Enter your Email Address to subscribe to our newsletters
भोपालनगरम्, ०२ जुलाईमासः (हि.स.)। त्रिपुरा-राज्यस्य मुख्यमन्त्री डॉ.माणिक-साहा इत्यस्य उपमुख्यमन्त्री राजेन्द्र-शुक्लेन गुरुवासरे राजधानी-भोपालस्थिते निवास-कार्यालये अभिनन्दनं कृतम्। त्रिपुरा-राज्यस्य मुख्यमन्त्रिणः डॉ.माणिक-साहा तथा उपमुख्यमन्त्रिणः राजेन्द्र-शुक्लस्य मध्ये विविधेषु समसामयिक-विषयेषु स्वास्थ्य-चिकित्सा-शिक्षाक्षेत्रे नवाचारेषु च विस्तृता चर्चा अभवत्।
अस्मिन्नवसरे त्रिपुरा-राज्यस्य मुख्य-मन्त्रिणः धर्मपत्नी स्वप्ना-साहा अपि उपस्थितासीत्। मुख्यमन्त्री डॉ.माणिक-साहा अधुना मध्यप्रदेशस्य प्रवासे वर्तते। सः भोपाले आयोजिते अष्टाविंशतितमे एओएमएसआई-मध्यावधि-अधिवेशने तथा चतुर्दशे एओएमएसआई-स्नातकोत्तर-अधिवेशने मुख्यातिथिरूपेण सहभागितां करिष्यति।
एसोसिएशन-ऑफ-ओरल-एण्ड-मैक्सिलोफेशियल-सर्जन्स-ऑफ-इण्डिया, मध्यप्रदेश-राज्य-चैप्टर तथा पीपुल्स-विश्वविद्यालयस्य संयुक्त-तत्त्वावधाने एतत् राष्ट्रीयं सम्मेलनं जुलाईमासस्य २ तः ४ दिनाङ्कपर्यन्तं पीपुल्स-विश्वविद्यालय-परिसरे आयोज्यते। सम्मेलनस्य मूलविषयः अस्ति— “क्रिएटिङ्ग अ होल्सम सर्जन”, अर्थात् “समग्र-शल्यचिकित्सकस्य निर्माणम्।”
एतत् सम्मेलनं मुख-हनु-अस्थि-शल्यचिकित्सा-क्षेत्रस्य प्रतिष्ठितं राष्ट्रीयं शैक्षणिकम् आयोजनम् अस्ति, यस्मिन् देश-विदेशेभ्यः प्रख्याताः विशेषज्ञाः, वरिष्ठ-चिकित्सकाः, चिकित्साशिक्षकाः, अनुसन्धानकर्तारः तथा स्नातकोत्तर-विद्यार्थिनः सहभागितां करिष्यन्ति। सम्मेलने नवीनतम-वैज्ञानिक-अनुसन्धानानां, आधुनिक-प्रौद्योगिकीनां, जटिल-शल्यचिकित्सा-प्रक्रियाणां तथा चिकित्सा-शिक्षायाः विविध-आयामानां विषये विचार-विमर्शः भविष्यति।
Hindusthan Samachar / Divya Ranjan