नवदिल्ली, 20 जुलाईमासः (हि.स.)।

विपक्षस्य तीव्रतां दृष्ट्वा अद्य आरभ्यमाणं संसदः वर्षाकालीनं सत्रं कोलाहलपूर्णं भविष्यतीति सम्भावना वर्तते। सर्वकारेण ह्यः आहूते सर्वदलीय उपवेशने विपक्षदलैः श्रीराममन्दिरे समर्पितद्रव्यस्य अपहरणम्, एथेनाल विषयः, नीट परीक्षायाः प्रश्नपत्रस्य प्रस्रवणम् इत्यादीनां विषयाणां चर्चां कर्तुम् आग्रहः कृतः। परिसीमनम् तथा महिला आरक्षणविधेयकं प्रति अपि प्रश्नाः उत्थापिताः। किन्तु सर्वकारेण एतयोः विधेयकयोः विषये किमपि न उक्तम्।

प्रधानमन्त्री नरेन्द्र मोदी वर्षाकालीनसत्रस्य प्रारम्भात् पूर्वं संसदभवनस्य हंसद्वारे प्रातः १०.१५ वादने माध्यमप्रतिनिधीन् सम्बोधयितुं शक्नुवन्ति। संसदः वर्षाकालीनं सत्रं १३ अगस्तपर्यन्तं प्रवर्तिष्यते। अस्मिन् काले एकोनविंशतिः उपवेशनानि भविष्यन्ति।

रक्षामन्त्रिणः राजनाथसिंहस्य अध्यक्षतायां सम्पन्नस्य सर्वदलीयोपवेशनस्य प्रारम्भे विपक्षदलैः तृणमूलदलस्य विद्रोहिगुटस्य आह्वानं प्रति तीव्रः विरोधः कृतः तथा किञ्चित्कालपर्यन्तं उपवेशनस्य बहिष्कारः अपि कृतः। बहिष्कारं कृतवत्सु दलेषु कांग्रेस, समाजवादीपक्षः, द्रमुक, झारखण्डमुक्तिमोर्चा, आम आदमी पार्टी, नेशनल कॉन्फ्रेन्स तथा शिवसेना यूबीटी इत्यादयः आसन्। सर्वकारेण स्थितिः स्पष्टीकृता अनन्तरं विपक्षदलानि पुनः उपवेशने सम्मिलितानि। विपक्षदलानां कथनम् आसीत् यत् यदा अस्य गुटस्य सदने मान्यता न प्राप्ता तदा कस्मिन् आधारे तेषाम् आह्वानं कृतम्।

सर्वकारेण स्पष्टीकृतं यत् लोकसभायाः विंशतिः सदस्याः पृथक् गुटं निर्मितवन्तः। तैः लोकसभाध्यक्षस्य समक्षं मान्यताप्राप्तये आवेदनपत्रम् अपि समर्पितम्। यद्यपि लोकसभाध्यक्षेन अद्यापि अस्मिन् विषये निर्णयः न कृतः तथापि तेषां सदस्यसंख्यां दृष्ट्वा तान् उपेक्षितुं न शक्यते।

प्रायः त्रिघण्टापर्यन्तं प्रवृत्ते सर्वदलीयोपवेशने सर्वकारेण विपक्षदलानां मतानि सावधानतया श्रुतानि। उपवेशने चत्वारिंशत् दलानां नेतारः उपस्थिताः आसन्। संसदीयकार्यमन्त्री किरेन रिजिजू अवदत् यत् उपवेशनं सम्यक् अभवत्। सर्वैः स्वस्वमतं प्रस्तुतम्। संसदः अवरोधविना प्रवर्तेत इति अस्माकं सर्वेषां दायित्वम् अस्ति।

सर्वकारेण स्पष्टं कृतं यत् वर्षाकालीनसत्रे अष्टौ विधेयकानि प्रस्तूयन्ते। तेषु विदेशीयोगदाननियमनसंशोधनविधेयकम् तथा विकसितभारतशिक्षाअधिष्ठानविधेयकम् इत्यादीनि अन्तर्भवन्ति। वर्षाकालीनसत्रे महिला आरक्षणविधेयकं परिसीमनविधेयकं च प्रस्तूयेताम् इति विषये अद्यापि स्थितिः अस्पष्टा वर्तते। यदि द्वितीयतृतीयांशबहुमतस्य संख्या सम्पूर्णा भविष्यति तर्हि सर्वकारः एतानि विधेयकानि पारितुं प्रयतिष्यते।

---------------

Hindusthan Samachar / Dheeraj Maithani