आगरा , 23 जुलाईमासः (हि.स.)।उत्तरप्रदेशस्य मुख्यमन्त्री योगी आदित्यनाथः पञ्चविंशति षड्विंशति च जुलाई इत्येतयोः दिनयोः द्विदिवसीयप्रवासाय आग्रानगरे स्थितिं करिष्यति। अस्मिन् प्रवासे सः प्रायः एकविंशत्यधिकचतुःशतकोटिधनराशेः विकासयोजनानां लोकार्पणं शिलान्यासं च करिष्यति, जनसभां सम्बोधयिष्यति, विश्वविद्यालये च नगदरहितचिकित्सायोजनायाः औपचारिकशुभारम्भं करिष्यति।

यद्यपि अद्यापि मुख्यमन्त्रिणः योगी आदित्यनाथस्य आग्राप्रवासस्य क्षणक्षणविवरणात्मकः कार्यक्रमः जनपदप्रशासनाय न प्राप्तः, तथापि तस्य प्रवासः निश्चितः इति मन्यमानैः सर्वाः व्यवस्थाः सम्पन्नाः क्रियन्ते।

प्रशासनेन क्रियमाणव्यवस्थानामाधारेण प्राप्तसूचनानुसारं मुख्यमन्त्री योगी आदित्यनाथः पञ्चविंशति जुलाई दिनाङ्के सायंकाले प्रायः चतुर्वादने वायुयानद्वारा सिविलविमानक्षेत्रं प्राप्स्यति। ततः उदग्रयानद्वारा फतेहाबादमार्गस्थितं टाटाक्षेत्रं गत्वा जनसभास्थलं प्राप्य जनसभां सम्बोधयिष्यति। वर्षाकालस्य दृष्ट्या विशेषव्यवस्थाः क्रियमाणाः सन्ति। जनसभास्थले प्रायः दशसहस्रजनानां समागमस्य सम्भावनां दृष्ट्वा आवश्यकव्यवस्था विधीयते। टाटाक्षेत्रस्य समीपे एव उदग्रविमानावतरणस्थलस्य निर्माणकार्यं अपि प्रचलति।

ततः पूर्वं मुख्यमन्त्री कार्यक्रमस्थले विविधसर्वकारीयोजनानामाधारितां विकासप्रदर्शनीम् अवलोकयिष्यति तथा योजनानां लाभार्थिभ्यः प्रशस्तिपत्राणि नवनियुक्ताभ्यः आङ्गनवाडीकार्यकर्त्रीभ्यः नियुक्तिपत्राणि च वितरिष्यति।

भारतीयजनतापक्षस्य जिलाध्यक्षः गिर्राजसिंहकुशवाहा अवदत् यत् जनसभायै टाटाक्षेत्रस्य चयनं कृतम् अस्ति। जनसभासम्बोधनानन्तरं मुख्यमन्त्री योगी आदित्यनाथः सर्किटहाउसं गत्वा जनप्रतिनिधिभिः पक्षपदाधिकाऱिभिः च सह उपवेशनं करिष्यति तथा आवश्यकनिर्देशान् प्रदास्यति। सः तस्मिन्नेव दिने आग्रानगरे रात्रिविश्रामं करिष्यति। अनन्तरदिने डा भीमराव अम्बेडकरविश्वविद्यालये पूर्वतनस्य आग्राविश्वविद्यालयस्य खन्दारीपरिसरे नगदरहितचिकित्सायोजनायाः औपचारिकशुभारम्भं करिष्यति।

डा भीमराव अम्बेडकरविश्वविद्यालयस्य कुलपतिः आशुकुमारी अवदत् यत् मुख्यमन्त्री योगी आदित्यनाथः षड्विंशति जुलाई दिनाङ्के अपराह्णे विश्वविद्यालयस्य खन्दारीपरिसरं प्राप्य शिवाजीमण्डपसभागारे अध्यापकानां चिकित्सार्थं नगदरहितचिकित्सायोजनायाः शुभारम्भं करिष्यति। विश्वविद्यालयेन सामाजिकदायित्वानां नवाचाराणां सामाजिकशैक्षिकोत्थानस्य च विषयेषु विश्वविद्यालयस्य शैक्षणिकविकासयात्रां उपलब्धीश्च प्रदर्शयन्ती प्रदर्शनी अपि आयोज्यते।

यद्यपि आग्राजनपदे षड्विंशति जुलाई दिनाङ्के अबुलउल्लाहदरगाहे उर्सोत्सवस्य निमित्तं स्थानीयावकाशः घोषितः अस्ति, तथापि मुख्यमन्त्रिणः प्रवासं दृष्ट्वा पुलिसप्रशासनयोः विश्वविद्यालयकर्मचारिणां च कृते अयं अवकाशः प्रभावी न भविष्यति।

मुख्यमन्त्रिणः योगिनः आदित्यनाथस्य प्रस्तावितप्रवासं दृष्ट्वा तस्य सुरक्षार्थं पर्याप्तपुलिसदलव्यवस्था क्रियते। खेरियासिविलविमानक्षेत्रात् आरभ्य जनसभास्थलं सर्किटहाउसः विश्वविद्यालयपरिसरः भ्रमणमार्गाश्च यावत् सर्वेषु संवेदनशीलस्थानेषु सुरक्षा नियुक्तिः विधीयते।

नगरनिगमः अपि वर्षाकालं दृष्ट्वा मुख्यमन्त्रिणः प्रस्तावितान् सम्भावितान् च भ्रमणमार्गान् तथा जलसञ्चयस्थलानि सम्यक् संस्करोति। नगरायुक्तस्य सन्तोषकुमारवैश्यस्य पर्यवेक्षणे मार्गेषु गर्तपूरणं मार्गसंस्कारः स्वच्छता विद्युद्व्यवस्थायाः सुदृढीकरणं च क्रियते। मार्गपार्श्वस्थितानां नमितविद्युत्स्तम्भानां सम्यक्स्थापनं, विभाजकपट्टिकानां मरम्मतकार्यं, वर्णलेपनं च आरब्धम् अस्ति।

---------------

Hindusthan Samachar / Dheeraj Maithani