Enter your Email Address to subscribe to our newsletters
पश्चिमी सिंहभूमः, 02 जुलाईमासः (हि.स.)।
झारखण्डबाङ्ग्लाभाषीउन्नयनसमितिः कोल्हानविश्वविद्यालयस्य क्लस्टरप्रणाल्याः अन्तर्गतं जमशेदपुर, घाटशिला तथा चाईबासा इत्येतेषां विविधमहाविद्यालयेभ्यः बाङ्ग्लाविषयस्य निष्कासनसम्बद्धप्रस्तावस्य तीव्रं विरोधं व्यक्तवती। गुरुवासरे समितेः राज्यपदाधिकारीणः विश्वविद्यालयस्य कुलपतिम् ज्ञापनपत्रं समर्प्य बाङ्ग्लाविषयस्य अध्ययनं पूर्ववत् प्रवर्तयितुं प्रार्थितवन्तः।
समितिः ज्ञापनपत्रे उक्तवती यत् कोल्हानप्रदेशे बाङ्ग्लाभाषा व्यापकतया भाष्यमाणा अध्यय्यमाना च प्रमुखभाषासु अन्यतमा अस्ति। बहुवर्षेभ्यः बहुसंख्यकाः विद्यार्थिनः प्राथमिकशिक्षातः आरभ्य स्नातकस्नातकोत्तरस्तरपर्यन्तं बाङ्ग्लाभाषायाः साहित्यस्य च अध्ययनं कुर्वन्ति। अतः महाविद्यालयेभ्यः अस्य विषयस्य निष्कासनप्रस्तावः विद्यार्थिनां भविष्यं बाङ्ग्लाभाषिसमाजस्य भावनाः च प्रतिकूलतया प्रभावितुं शक्नोति।
समितेः मते बाङ्ग्लाभाषा केवलं भाषा नास्ति, अपितु अस्य प्रदेशस्य सांस्कृतिकसंपदः साहित्यिकपरम्परायाः ऐतिहासिकपरिचयस्य च अभिन्नः भागः अस्ति। दीर्घकालात् विश्वविद्यालयसम्बद्धेषु अनेकमहाविद्यालयेषु बाङ्ग्लाविषयस्य अध्ययनाध्यापनं नियमितरूपेण प्रवर्तमानम् अस्ति तथा प्रतिवर्षं बहुसंख्यकाः छात्राः छात्राश्च उच्चशिक्षायै एतं विषयं वृण्वन्ति।
ज्ञापनपत्रे नूतनशिक्षानीतेः २०२० अपि उल्लेखः कृतः। समितिः उक्तवती यत् अस्यां नीतौ मातृभाषाधारितशिक्षायाः प्रोत्साहने विशेषः बलः दत्तः अस्ति। एतदतिरिक्तं झारखण्डसर्वकारः अपि प्रादेशिकभाषाणां संरक्षणविकासयोः प्रति स्वीयां प्रतिबद्धतां प्रकटितवान्। अतः बाङ्ग्लाविषयस्य निष्कासनप्रस्तावः शिक्षानीतेः मूलभावनानुरूपः न मन्यते।
समितिः विश्वविद्यालयप्रशासनम् अनुरोधितवती यत् जमशेदपुर, घाटशिला तथा चाईबासा इत्येतेषां सर्वेषु सम्बद्धमहाविद्यालयेषु बाङ्ग्लाविषयः पूर्ववत् प्रवर्त्यताम् तथा अस्य अध्ययनाध्यापनस्य निरन्तरव्यवस्था सुनिश्चितीक्रियताम्। सहैव बाङ्ग्लाभाषिविद्यार्थिनां समाजस्य च भावनानां सम्मानं विधाय भाषायाः संरक्षणसंवर्धनयोः कृते दृढानि पदानि स्वीक्रीयन्ताम्।
समितेः सचिवः राजेश राय विश्वासं व्यक्तवान् यत् विश्वविद्यालयप्रशासनम् अस्मिन् विषये गम्भीरतया विचारं करिष्यति तथा विद्यार्थिनां हितानि भाषा संस्कृत्योः संरक्षणं च दृष्ट्वा सकारात्मकं निर्णयं स्वीकरिष्यति।
---------------
Hindusthan Samachar / Dheeraj Maithani