शिमलानगरम्, २२ जुलाईमासः (हि.स.)। हिमाचलप्रदेश-सर्वकारः मादकद्रव्येषु, विशेषतः 'चिट्टा'-नामके मादकद्रव्ये, नियन्त्रणार्थं क्रीडानां प्रमुखमाध्यमत्वेन उपयोगं करिष्यति। मुख्यमन्त्री सुखविन्द्रसिंह-सुक्खू मङ्गलवासरसायं शिमलानगरे आयोजितस्य 'खेलो हिमाचल-चिट्टा-मुक्त-अभियानस्य' समीक्षासभायाः अध्यक्षतां कृत्वा राज्यव्यापिनः अस्य अभियानस्य रूपरेखां रणनीतिं च समीक्षितवान्। सर्वकारेण उक्तं यत् अस्य अभियानस्य प्रमुखोद्देश्यं युवानः क्रीडाभिः सम्बद्धान् कृत्वा मादकद्रव्येभ्यः दूरं स्थापयितुं तथा च समग्रे प्रदेशे चिट्टा-विरुद्धं जनजागरूकतां वर्धयितुम् अस्ति।

मुख्यमन्त्री अवदत् यत् चिट्टा तथा अन्येषां मादकद्रव्याणां वर्धमाना समस्या चिन्ताजनका वर्तते। मादकद्रव्यसेवनस्य व्यसनं न केवलं यूनां भविष्यं विनाशयति, अपितु परिवारेषु समाजे च प्रतिकूल-प्रभावम् अपि जनयति। तेन उक्तं यत् राज्यसर्वकारः मादकद्रव्यव्यापारस्य विरुद्धं कठोरकार्यवाहीं कुर्वन् एव तस्य निवारणं, जनजागरूकतां तथा व्यसनमुक्तेः प्रयत्नान् समकालमेव प्रवर्तयति। सः अवदत् यत् क्रीडाः युवसु अनुशासनं, समूहभावनां, आत्मविश्वासं स्वस्थस्पर्धा-भावनां च विकसितवत्य:। एतस्यैव भावनायाः आधारेण 'खेलो हिमाचल-चिट्टा-मुक्त-अभियानम्' आरभ्यते, येन युवानः सकारात्मक-क्रियाकलापैः सम्बद्धाः भूत्वा मादकद्रव्येभ्यः दूरं तिष्ठेयुः।

मुख्यमन्त्री अवदत् यत् प्रदेशस्य सर्वेषु ३,७५८ ग्रामपञ्चायतेषु, अष्टसु नगरनिगमेषु, २९ नगरपरिषत्सु तथा ३९ नगरपञ्चायतेषु चिट्टा-विरुद्धं जन-जागरूकताभियानं सञ्चालयिष्यते। एतेन सह तासु २३५ ग्रामपञ्चायतेषु विशेषध्यानं दास्यते, याः चिट्टा-समस्यया अत्यधिकं प्रभावितप्रदेशत्वेन चिह्निताः सन्ति। एतेषु क्षेत्रेषु विशेषाभियानस्य माध्यमेन जनान् युवांश्च मादक-द्रव्यसेवनस्य दुष्परिणामेषु जागरूकाः क्रियन्ते।

सः अवदत् यत् अभियानस्य अन्तर्गतं उपमण्डल-जनपद-राज्यस्तरेषु क्रीडा-प्रतियोगिताः आयोजयिष्यन्ते। एतासां प्रतियोगितानां सञ्चालनार्थं, निरीक्षणार्थं व्यवस्थापनार्थं च तकनीकीसमितयः निर्मास्यन्ते। तासु क्रीडासङ्घानां निर्णायकैः सह युवासेवा-क्रीडा-विभागस्य, शिक्षाविभागस्य तथा आरक्षकविभागस्य प्रतिनिधयः अपि सम्मिलिताः भविष्यन्ति।

मुख्यमन्त्री अवदत् यत् एतासां क्रीडाप्रतियोगितानाम् आयोजनार्थं ११.५६-कोटि-रूप्यकाणां व्ययः भविष्यति। विजेतृभ्यः उपविजेतृभ्यश्च पारितोषिकराशिः अपि प्रदास्यते। तेन उक्तं यत् प्रदेशसर्वकारः स्वस्थां, अनुशासितां समर्थां च युववंशं निर्मातुं दृढसंकल्पितः अस्ति। तस्य मतानुसारं मादकद्रव्यव्यसनस्य आरम्भात् पूर्वमेव जनजागरूकतां प्रसारयितुं, समये हस्तक्षेपं कर्तुं समाजस्य सहभागितां च वर्धयितुं अत्यावश्यकम् अस्ति।

मुख्यमन्त्री अवदत् यत् 'नशामुक्त-हिमाचलम्' इति लक्ष्यं सर्वकारस्य, शिक्षणसंस्थानानां, क्रीडासङ्घानां, स्थानीयनिकायानां, पञ्चायतीराज-संस्थानां नागरिकसमाजस्य च संयुक्तप्रयत्नैरेव साधयितुं शक्यते। तेन सर्वेभ्यः सम्बद्धपक्षेभ्यः अस्य अभियानस्य भूमिस्तरे सफलतापूर्वकं सञ्चालनार्थं सक्रियसहयोगस्य आह्वानं कृतम्।

Hindusthan Samachar / Divya Ranjan