धमतरीनगरम्, २१ जुलाईमासः (हि.स.)। रथयात्रानन्तरं मौसी-गृहे जनकपुरी-धाम्नि विराजमानस्य भगवत: जगन्नाथस्य, अग्रजस्य बलभद्रस्य भगिन्याः सुभद्रायाश्च दर्शनार्थं प्रतिदिनं बहुसंख्यकाः श्रद्धालवः समागच्छन्ति। जुलाईमासस्य १६ दिनाङ्कात् आरभ्य जनकपुरी-धाम्नि विश्रामं कुर्वन् महाप्रभुः प्रातःकालात् सायंकालपर्यन्तं स्वभक्तेभ्यः दर्शनं दत्त्वा आशीर्वादं प्रददाति।

धमतरी-नगरात् एव न, अपितु ग्रामीण-क्षेत्रेभ्यः समीपवर्तिभ्यः जनपदेभ्यश्च अपि श्रद्धालवः दर्शन-लाभार्थम् आगच्छन्ति। श्रद्धालूनां कृते प्रतिदिनं प्रसाद-वितरणस्य व्यवस्था क्रियते, यस्मिन् बहुसंख्यकाः भक्ताः प्रसादं गृह्णन्ति। जुलाईमासस्य १६ दिनाङ्के भगवान् जगन्नाथः, बलभद्रः, सुभद्रा च द्वाविंशति-पाद-उन्नते भव्य-रथे विराजमानाः सन्तः पारम्परिक-विधिना श्रीजगदीश-मन्दिरात् जनकपुरी-धाम प्राप्तवन्तः। ढोल-नगारा-वादनैः, वाद्य-घोषैः, ‘जय जगन्नाथ’ इति गगनभेदैः घोषैश्च सह सम्पन्नायां रथयात्रायां श्रद्धालवः महोत्साहेन रथम् आकृष्टवन्तः। मार्गे स्थाने स्थाने भगवतः पूजनम्, महारार्तिकीम्, पुष्पवृष्टिश्च कृत्वा भव्यं स्वागतं कृतम्, येन सम्पूर्णं नगरं भक्तिरसेन आप्लावितम् अभवत्।

जनकपुरी-धाम्नि आगमनानन्तरं वैदिक-मन्त्र-उच्चारणेन सह महारात्रिकं सम्पन्नम्, ततः प्रभृति प्रतिदिनं दर्शन-क्रमः अविरतं प्रवर्तते। श्रद्धालूनां सुविधां दृष्ट्वा श्रीजगदीश-मन्दिर-न्यासेन गोशाला-न्यासेन च प्रातः सायं च नियमितरूपेण भण्डार-व्यवस्था क्रियते। न्यासस्य पदाधिकारीणः स्वयंसेवकाश्च दर्शन-व्यवस्था, प्रसाद-वितरणम्, अन्य-व्यवस्थाश्च सुचारुरूपेण सञ्चालयन्ति। श्रीजगदीश-मन्दिर-न्यासस्य सहसचिवः मोहन-अग्रवालः अवदत् यत् मातृस्वसा-गृहे प्रवासानन्तरं जुलाईमासस्य २७ दिनाङ्के भगवत: जगन्नाथस्य, बलभद्रस्य सुभद्रायाश्च भव्य-पुनरागमन-रथयात्रा आयोजिता भविष्यति। अस्याः यात्रायाः विषये श्रद्धालुषु अधुनैव महोत्साहः वर्तते।

Hindusthan Samachar / Divya Ranjan