नवदिल्ली, 18 जुलाईमासः (हि.स.)।

वेस्टइण्डीज क्रिकेटदलस्य वर्तमाननायकाः रोस्टनचेजः परीक्षाक्रीडायाः शाईहोपः टी२० तथा एकदिवसीयक्रीडायाः हेलेमैथ्यूजः महिलादलस्य च महानक्रीडकस्य सर गारफील्ड सर गैरी सोबर्स इत्यस्य निधनम् अधिकृत्य गहनं शोकम् अभिव्यक्तवन्तः। तैः उक्तं यत् तस्य असाधारणप्रतिभा विनयशीलता क्रीडायाः प्रति समर्पणभावश्च एतादृशं मानदण्डं स्थापितवन्तः यः आगामिसंततीनां क्रीडकान् सर्वदा प्रेरयिष्यति।

क्रिकेट वेस्टइण्डीज संस्थया इन्स्टाग्राममाध्यमेन प्रकाशिते संयुक्तवक्तव्ये कप्तानैः उक्तं यत् वेस्टइण्डीज क्रिकेटदलस्य नेतृत्वं कुर्वन्तः वयं तां उत्तरदायित्वभावनाम् अवगच्छामः या तेषां महानां क्रीडकानां विरासतां अग्रे नेतुं सम्बद्धा अस्ति येषां प्रयत्नैः अस्य गौरवशालिनः इतिहासस्य आधारः स्थापितः। सर गैरीस्य प्रतिभा तस्य विनयशीलता क्रीडायाः प्रति समर्पणभावश्च एतादृशं आदर्शं स्थापितवन्तः यः प्रत्येकस्य नूतनपीढ्याः मार्गदर्शनं करिष्यति।

ते अग्रे उक्तवन्तः यत् वयं तस्य परिवारजनानां प्रियजनानां च प्रति स्वगाढसंवेदनाः प्रकटयामः। वयं तादृशस्य महानुभावस्य जीवनम् आदरयामः यः सीमाः अतिक्रम्य स्वकीयां विशिष्टपरिचयं निर्मितवान्। तस्य विरासत् क्रिकेटस्य इतिहासे कैरेबियाईभावनायां तथा अस्य क्रीडायाः प्रेमिणां सर्वेषां हृदयेषु सर्वदा जीविता भविष्यति।

क्रिकेट वेस्टइण्डीज संस्थया दृश्यश्रद्धाञ्जलिः अर्पिता

क्रिकेट वेस्टइण्डीज संस्थया अन्यस्मिन् इन्स्टाग्रामप्रसारे सर गारफील्ड सोबर्स इत्यस्मै श्रद्धाञ्जलिं समर्पयन्त्या एकः भावपूर्णः दृश्यपटः प्रसारितः।

तस्य प्रसारस्य सह लिखितम् आसीत्, अस्मान् सर्वान् प्रेरितवन्तं तं महानं क्रीडकं प्रति श्रद्धाञ्जलिः। शान्त्या विश्रामं कुरु सर गैरी।

नवाशीतिवर्षीयवयसा निधनम् अभवत्

वेस्टइण्डीजस्य महानतमेषु क्रीडकेषु परिगणितस्य सर गारफील्ड सोबर्स इत्यस्य २०२६ तमस्य वर्षस्य जुलैमासस्य सप्तदशदिनाङ्के नवाशीतितमे वयसि बारबाडोसदेशस्य सेण्ट माइकल प्रदेशस्थिते स्वगृहे निधनम् अभवत्। तस्य पुत्रस्य डैनियल सोबर्स इत्यस्य कथनानुसारं सः शान्तिपूर्वकम् अन्तिमं श्वासम् अत्यजत्। सः किञ्चित्कालात् अस्वस्थः आसीत् तथा श्वासग्रहणे कठिनता वर्धमानत्वात् तस्मै प्राणवायुसहायता प्रदत्ता आसीत्।

क्रिकेटस्य इतिहासे महानतमेषु सर्वाङ्गक्रीडकेषु परिगणितः सर गारफील्ड सोबर्स १९५४ तमात् १९७४ तमवर्षपर्यन्तं वेस्टइण्डीज दलस्य कृते त्रिनवतिः परीक्षास्पर्धाः अक्रीडत्। अस्मिन् अवधौ सः ५७ दशमलव ७८ इति औसतेन अष्टसहस्रद्वात्रिंशत् धावनाङ्कान् अर्जितवान्, येषु षड्विंशतिः शतकानि अन्तर्भवन्ति। कन्दुकक्षेपणे तेन द्विशतपञ्चत्रिंशत् विकेटाः अपि प्राप्ताः।

१९५८ तमे वर्षे पाकिस्तानदलस्य विरुद्धं तेन क्रीडिता अपराजिता त्रिशतपञ्चषष्टिधावनाङ्कयुक्ता पारी तस्मिन् काले परीक्षाक्रीडायाः सर्वोच्चः व्यक्तिगतधावनाङ्कः आसीत्। सः अभिलेखः षट्त्रिंशद्वर्षपर्यन्तं विश्वकीर्तिमानरूपेण स्थितवान्।

१९६८ तमे वर्षे सः नॉटिङ्घमशायरदलस्य पक्षे क्रीडन् ग्लैमॉर्गनदलस्य मैल्कमनैश इत्यस्य एकस्मिन् ओवरे क्रमशः षट् षट्कारान् प्रहृत्य प्रथमश्रेणीक्रीडायाम् एतादृशीं उपलब्धिं प्राप्तवान् प्रथमः क्रीडकः अभवत्।

क्रिकेटक्षेत्रे तस्य अतुलनीययोगदानस्य सम्मानार्थं १९७५ तमे वर्षे महाराज्ञी एलिजाबेथ द्वितीया तस्मै नाइटहुड सम्मानम् अददात्। २००० तमे वर्षे विजडन संस्थया सः विंशतिशताब्द्याः पञ्चमहानतमेषु क्रिकेटक्रीडकेषु परिगणितः।

अन्ताराष्ट्रियक्रिकेटपरिषदा प्रतिवर्षं श्रेष्ठपुरुषक्रिकेटक्रीडकाय प्रदीयमाना प्रतिष्ठिता सर गारफील्ड सोबर्स ट्रॉफी अद्यापि तस्य महासंपदः प्रतीकत्वेन प्रतिष्ठिता अस्ति।

सर गारफील्ड सोबर्स इत्यस्य निधनानन्तरं विश्वस्य विविधदेशेभ्यः क्रिकेटक्रीडकाः क्रीडाजगतः प्रमुखव्यक्तित्वानि च तस्मै श्रद्धाञ्जलिम् अर्पयन्ति।

---------------

Hindusthan Samachar / Dheeraj Maithani