हरिद्वारनगरम्, २१ जुलाईमासः (हि.स.)। मुख्यमन्त्री पुष्करसिंह-धामी मङ्गलवासरे हरिद्वार-गङ्गा-परिसर-परियोजनायाः अन्तर्गतं प्रायः २३५ कोटि-रूप्यकाणां विविध-आधारभूत-अवसंरचना-परियोजनानां भूमिपूजनं शिलान्यासं च कृतवान्।

उत्तराखण्ड-निवेश-आधारभूत-संरचना-विकास-मण्डलेन सञ्चाल्यमानानाम् एतासां परियोजनानाम् उद्देश्यं हरिद्वारे आधुनिकानां, सुरक्षितानां, स्वच्छानां सुव्यवस्थितानां च आधारभूत-सुविधानां विकासं कृत्वा श्रद्धालुभ्यः पर्यटकेभ्यश्च उत्कृष्टानुभवं प्रदातुम् अस्ति।

हरिद्वारस्थिते अलकनन्दा-होटले आयोजिते कार्यक्रमे मुख्यमन्त्री ४३.२५ कोटि-रूप्यक-व्ययेन निर्मीयमाणायाः प्रशासनिक-मार्ग-परियोजनायाः भूमिपूजनम् अकरोत्। तेन सह ६६.७६ कोटि-रूप्यक-व्ययेन हर-की-पौडी तथा सुभाष-घाटस्य पुनरुद्धार-कार्यस्य, ६६.३४ कोटि-रूप्यक-व्ययेन हर-की-पौडी-उत्तर-क्षेत्रस्य आधारभूत-अवसंरचना-विकासस्य तथा ५८.८४ कोटि-रूप्यक-व्ययेन रोडी-बेलवाला-क्षेत्रस्य पुनरुद्धार-कार्यस्य शिलान्यासः अपि कृतः।

मुख्यमन्त्री अवदत् यत् हरिद्वारनगरं केवलम् उत्तराखण्डस्य एव न, अपितु सम्पूर्णस्य देशस्य विश्वस्य च कोटिशः श्रद्धालूनाम् आस्थायाः प्रमुखं केन्द्रम् अस्ति। राज्य-सर्वकारस्य लक्ष्यं हरिद्वारं धार्मिक-सांस्कृतिक-पर्यटन-दृष्ट्या विश्वस्तरीय-सुविधाभिः सुसज्जितं कर्तुम् अस्ति, येन अत्र आगच्छद्भ्यः श्रद्धालुभ्यः उत्तमाः व्यवस्थाः उपलब्धाः भवेयुः।

तेन उक्तं यत् गङ्गा-परिसर-सम्बद्धानां विकास-कार्याणां सम्पन्नतायाः अनन्तरं हर-की-पौडी, सुभाष-घाटः, रोडी-बेलवाला-क्षेत्रं च आधारभूत-संरचनया अधिकं सुदृढं भविष्यति। अनेन श्रद्धालूनां सुविधाः वर्धिष्यन्ते, जनसम्मर्द-प्रबन्धनम् अधिकं प्रभावी भविष्यति, स्वच्छता-सुरक्षा-यातायात-व्यवस्थासु च उल्लेखनीयः सुधारः भविष्यति।

मुख्यमन्त्री अवदत् यत् राज्य-सर्वकारः धार्मिक-स्थलानां संरक्षणेन सह आधुनिक-सुविधानां विकासेऽपि विशेषं ध्यानं ददाति। हरिद्वारे प्रचलन्त्यः एताः परियोजनाः भविष्ये आयोज्यमानानां बृहद्-धार्मिक-कार्यक्रमाणां, विशेषतः कुम्भ-मेलापक-२०२७ इत्यस्य सज्जतायाः अपि सुदृढीकरणं करिष्यन्ति।

कार्यक्रमे जनप्रतिनिधयः, प्रशासनिक-अधिकारिणः, विविध-विभागानां वरिष्ठ-अधिकारिणश्च उपस्थिताः आसन्। यूआईआईडीबी-अधिकारिणः परियोजनानां रूपरेखां प्रस्तुतवन्तः तथा उक्तवन्तः यत् सर्वाणि कार्याणि निर्धारित-समयसीमायाः अन्तर्गतं गुणवत्तया सह सम्पन्नानि भविष्यन्ति।

Hindusthan Samachar / Divya Ranjan