Enter your Email Address to subscribe to our newsletters
नवदिल्ली, 23 जुलाईमासः (हि.स.)।लोकसभायाः प्रतिपक्षनेता राहुलगान्धी तथा आम आदमी पार्टी इत्यस्य राष्ट्रियसंयोजकः अरविन्दकेजरीवालः प्रधानमन्त्री नरेन्द्रमोदिना प्रश्नपत्रप्रस्रवणप्रकरणानां शीघ्रन्यायालयस्थापनविषये कृतस्य घोषणायाः आलोचनां कृतवन्तौ।
राहुलगान्धी गुरुवासरे सामाजिकमाध्यममञ्चे ‘एक्स’ इत्यत्र प्रकाशिते सन्देशे उक्तवान् यत् शिक्षामन्त्री धर्मेन्द्रप्रधानः तथा केन्द्रसर्वकारः संयुक्तरूपेण देशस्य यूनां भविष्यस्य महान् अहितं कृतवन्तौ। तेन उक्तं यत् सर्वकारेण शिक्षाव्यवस्थायाः अधःपतनं न केवलम् अनुमतम्, अपितु तस्य प्रोत्साहनमपि कृतम् तथा दोषिणः सर्वेऽपि संरक्षिताः।
तेन उक्तं यत् काङ्ग्रेसदलेन सर्वकारस्य पुरतः त्रयः प्रस्तावाः स्थापिताः। प्रथमः शिक्षामन्त्री धर्मेन्द्रप्रधानस्य पदात् अपसारणम्, द्वितीयः छात्रेभ्यः सार्वजनिकक्षमायाचनम्, तृतीयः छात्रेषु हिंसां कृतवतां विरुद्धं कठोरकार्यवाही।
आम आदमी पार्टी इत्यस्य राष्ट्रियसंयोजकः अरविन्दकेजरीवालः अपि सामाजिकमाध्यममञ्चे ‘एक्स’ इत्यत्र चलच्चित्रांशं प्रसार्य एतादृशं घोषणां छात्राणाम् आन्दोलनस्य केवलं लीपापोती इति निरूपितवान्। तेन उक्तं यत् सर्वकारेण शीघ्रन्यायालयस्थापनात् अधिकं प्रश्नपत्रप्रस्रवणस्य सम्पूर्णजालस्य तथा तस्मिन् संलग्नानां प्रभावशालिनां व्यक्तीनां विरुद्धं कठोरकार्यवाही करणीयम्।
अरविन्दकेजरीवालः अवदत् यत् प्रधानमन्त्री प्रातःकाले प्रश्नपत्रप्रस्रवणप्रकरणानां कृते शीघ्रन्यायालयस्थापनस्य घोषणां कृतवान्। परन्तु तादृशानि न्यायालयानि पूर्वमपि पोक्सोविधेः, बलात्कारप्रकरणानां च कृते स्थापितानि, तथापि तेषां प्रकरणानां समयोचितन्यायनिर्णयः न भवति।
तेन प्रश्नः कृतः यत् प्रधानमन्त्री शिक्षामन्त्री धर्मेन्द्रप्रधानस्य त्यागपत्रविषये मौनं किमर्थम् आसीत्। जन्तरमन्तरप्रदेशे प्रदर्शनरतैः छात्रैः सह अभवत् यत् व्यवहारः, तस्मिन् विषये सर्वकारः मौनमेव आसीत्, तत्र दोषिणां विरुद्धं किमपि कार्यवाही न कृता इति तेन दुःखं व्यक्तम्।
अरविन्दकेजरीवालेन उक्तं यत् प्रतिवर्षं प्रश्नपत्रप्रस्रवणस्य घटनाः दृश्यन्ते, किन्तु प्रधानमन्त्री आगामिवर्षे नीट् परीक्षायाः प्रश्नपत्रप्रस्रवणं न भविष्यतीति सुनिश्चितीकरणार्थं किमपि ठोसोपायं न उद्घोषितवान्।
विपक्षेण शिक्षामन्त्री धर्मेन्द्रप्रधानस्य त्यागपत्रं छात्रेषु हिंसां कृतवतां विरुद्धं कठोरकार्यवाही च कर्तव्या इति पुनरपि आग्रहः कृतः।
---------------
Hindusthan Samachar / Dheeraj Maithani