं कर्तुं समर्थाः भवन्ति।

जनपदाधिकारी अबिनाश-मिश्रः सफल-विद्यार्थिनः, शिक्षकान्, विद्यालय-परिवारं च अभिनन्दन् उक्तवान् यत् एषा उपलब्धिः केवलं द्वादश-विद्यार्थिनां सफलता न, अपितु सम्पूर्णस्य वनाञ्चलस्य स्वप्नानां नूतनाम् उड्डयन-प्रेरणामयी दृष्टान्तः अस्ति। तेन विश्वासः व्यक्तीकृतः यत् एते विद्यार्थिनः भविष्ये कुशल-चिकित्सकाः भूत्वा समाजस्य सेवां करिष्यन्ति तथा स्वप्रदेशस्य अन्येभ्यः बालकेभ्यः प्रेरणास्रोतांसि भविष्यन्ति।

जनपद-पञ्चायतस्य मुख्य-कार्यपालन-अधिकारी जयन्त-नाहटा, जनपद-शिक्षा-अधिकारी मधुलिका-तिवारी, आदिवासी-विकास-विभागस्य सहायक-आयुक्तः विमल-साहू च विद्यालयस्य प्राचार्यं नीरज-त्यागिनम्, समस्त-शिक्षकान्, सफल-विद्यार्थिनश्च शुभकामनाः प्रदाय एतां जनजातीय-शिक्षाक्षेत्रस्य महतीम् उपलब्धिं कथितवन्तः।

एषा सिद्धिः केवलं द्वादश-विद्यार्थिनां सफलता न, अपितु वनाञ्चलस्य सहस्रशः स्वप्नानां विजयः अस्ति। एषा च सन्देशं ददाति यत् प्रतिभायै समुचित-अवसरः, संसाधनानि, मार्गदर्शनं च लभ्यते चेत् सा कस्यापि उच्चतायाः प्राप्तौ समर्था भवति। पथरीडीहस्थितः एकलव्य-आदर्श-आवासीय-विद्यालयः अद्य सहस्रशः ग्रामीण-जनजातीय-विद्यार्थिनां कृते आशायाः प्रेरणायाश्च प्रतीकः अभवत्, ये शिक्षायाः माध्यमेन स्वभविष्यस्य नूतनां दिशां दातुम् इच्छन्ति।

Hindusthan Samachar / Divya Ranjan