लखनऊनगरम्, २३ जुलाईमासः (हि.स.)। राष्ट्रीय-लोकदलस्य प्रदेशमुख्यालये नवनियुक्तस्य कार्यकारी-प्रदेशाध्यक्षस्य अनुपममिश्रस्य प्रथमागमनावसरे भव्यः स्वागतसमारोहः आयोजितः। कार्यक्रमस्य प्रारम्भात् पूर्वं भारतरत्न-पूर्वप्रधानमन्त्रिणः चौधरीचरणसिंहस्य प्रतिमायै माल्यार्पणं कृत्वा श्रद्धाञ्जलिः समर्पिता। ततः पश्चात् जयन्तचौधरीणा कार्यकारी-प्रदेशाध्यक्षत्वे नियुक्तस्य अनुपममिश्रस्य पुष्पमालाभिः, पुष्पवृष्ट्या घोषैश्च हार्दिकस्वागतं कृतम्।

स्वसम्बोधने अनुपममिश्रः अवदत् यत् एतत् पदं केवलं सम्मानं न, अपितु कार्यकर्तॄणां विश्वासस्य दायित्वमस्ति। संगठनस्य मण्डलात् बूथस्तरपर्यन्तं सुदृढीकरणं, वरिष्ठकार्यकर्तॄणाम् अनुभवस्य यूनां उत्साहस्य च समन्वयः, तथा कृषकाणां, यूनां, महिलानां च पक्षेण सह अधिकं सम्पर्कः भविष्यतीति सः उक्तवान्।

प्रदेश-पत्रकार-प्रभारी मयङ्कत्रिवेदी अवदत् यत् एषः समारोहः राष्ट्रिय-लोकदलस्य विचारधारायाः चौधरीचरण-सिंहं प्रति सम्मानस्य च प्रतीकः अस्ति। अन्ये वक्तारोऽपि अनुपममिश्रस्य नेतृत्वे संगठनस्य अधिकं सुदृढीकरणस्य विश्वासं व्यक्तवन्तः।

अस्मिन्नवसरे प्रदेशस्य विविधभागेभ्यः आगताः बहुसंख्यकाः पदाधिकारीण:, जनपदाध्यक्षाः, विभिन्नप्रकोष्ठानां प्रतिनिधयः, युवा-कार्यकर्तारः समर्थकाश्च उपस्थिताः आसन्। सम्पूर्णकार्यक्रमस्य अवधौ प्रदेशकार्यालयः “जयन्तचौधरी जिन्दाबाद” तथा “राष्ट्रिय-लोकदल जिन्दाबाद” इति घोषैः गुञ्जितः आसीत्।

अस्मिन्नवसरे रमावतीतिवारी, प्रीति-श्रीवास्तव:, अङ्कुरसक्सेनः, इजहार-अली, बी. एल. प्रेमी, प्रोफेशनल-मञ्चस्य प्रदेशाध्यक्षः अम्बुजपटेलः, श्रम-प्रकोष्ठस्य प्रदेशाध्यक्षः महेशपालधनगरः, अवध-क्षेत्रस्य क्षेत्रीयाध्यक्षः चौधरीरामसिंहपटेलः, तराई-क्षेत्रस्य अध्यक्षः पी. के. पाठकः, मायादेवी इत्यादयः स्वागतसमारोहे उपस्थिताः आसन्।

Hindusthan Samachar / Divya Ranjan