रांची, 19 जुलाईमासः (हि.स.)।

झारखण्डस्य मुख्यमन्त्री हेमन्त सोरेणः रविवासरे सन्तालीचलच्चित्रस्य आंगेन इत्यस्य निर्देशकं रवि राज मुर्मू महोदयं द्विसप्ततितमे राष्ट्रियचलच्चित्रपुरस्कारे सर्वश्रेष्ठ नवोदितनिर्देशक इति श्रेण्यां सम्मानप्राप्तेः निमित्तं हार्दिकाभिः शुभकामनाभिः अभिनन्दनं कृतवान्।

मुख्यमन्त्रीसचिवालयस्य पक्षतः रविवासरे प्रकाशितया पत्रकारविज्ञप्त्या युवा चलच्चित्रनिर्मातारं अभिनन्दन् मुख्यमन्त्री सोरेणः उक्तवान् यत् अहं रवि राज मुर्मू महोदयं अस्याः उत्कृष्टसफलतायाः निमित्तं हार्दिकतया अभिनन्दामि। एषः प्रतिष्ठितः राष्ट्रियचलच्चित्रपुरस्कारः तेषां कृते केवलं वैयक्तिकसफलतायाः महत्त्वपूर्णः सोपानः नास्ति, अपितु झारखण्डस्य जनानां सन्तालीभाषायाश्च कृते अपि गौरवस्य विषयः अस्ति। तेन स्वस्य आंगेन इति चलच्चित्रस्य माध्यमेन राष्ट्रियमञ्चे सन्तालीभाषायाः संस्कृतेः कथानां च समृद्धिः अतीव सुन्दररीत्या प्रस्तुताऽस्ति।

मुख्यमन्त्री उक्तवान् यत् एषः सम्मानः झारखण्डात् उद्भवन्तीं उत्कृष्टां सृजनात्मकप्रतिभां प्रकाशयति। सहैव अयं राज्यस्य कला संस्कृतेः देशजचलच्चित्रक्षेत्रस्य च सजीवकेन्द्ररूपेण वर्धमानां प्रतिष्ठाम् अधिकं दृढां करोति।

तेन विश्वासः व्यक्तीकृतः यत् रवि राज मुर्मू महोदयस्य एषा सफलता झारखण्डस्य युवा चलच्चित्रनिर्मातॄन् कलाकारांश्च प्रेरयिष्यति। अनेन ते सार्थकचलच्चित्रनिर्माणस्य माध्यमेन राज्यस्य समृद्धां सांस्कृतिकविरासतां संरक्षितुं प्रोत्साहयितुं च अग्रे सरिष्यन्ति।

श्री सोरेणः रवि राज मुर्मू महोदयस्य उज्ज्वलभविष्यस्य शुभकामनाः प्रकटयन् उक्तवान् यत् सः भविष्ये अपि स्वकीयया उत्कृष्टकलया झारखण्डस्य देशस्य च यशः निरन्तरं वर्धयतु इति मम शुभकामना।

---------------

Hindusthan Samachar / Dheeraj Maithani