वाराणसी, 21 जुलाईमासः (हि.स.)।उत्तरप्रदेशस्य वाराणसीस्थस्य काशीहिन्दूविश्वविद्यालयस्य सङ्गीतमञ्चकलासङ्कायस्य गायनविभागेन आयोजितायाः त्रिदिवसीयकार्यशालायाः पूरब के रंग इत्यस्य द्वितीये दिने मङ्गलवासरे विद्यार्थिभ्यः पूरबाङ्गगायनशैल्याः विशिष्टविधेः व्यावहारिकप्रशिक्षणं प्रदत्तम्।

कार्यशालायाः प्रशिक्षिका बीएचयू महिलामहाविद्यालयस्य आचार्या प्रोफेसर ऋचाकुमारः सहभागिनः पूरबाङ्गगायनशैल्याः शैलीवैशिष्ट्यैः, बोलबनावविधिना, भावाभिव्यक्त्या तथा ठुमरीप्रस्तुतेः विविधैः आयामैः परिचितवती। तया व्यावहारिकप्रदर्शनेन विद्यार्थिनः गायनशैल्याः सूक्ष्मविशेषाणाम् अभ्यासः अपि कारितः।

सङ्गीतमञ्चकलासङ्कायस्य अधिष्ठात्री प्रमुखा च प्रोफेसर सङ्गीतापण्डितः तथा आयोजनसचिवौ डॉ. मधुमिताभट्टाचार्यः डॉ. श्यामाकुमारी च अवदताम् यत् कार्यशालायाः शुभारम्भः सोमवासरात् अभवत्। त्रिदिनात्मकायां अस्यां कार्यशालायां पूरब के रंग इति विषयस्य अन्तर्गतं विशिष्टगायनशैल्याः परम्परा, तस्याः शैलीवैशिष्ट्यानि तथा व्यावहारिकपक्षाः इति विषयेषु विस्तरेण प्रशिक्षणं प्रदीयते।

ताभ्याम् उक्तं यत् प्रोफेसर ऋचाकुमारः शास्त्रीयोपशास्त्रीयसङ्गीतयोः प्रतिष्ठिता गायिका अस्ति तथा च तस्याः मार्गदर्शनेन सहभागिभ्यः पूरबाङ्गगायनपरम्परायाः व्यावहारिकाध्ययनस्य अवसरः प्राप्यते।

कार्यशालायां बीपीए, एमपीए तथा पीएचडी पाठ्यक्रमाणां विद्यार्थिभिः सह बीएचयू महिलामहाविद्यालयस्य छात्रछात्राभिः अपि उत्साहपूर्वकं सहभागिता कृता।

उल्लेखनीयं यत् कार्यशालायाः प्रथमदिने सङ्कायस्य विशिष्टा पूर्वछात्रा मुम्बईनगरस्य सुप्रसिद्धा गायिका प्रियङ्काभट्टाचार्यः अपि उपस्थितवती। अस्मिन् अवसरे सङ्कायस्य आचार्यैः तस्याः स्वागतं सम्मानं च कृतम्।

Hindusthan Samachar / Dheeraj Maithani