लखनऊनगरम्, २३ जुलाईमासः (हि.स.)। उत्तरप्रदेशस्य उपमुख्यमन्त्री केशव-प्रसादमौर्यः गुरुवासरे अवदत् यत् प्रधानमन्त्री नरेन्द्रमोदी सदैव युवानः भारतस्य महत्तमां शक्तिं मन्यते। युवाशक्तिः राष्ट्रस्य बलम् अस्ति तथा विकसित-भारतस्य निर्माणे युवानः महत्त्वपूर्णां भूमिकां निर्वहन्ति इति तेन उक्तम्।

पत्रकारैः सह संवादे सः अवदत् यत् नीट-परीक्षायाः अनियमिततासम्बद्धेषु प्रकरणेषु केन्द्रसर्वकारेण त्वरितं गम्भीरतया च कार्यवाही कृता। अन्वेषणस्य आदेशः प्रदत्तः, अनेके अभियुक्ताश्च गृहीताः। दोषिणां विरुद्धं शीघ्रदण्डप्रदानार्थं फास्ट-ट्रैक-न्यायालय-व्यवस्थाऽपि कृता इति सः अवदत्।

केशवप्रसादमौर्यः उक्तवान् यत् देशस्य यूनां भविष्येन सह किमपि क्रीडनं कदापि न सह्यते। छात्रशक्तिः राष्ट्रशक्तिरस्ति, तेषां हितसंरक्षणाय केन्द्रप्रदेशसर्वकारौ पूर्णतया प्रतिबद्धौ स्तः।

सः समाजवादीपक्षं, कांग्रेसपक्षं, आम-आदमी-पक्षं च लक्ष्यीकृत्य अवदत् यत् विपक्षः छात्रानां यूनां च हितेषु न कार्यं करोति, अपितु तान् राजनैतिकलाभस्य साधनरूपेण उपयोक्तुम् इच्छति। मतभेदाः संसदि संवैधानिक-लोकतान्त्रिकरीत्या एव प्रस्तोतव्याः, न तु लोकतान्त्रिक-मर्यादानां उल्लङ्घनेन इति तेन प्रतिपादितम्।

उपमुख्यमन्त्री पुनः उक्तवान् यत् केन्द्र-प्रदेशसर्वकारौ पारदर्शीपरीक्षाव्यवस्थां प्रतिभाशालिनां छात्राणां भविष्यस्य संरक्षणं च सुनिश्चितीकर्तुं प्रतिबद्धौ स्तः। दोषिणां विरुद्धं कठोरतमा कार्यवाही भविष्यति तथा परिश्रमीणां छात्राणामधिकाराः सर्वथा संरक्ष्यन्ते।

Hindusthan Samachar / Divya Ranjan