नवदेहली, १८ जुलाईमासः (हि.स.)। प्रधानमन्त्री नरेन्द्रमोदी भारतस्य प्रथमस्य निजी-ऑर्बिटल-प्रक्षेपण-यानस्य ‘विक्रम-१’ इत्यस्य सफल-प्रक्षेपणस्य उपलक्ष्ये स्काईरूट-एयरोस्पेस-निर्माण्यै हार्दिकाः शुभकामनाः प्रदत्तवान्। तेन निर्माण्याः सह-संस्थापकाभ्यां पवन-कुमार-चन्दना तथा नागा-भरत-डाका इत्याभ्यां दूरभाषेण संवादः कृतः। तेन उक्तं यत् स्काईरूट आकाशे स्वमूलानि प्रतिष्ठापितवती, भूमौ च तानि दृढीकृतवती, यानि देशस्य युवानः प्रेरयिष्यन्ति।

प्रधानमन्त्री शनिवासरे हैदराबाद-स्थितया स्काईरूट-एयरोस्पेस-निर्माण्या विकसितस्य देशस्य प्रथमस्य ऑर्बिटल-श्रेणी-प्रक्षेपण-यानस्य ‘विक्रम-१’ सफल-प्रक्षेपणानन्तरं इसरो-कार्यालयात् सह-संस्थापकेन पवन-कुमार-चन्दना इत्यनेन सह दूरभाषेण संवादं कृत्वा एतत् आत्मनिर्भर-भारतस्य दिशि महत्त्वपूर्णं पदम् इति उक्तवान्। तेन अभिहितं यत् एषा सफलता प्रदर्शयति यत् भारतं निजी-क्षेत्रस्य सहभागितया अपि अन्तरिक्ष-क्षेत्रे आत्मनिर्भरं भवितुं समर्थम् अस्ति।

प्रधानमन्त्री उक्तवान् यत् स्काईरूट-निर्माण्याः युवा-दलेन स्वस्य समर्पणेन परिश्रमेण च भारतमातुः गौरवं नूतन-उन्नतिं प्रति नीतम्। तेन एतत् ‘वन्दे-मातरम्-अभियानम्’ इव निरूपितम् तथा उक्तं यत् एतत् अभियानं नूतन-वंशाय प्रौद्योगिक्याः लाभं प्रदास्यति, अग्रिम-वंशं च प्रेरयिष्यति। तेन स्काईरूट-दलम् शीघ्रं मिलितुं निमन्त्रितम्।

प्रधानमन्त्री पुनरुक्तवान् यत् एकदा यदा अहम् आत्मनिर्भर-भारतस्य विषये अवदम् तदा केचन जनाः अज्ञानवशात् तस्य उपहासम् अकुर्वन्। अद्य भवद्भिः सिद्धीकृतं यत् अस्मिन् क्षेत्रेऽपि वयं आत्मनिर्भराः भवितुं समर्थाः स्मः। भवद्भिः तत् सामर्थ्यं प्रत्यक्षं प्रदर्शितम्।

पवन-कुमार-चन्दना उक्तवान् यत् प्रथमवारं भारते कस्याश्चित् निजी-निर्माण्याः ऑर्बिटल-प्रक्षेपण-यानस्य सफल-प्रक्षेपणं सम्पन्नम्। एषा उपलब्धिः सम्पूर्ण-दलस्य परिश्रमस्य फलम् अस्ति। सर्वकारेण निजी-क्षेत्राय अवसरः प्रदत्तः, तेनैव एषा सिद्धिः सम्भवा अभवत्। अस्य कृते सः प्रधानमन्त्रिणं प्रति कृतज्ञतां प्रकटितवान्।

उल्लेखनीयम् अस्ति यत् ‘विक्रम-१’ इति प्रक्षेपण-यानस्य नाम भारतीय-अन्तरिक्ष-कार्यक्रमस्य जनकस्य डाॅ. विक्रम-साराभाई इत्यस्य सम्मानार्थं स्थापितम्। हैदराबाद-स्थितया स्काईरूट-एयरोस्पेस-निर्माण्या एतत् विकसितम्। अस्य अभियानस्य नाम ‘अभियान-आगमन’ इति निर्धारितम्।

Hindusthan Samachar / Divya Ranjan