षष्ठ-अगस्त-दिनाङ्के कृषि-वित्तविवरणं प्रस्तूयते।

चेन्नईनगरम्, २१ जुलाईमासः (हि.स.)। तमिलनाडु-विधानसभायाः अग्रिमं सत्रं पञ्चम-अगस्त-दिनाङ्कात् प्रारभ्यते। विधानसभाध्यक्षः जे.सी.डी. प्रभाकरः मङ्गलवासरे एतस्य घोषणां कृत्वा अवदत् यत् सत्रस्य प्रथमदिने वित्तीय-वर्षस्य २०२६-२७ सामान्य-वित्तविवरणं प्रस्तूयते, षष्ठ-अगस्त-दिनाङ्के च कृषि-वित्तविवरणं सदसि प्रस्तूयते।

चेन्नई-सचिवालये आयोजिते संवाददाता-सम्मेलने विधानसभाध्यक्षः जे.सी.डी. प्रभाकरः अवदत् यत् पञ्चम-अगस्त-दिनाङ्के प्रातः १० वादने विधानसभायाः कार्यवाही प्रारभ्यते। अस्मिन् अवसरे वित्तमन्त्री मारिया-विल्सनः वित्तीय-वर्षस्य २०२६-२७ सामान्य-वित्तविवरणं प्रस्तोष्यति। तदनन्तरं षष्ठ-अगस्त-दिनाङ्के कृषिमन्त्री विनोदः कृषि-वित्तविवरणं सदनस्य पटले उपस्थापयिष्यति।

तेन उक्तं यत् सामान्य-वित्तविवरणस्य कृषि-वित्तविवरणस्य च प्रस्तुती-करणानन्तरं उभयोरपि विषये चर्चा भविष्यति। चर्चायाः समापनानन्तरं सम्बन्धिताः मन्त्रिणः सदस्यैः उत्थापितानां प्रश्नानां विचाराणाञ्च उत्तरं दास्यन्ति। ततः परं विभिन्न-विभागानां अनुदान-याचनानां विषये चरणबद्ध-चर्चा भविष्यति तथा विधानसभायाः निर्धारित-प्रक्रियानुसारं ताः अनुमोदिताः भविष्यन्ति।

विधानसभाध्यक्षः अवदत् यत् वित्तविवरण-सत्रस्य अवधेः अन्तिमः निर्णयः कार्य-सञ्चालन-परामर्श-समितेः सभायां क्रियते। एषा समितिः एव सदनस्य कार्यसूचीं विभिन्न-विषयेषु चर्चायै च समयं निर्धारयिष्यति।

उल्लेखनीयम् अस्ति यत् सप्तदश-तमिलनाडु-विधानसभा-निर्वाचनानन्तरं सत्ताम् आगतायाः तमिलगा-वेत्रि-कडगम् सर्वकारस्य प्रथमं विधानसभा-सत्रं अष्टादश-जून-दिनाङ्के राज्यपालस्य अभिभाषणेन सह प्रारब्धम् आसीत्। राज्यपालस्य अभिभाषणस्य धन्यवाद-प्रस्तावस्य विषये १९, २२ तथा २३ जून-दिनाङ्केषु चर्चा अभवत्। चर्चायाः अन्तिमदिने मुख्यमन्त्री सी. जोसेफ-विजयः सदस्यैः उत्थापितानां विषयाणां उत्तरम् अददात्। ततः परं विधानसभायाः कार्यवाही अनिश्चितकालपर्यन्तं स्थगिता आसीत्।

अधुना पञ्चम-अगस्त-दिनाङ्कात् प्रारभ्यमाणम् एतत् टीवीके-सर्वकारस्य प्रथमं पूर्ण-वित्तविवरणं-सत्रं भविष्यति, यस्मिन् सर्वकारः वित्तीय-वर्षस्य २०२६-२७ कृते स्वस्य आय-व्यय-सम्बद्धाः योजनाः तथा विभिन्न-विभागानां कृते वित्तविवरण-प्रावधानानि सदनस्य पुरतः प्रस्तोष्यति।

Hindusthan Samachar / Divya Ranjan