जयपुरनगरम्, २० जुलाईमासः (हि.स.)। राजस्थान-सर्वकारस्य वरिष्ठ-नागरिक-तीर्थयात्रा-योजना–२०२६ इत्यस्य अन्तर्गतं वैमानिक-तीर्थयात्रायाः सोमवासरे भव्यः शुभारम्भः अभवत्। देवस्थानमन्त्री जोराराम-कुमावतः त्रिचत्वारिंशत् (४३) वरिष्ठ-नागरिकाणां प्रथमं यात्रिदलं हरित-ध्वजं प्रदर्श्य प्रेषितवान्। एतत् यात्रिदलं जयपुर-नगरस्य सिन्धी-कैम्प-स्थितात् महादेव-विला-आतिथ्यगृहात् बसयानद्वारा नवदेहलीं प्रति प्रस्थितम्। ततः ते वैमानिकयानद्वारा नेपालदेशस्य काठमाण्डु-नगरं गमिष्यन्ति। सर्वे वरिष्ठ-तीर्थयात्रिणः तत्र स्थितस्य प्रसिद्धस्य बाबा-पशुपतिनाथ-मन्दिरस्य दर्शनं करिष्यन्ति। पशुपतिनाथ-मन्दिरस्य दर्शनस्य सह काठमाण्डु-नगरस्य अन्येषामपि प्रमुख-धार्मिक-दर्शनीय-स्थानानां भ्रमणं कारयिष्यते।

देवस्थानमन्त्री कुमावतः अवदत् यत् अस्माकं सर्वकारस्य मुख्योद्देश्यं वृद्धजनानां जीवनं सुगमं भक्तिमयं च कर्तुम् अस्ति। सः अवदत् यत् ये वृद्धाः कदाचित् वैमानिकयाने उपवेशनस्य स्वप्नम् अपश्यन्, अद्य सर्वकारः तान् साक्षात् बाबा-पशुपतिनाथस्य धाम प्रति नयति। सः पुनरवदत् यत् प्रदेशे भाजपा-सर्वकारस्य स्थापनानन्तरं मुख्यमन्त्रिणः भजनलाल-शर्मणः नेतृत्वे वरिष्ठ-नागरिक-तीर्थयात्रा-योजनायां बहवः सुधाराः कृताः।

कुमावतः अवदत् यत् पूर्व-काङ्ग्रेस-सर्वकारस्य काले वैमानिक-तीर्थयात्रिणः धर्मशालासु निवासिताः आसन्, किन्त्वधुना तेषां कृते त्रि-तारकीय-आतिथ्यगृहेषु निवासस्य व्यवस्था कृता अस्ति। तेन उक्तं यत् पूर्वं काठमाण्डु-नगरे यात्रिणः केवलम् एकदिनं स्थास्यन्ति स्म, अधुना तु द्विदिनं स्थास्यन्ति। अधुना ते पशुपतिनाथ-मन्दिर-दर्शनस्य सह बुढानीलकण्ठ-मन्दिरस्य तथा बौद्धनाथ-स्तूपस्य अपि दर्शनं कर्तुं शक्नुवन्ति।

तीर्थयात्रिणां विश्रान्त्यर्थं काठमाण्डु-नगरे त्रि-तारकीय-आतिथ्यगृहे निवासस्य व्यवस्था कृता अस्ति। यात्रिणां सहाय्यार्थं, सुरक्षार्थं मार्गदर्शनार्थं च एकः राजकीय-अनुरक्षकः तथा आईआरसीटीसी-संस्थायाः एकः कर्मचारी सम्पूर्ण-यात्रायां तैः सह भविष्यति। एतत् प्रथमं यात्रिदलं स्वतीर्थयात्रां सम्पन्न्य २२ जुलाईमासे २०२६ तमे वर्षे पुनः जयपुरनगरं प्रत्यागमिष्यति।

देवस्थानमन्त्री जोराराम-कुमावतः अग्रिम-कार्यक्रमस्य विषये महत्त्वपूर्णां सूचनाम् अयच्छत्। तेन उक्तं यत् २० जुलाईमासतः २२ सितम्बरमासपर्यन्तं प्रतिदिनं काठमाण्डु-नगराय वैमानिक-तीर्थयात्रा सञ्चालिता भविष्यति। २२ सितम्बरमासपर्यन्तं समग्रतः २,८६० वरिष्ठ-नागरिकाः पशुपतिनाथ-मन्दिरस्य दर्शनं करिष्यन्ति। तेषु २८ जुलाईमासपर्यन्तं बीकानेर-चूरू-जनपदाभ्यां समग्रतः ३८२ यात्रिणः पशुपतिनाथस्य दर्शनं करिष्यन्ति, येषु बीकानेर-जनपदस्य २०५ तथा चूरू-जनपदस्य १७७ यात्रिणः सन्ति।

अक्टूबर-नवम्बर-मासयोः दीपावली-प्रभृतिपर्वोत्सवानां कारणेन वैमानिक-तीर्थयात्राः स्थगिताः भविष्यन्ति। अवशिष्टाः वैमानिक-तीर्थयात्रिणः दिसम्बरमासतः पुनः काठमाण्डु-दर्शनार्थं प्रेषिताः भविष्यन्ति। राजस्थान-सर्वकारस्य अस्याः योजनायाः कारणेन वृद्धजनानां मध्ये महान् उत्साहः दृश्यते। प्रथम-यात्रिदलस्य प्रस्थानकाले सम्पूर्णं वातावरणं भक्तिमयम् अभवत्।

अस्मिन् अवसरे भाजपा-नेता सुनील-कुमावतः, आईआरसीटीसी-संस्थायाः अपर-महाप्रबन्धकः कृष्णकुमार-सिंहः, देवस्थान-विभागस्य सहायक-आयुक्तः जयपुर-प्रथमः रतनलाल-योगी, जयपुर-द्वितीयः महेन्द्र-देवतवालः, बीकानेरस्य सहायक-आयुक्तः गौरव-सोनी तथा अन्ये बहवः गणमान्यजनाः उपस्थिताः आसन्।

Hindusthan Samachar / Divya Ranjan