Enter your Email Address to subscribe to our newsletters
फर्रुखाबादनगरम्, २२ जुलाईमासः (हि.स.)। गम्भीर-कुपोषणेन पीडितेभ्यः शिशुभ्यः स्वस्थ-जीवनं प्रदातुं डॉ. राममनोहर-लोहिया-जनपद-चिकित्सालयस्थितं पोषण-पुनर्वास-केन्द्रम् निरन्तरम् उल्लेखनीयं कार्यं करोति। उत्तम-चिकित्सया, सन्तुलित-पोषणेन तथा प्रभावी-अनुवर्तन-व्यवस्थया फर्रुखाबादस्य पोषण-पुनर्वास-केन्द्रं प्रदेशस्य श्रेष्ठ-दश-पोषण-पुनर्वास-केन्द्रेषु स्वस्थानं प्राप्तवत्। केवलं दश-शय्यायुक्ते अस्मिन् केन्द्रे बालकानां उपचारस्य याचना निरन्तरं वर्धते। जून-मासे केन्द्रे १६२ शय्या-अधिवास-दिवसाः अभिलेखिताः, येन ज्ञायते यत् केन्द्रस्य सर्वाः शय्याः प्रायः सर्वदा उपयुज्यन्ते स्म। केन्द्रस्य ९५ प्रतिशतं पुनर्स्वास्थ्य-दरः तस्य गुणवत्तापूर्ण-सेवानां प्रमाणम् अस्ति।
मुख्य-चिकित्सा-अधिकारी डॉ. आनन्द-उपाध्यायः बुधवासरे अवदत् यत् गम्भीर-तीव्र-कुपोषणेन पीडितान् बालकान् सामान्य-जीवनस्य मुख्यधारायां पुनः स्थापयितुं स्वास्थ्य-विभागः पूर्ण-प्रतिबद्धतया कार्यं करोति। पोषण-पुनर्वास-केन्द्रे प्रविष्टः प्रत्येकं बालकः प्रायः चतुर्दश-दिनानि चिकित्सकीय-पर्यवेक्षणे स्थाप्यते। अस्मिन् काले विशेषज्ञ-चिकित्सकानां निरीक्षणे औषध-सेवा, पौष्टिक-आहारः, नियमित-स्वास्थ्य-परीक्षणं तथा आवश्यक-चिकित्सा निःशुल्कतया प्रदीयते। बालकेन सह निवसन्त्याः मातुः भोजनस्यापि निःशुल्क-व्यवस्था क्रियते तथा तस्यै प्रतिदिनं ५० रूप्यकाणां प्रोत्साहन-राशिः प्रदीयते।
तेन उक्तं यत् बालकस्य चिकित्सालयात् निर्गमनानन्तरमपि तस्य नियमित-अनुवर्तनं क्रियते। प्रत्येकं बालकस्य पञ्चदश-पञ्चदश-दिनान्तराले चतुर्वारं अनुवर्तन-परीक्षणं भवति तथा प्रत्येकम् अनुवर्तने १४० रूप्यकाणां प्रोत्साहन-राशिः प्रदीयते, येन अभिभावकाः नियमितरूपेण बालकं परीक्षणार्थम् आनयन्ति तथा तस्य पोषण-स्तरः निरन्तरं वर्धते।
पोषण-पुनर्वास-केन्द्रस्य सञ्चालनं चिकित्सा-अधिकारी डॉ. विवेक-सक्सेनाया: नेतृत्वे समर्पणेन उत्तरदायित्वेन च क्रियते। तेन सह आहार-विशेषज्ञा सङ्गीता-शुक्ला, षट् प्रशिक्षिताः परिचारिकाः तथा एकः पाककर्मी बालकानां परिचर्यां, सन्तुलित-आहार-व्यवस्थां, मातॄणां पोषण-सम्बद्ध-परामर्शं तथा उपचार-व्यवस्थां प्रभावी-रीत्या सञ्चालयन्ति। दलस्य उद्देश्यं केवलं बालकस्य भार-वृद्धिः न, अपितु परिवारान् अपि सन्तुलित-पोषणस्य शिशु-परिचर्यायाश्च विषये जागरूकान् कर्तुम् अस्ति।
डॉ. आनन्द-उपाध्यायः अवदत् यत् कुपोषण-विरुद्धम् अभियाने जनपद-प्रशासनस्यापि पूर्णः सहयोगः प्राप्यते। समये-समये जिलाधिकारी मुख्य-चिकित्सा-अधिकारी च स्वयं पोषण-पुनर्वास-केन्द्रं गत्वा प्रविष्टानां बालकानां तेषां मातॄणां च उत्साहवर्धनं कुरुतः। अस्मिन् अवसरे बालकेभ्यः फलानि, वस्त्राणि तथा बेबी-जॉन्सन-किट् इति प्रदीयन्ते, येन तेषां मनोबलं वर्धते। अनेन परिवारेषु उत्तम-पोषणस्य, नियमित-चिकित्सायाः तथा स्वास्थ्यस्य प्रति सकारात्मक-भावना विकसिताभवत्।
मुख्य-चिकित्सा-अधिकारी जनपदवासिनः आहूतवान् यत् यदि कस्यचित् बालकस्य गम्भीर-कुपोषणस्य लक्षणानि दृश्येरन्, तर्हि तानि न गोपयित्वा तं शीघ्रं समीपस्थ-स्वास्थ्य-केन्द्रं वा पोषण-पुनर्वास-केन्द्रं नीत्वा उपचारं कारयेयुः। समये उपचारः, सम्यक्-पोषणम् तथा नियमित-अनुवर्तनम् इत्येतेषां माध्यमेन कुपोषणं पराजेतुं शक्यते।
Hindusthan Samachar / Divya Ranjan