रायपुरम्, 24 जुलाईमासः (हि.स.)। छत्तीसगढं देशस्य प्रमुखचलच्चित्रनिर्माणकेन्द्ररूपेण विकसितुं कृतस्य महत्त्वपूर्णप्रयत्नस्य अन्तर्गतं छत्तीसगढपर्यटनमण्डले शुक्रवासरे चित्रोत्पला चलचित्रनगरीविकासविषये महत्त्वपूर्णम् उपवेशनम् आयोजितम्।

रायपुरनगरे आयोजिते अस्मिन् उपवेशने छत्तीसगढपर्यटनमण्डलस्य प्रबन्धनिर्देशकः विवेक आचार्य भारतभाग्यविधाता चलचित्रस्य निर्देशकः मनोज तापडिया चलचित्रनिर्माता आदि शर्मा च सौजन्यभेटीं कृत्वा राज्ये विकसितव्यायाः चित्रोत्पला चलचित्रनगर्याः अवधारणा तस्याः सम्भावनाः भाविकार्ययोजना च विषये विस्तरेण चर्चाम् अकुर्वन्।

उपवेशने अस्य विषये विशेषरूपेण बलं दत्तं यत् छत्तीसगढस्य अनुपमा प्राकृतिकसौन्दर्यसम्पदा समृद्धा सांस्कृतिकपरम्परा ऐतिहासिकधरोहराः जलप्रपाताः वनप्रदेशाः जनजातीयसंस्कृतिः विविधाः प्राकृतिकचित्रग्राह्यस्थानानि च राज्यं चलचित्रनिर्माणाय अत्यन्तम् उपयुक्तं कुर्वन्ति। एतासां विशेषतानां राष्ट्रियान्तरराष्ट्रीयचलच्चित्रनिर्मातृणां पुरतः प्रभावकरूपेण प्रस्तुतीकरणेन राज्यं चलचित्रांकनस्य आकर्षकगन्तव्यरूपेण स्थापयितुं रणनीतेः विषये विचारविमर्शः अभवत्।

चर्चाकाले चित्रोत्पला चलचित्रनगरीं आधुनिकसुविधासमन्वितम् एकं समग्रचलच्चित्रपरिसररूपेण विकसितुं आवश्यकता प्रतिपादिता यत्र चलचित्रनिर्माणसम्बद्धाः सर्वाः आवश्यकव्यवस्थाः उपलब्धाः स्युः। तदतिरिक्तं चलचित्रपर्यटनस्य संवर्धनं राज्ये चलचित्रनिर्माणगतिविधीनां विस्तारः अस्मिन् क्षेत्रे निजीसंस्थागतसहकार्यस्य सम्भावनाश्च विषये अपि विस्तरेण मन्थनम् अभवत्।

प्रबन्धनिर्देशकः विवेक आचार्य अवदत् यत् चित्रोत्पला चलचित्रनगर्याः विकासः छत्तीसगढस्य चलचित्रपर्यटनक्षेत्रयोः कृते मीलशिलारूपेण सिद्धः भविष्यति। अनेन राज्यस्य राष्ट्रियस्तरे नूतना परिचितिः भविष्यति चलचित्रनिर्माणगतिविधयः वेगं प्राप्स्यन्ति तथा स्थानीयकलाकाराणां प्राविधिकविशेषज्ञानां सर्जनशीलयुवानां चलचित्रसम्बद्धानां अन्येषां व्यावसायिकानां कृते रोजगारकौशलविकासयोः नूतनाः अवसराः सृज्यन्ते। तेन उक्तं यत् चलचित्रोद्योगस्य विकासेन पर्यटनम् आतिथ्यसेवा परिवहनम् हस्तशिल्पम् स्थानीयव्यवसायाश्च व्यापकं लाभं प्राप्स्यन्ति येन प्रदेशस्य अर्थव्यवस्थायाः नूतना गतिः भविष्यति।

उपवेशने अस्मिन् विषये अपि सहमतिः अभवत् यत् छत्तीसगढं उदयमानचलच्चित्रनिर्माणकेन्द्ररूपेण स्थापयितुं चलचित्रोद्योगसम्बद्धैः विशेषज्ञैः निर्मातृभिः निर्देशकैश्च सह निरन्तरसंवादः सहकार्यं च संवर्धयिष्यते। राज्यस्य प्राकृतिकसम्पदः सांस्कृतिकवैविध्यस्य विकसितायाः आधुनिकचलच्चित्रावसंरचनायाश्च समन्वयेन छत्तीसगढं राष्ट्रियान्तरराष्ट्रीयचलच्चित्रनिर्माणस्य प्रियगन्तव्यरूपेण स्थापयितुं दृढप्रयत्नाः क्रियन्ते।

उपवेशने चित्रोत्पला चलचित्रनगर्याः विकासः चलचित्रपर्यटनस्य विस्तारः तथा भविष्ये चलचित्रनिर्माणपर्यटनसंवर्धनक्षेत्रयोः पारस्परिकसहकार्यस्य व्यापकसम्भावनाः विषये सहमतिः व्यक्ता।

---------------

Hindusthan Samachar / Dheeraj Maithani