सीवाननगरम्, २२ जुलाईमासः (हि.स.)। राष्ट्रिय-स्वयंसेवक-सङ्घस्य शताब्दी-वर्ष-कार्यक्रम-श्रृङ्खलायाः अन्तर्गतं बुधवासरे महावीरी-सरस्वती-विद्या-मन्दिरे, विजयहाटा-स्थले, युव-संवाद-कार्यक्रमस्य आयोजनम् अभवत्। अस्मिन् कार्यक्रमे उत्तरबिहार-प्रान्तस्य सह-प्रान्त-प्रचारकः प्रवीरः विद्यार्थिनः राष्ट्रनिर्माणे सक्रिय-भागग्रहणाय आहूतवान् तथा सङ्घेन निर्धारितानां दश-सामाजिक-कर्तव्याणां पालनस्य सन्देशम् अयच्छत्।

कार्यक्रमस्य शुभारम्भः मातु: सरस्वत्याः, ॐ तथा भारतमातुः तैलचित्रयोः पुष्पार्चनं दीपप्रज्वलनं च कृत्वा अभवत्। अस्मिन् अवसरे सारण-विभाग-कार्यवाहः प्रभात-रञ्जनः, सीवान-जनपद-प्रचारकः बसन्त-कुमारः, सह-जनपद-कार्यवाहः बिनोद-पाण्डेयः, जनपद-सम्पर्क-प्रमुखः गिरीश-कुमारः तथा विद्यालयस्य प्राचार्यः डॉ. कुमार-विजय-रञ्जनः उपस्थिताः आसन्।

स्वीय-सम्बोधने प्रवीरः अवदत् यत् अद्यतनः युवा केवलं स्वस्य भविष्यस्य निर्माता नास्ति, अपितु राष्ट्रस्य वर्तमानस्य भविष्यस्य च आधारः अस्ति। सामाजिक-समरसता, पारिवारिक-संस्काराः, पर्यावरण-संरक्षणम्, स्वदेशी-आचरणम्, नागरिक-कर्तव्य-पालनम्, चरित्र-निर्माणम् तथा राष्ट्रं सर्वोपरि इति भावनां स्वीकृत्य एव विकसितस्य सशक्तस्य च भारतस्य निर्माणं कर्तुं शक्यते इति तेन उक्तम्।

तेन उक्तं यत् जाति-भाषा-प्रदेश-आर्थिकाधारेषु कृतः भेदभावः समाजं दुर्बलं करोति। सर्वे भारतीयाः एकस्य परिवारस्य सदस्याः सन्ति, परस्पर-सम्मानः, सहयोगः तथा आत्मीयता एव राष्ट्रस्य वास्तविक-शक्तिः अस्ति।

तेन विद्यार्थिनः परिवारे संस्कारान् आचरितुं, मातापितृभ्यां ज्येष्ठेभ्यश्च सम्मानं प्रदातुं तथा भारतीय-जीवन-मूल्यानि आत्मसात् कर्तुम् आग्रहः कृतः। पर्यावरण-संरक्षणस्य महत्त्वं प्रतिपादयन् तेन जलस्य, वनानां भूमेश्च संरक्षणं प्रत्येकस्य नागरिकस्य दायित्वम् इति उक्तम्। विद्यार्थिभ्यः वृक्षारोपणे, जल-संरक्षणे तथा स्वच्छता-अभियाने सक्रिय-भागग्रहणस्य अपि आह्वानं कृतम्। तथा च स्वदेशी-वस्तूनां उपयोगः आत्मनिर्भर-भारतस्य दृढ-आधारः इति प्रतिपाद्य स्थानीय-उत्पादानां प्रोत्साहनाय आह्वानम् अकरोत्।

प्रवीरः अवदत् यत् प्रत्येकं नागरिकः संविधानं समाजं च प्रति स्वकर्तव्याणि निष्ठया पालयेत्। अनुशासनम्, विधेः सम्मानः, मतदानम्, सार्वजनिक-सम्पत्तेः संरक्षणम् तथा राष्ट्रहितस्य सर्वोच्च-स्थान-प्रदानम् आदर्श-नागरिकस्य लक्षणानि सन्ति। तेन विद्यार्थिभ्यः सेवा, अनुशासनम् तथा राष्ट्रभक्तिं जीवनस्य लक्ष्यम् कर्तुं सङ्कल्पः अपि कारितः।

कार्यक्रमस्य अन्ते विद्यालयस्य पत्रकार-प्रभारी अखिलेश-श्रीवास्तवः अवदत् यत् सर्वे आचार्याः विद्यार्थिनश्च राष्ट्रं समाजं च प्रति स्वकर्तव्याणां निष्ठापूर्वकं पालनस्य सामूहिक-सङ्कल्पम् अगृह्णन्। अस्मिन् अवसरे उप-प्राचार्यः आशुतोष-कुमारः, देवानन्द-श्रीवास्तवः, मुरली-मनोहर-मिश्रः, सच्चितानन्द-पाण्डेयः, योगेन्द्र-रायः, हरदीप-सिंहः, प्रीति-कुमारी, अङ्किता, सुमन-कुमारी, कुन्दन-कुमारः इत्येतै: सह विद्यालयस्य सर्वे शिक्षकाः छात्राः छात्राश्च उपस्थिताः आसन्।

Hindusthan Samachar / Divya Ranjan