Enter your Email Address to subscribe to our newsletters
गोरखपुरम्, 22 जुलाईमासः (हि.स.)।भारतीयजनतापक्षस्य सङ्गठनात्मकाभियानस्य नवगतिप्रदानस्य उद्देशेन बुधवासरे मुख्यमन्त्री योगी आदित्यनाथः गोरखपुरस्थिते बाबागम्भीरनाथप्रेक्षागृहे आयोजितस्य प्रदेशव्यापिबूथाध्यक्षसम्मेलनस्य शुभारम्भम् अकरोत्। मुख्यमन्त्रिणः कार्यक्रमस्थले आगमनमात्रेण भारतीयजनतापक्षस्य पदाधिकारिभिः जनप्रतिनिधिभिः कार्यकर्तृभिः च तस्य भव्यस्वागतं कृतम्। सम्पूर्णे परिसरे महान् उत्साहः दृष्टः।
एतत् सम्मेलनं भारतीयजनतापक्षस्य प्रदेशव्यापिबूथसम्मेलनाभियानस्य औपचारिकः शुभारम्भः अस्ति। अनेन माध्यमेन पक्षः बूथस्तरपर्यन्तं सङ्गठनं अधिकं सशक्तं सक्रियं प्रभावी च कर्तुं व्यापकनीत्याः कार्यान्वयनं करिष्यति। सम्मेलने बूथाध्यक्षानां भूमिका सङ्गठनविस्तारः जनसम्पर्काभियानम् केन्द्रप्रदेशसर्वकारयोः जनकल्याणकारीयोजनानां सामान्यजनपर्यन्तं प्रापणम् आगामीनिर्वाचनानां सज्जता च इत्यादिविषयेषु विस्तृता चर्चा प्रचलति।
मुख्यमन्त्री योगी आदित्यनाथः सम्मेलने बूथकार्यकर्तॄन् भारतीयजनतापक्षस्य सङ्गठनस्य अत्यन्तमहत्त्वपूर्णशक्तिरूपेण निरूप्य उक्तवान् यत् पक्षस्य प्रत्येकस्य निर्वाचनसफलतायाः पृष्ठतः बूथस्तरे कार्यकर्तॄणाम् अथकपरिश्रमः समर्पणभावः जनसम्पर्कस्य च महत्त्वपूर्णा भूमिका वर्तते। तेन कार्यकर्तारः समाजस्य प्रत्येकवर्गपर्यन्तं गत्वा सर्वकारस्य उपलब्धीनां विकासकार्याणां च प्रभावीप्रचारार्थम् आहूताः।
तेन उक्तं यत् भारतीयजनतापक्षस्य सङ्गठनं सेवा सुशासनं राष्ट्रहितसङ्कल्पं च पुरस्कृत्य निरन्तरं कार्यं करोति। यावत् बूथः सुदृढः भविष्यति तावत् लोकतन्त्रम् अपि सुदृढं भविष्यति तथा सङ्गठनस्य मूलानि अपि अधिकानि गभीराणि भविष्यन्ति। मुख्यमन्त्री कार्यकर्तृभिः सह संवादं कृत्वा आगामीनिर्वाचनानि दृष्ट्वा प्रत्येकं बूथं अधिकं सक्रियं सुसङ्गठितं च कर्तुं आह्वानम् अकरोत्।
सम्मेलने भारतीयजनतापक्षस्य सांसदः रविकिशनशुक्लः प्रदेशोपाध्यक्षः धर्मेन्द्रसिंहः क्षेत्रीयाध्यक्षः विनोदरायः इत्यादयः अनेके जनप्रतिनिधयः पदाधिकारिणः बहुसंख्यकाः बूथाध्यक्षाः कार्यकर्तारः च उपस्थिताः आसन्। सर्वैः सङ्गठनं अधिकं सुदृढं कर्तुं तथा बूथस्तरपर्यन्तं पक्षस्य नीतयः सर्वकारस्य उपलब्धयः च प्रापयितुं पुनः सङ्कल्पः स्वीकृतः।
प्रदेशव्यापिबूथसम्मेलनाभियानस्य शुभारम्भेन सह भारतीयजनतापक्षेन आगामीनिर्वाचनसज्जतायाः सङ्गठनात्मकस्तरे नवगतिप्रदानस्य स्पष्टः सन्देशः प्रदत्तः। पक्षनेतृत्वस्य मतम् अस्ति यत् सुदृढं बूथसङ्गठनमेव निर्वाचनसफलतायाः दृढतमाधारशिला अस्ति यस्य बलेन भारतीयजनतापक्षः आगामीनिर्वाचनेषु अपि प्रभावीप्रदर्शनस्य लक्ष्यं पुरस्कृत्य अग्रे गच्छति। उल्लेखनीयम् अस्ति यत् भारतीयजनतापक्षः अद्य प्रत्येकस्मिन् विधानसभाक्षेत्रे बूथ-अध्यक्षसम्मेलनम् आयोजयति।
---------------
Hindusthan Samachar / Dheeraj Maithani