Enter your Email Address to subscribe to our newsletters
शिमला, 24 जुलाईमासः (हि.स.)।हिमाचलप्रदेशसंवर्गस्य भारतीयप्रशासनिकसेवायाः (आईएएस) अधिकारिणां केन्द्रसर्वकारे महत्त्वपूर्णदायित्वप्राप्तेः क्रमः निरन्तरं प्रवर्तते। अधुना २०११ तमसंवत्सरस्य संवर्गीयः आईएएस-अधिकारी विवेकभाटियः केन्द्रीयप्रतिनियुक्त्याधारेण नवीदिल्लीस्थिते युवाकार्यक्रमविभागे निदेशकपदे नियुक्तः। कार्मिकप्रशिक्षणविभागेन (डीओपीटी) केन्द्रीयकार्मिकनियोजनयोजनान्तर्गतं तस्य नियुक्तेः आदेशाः प्रसारिताः। अनेन सह केन्द्रीयप्रतिनियुक्तौ कार्यरतानां हिमाचलप्रदेशसंवर्गीय-आईएएस-अधिकारिणां संख्या पञ्चविंशतिः भविष्यति।
डीओपीटी-विभागस्य आदेशानुसारं विवेकभाटियस्य नियुक्तिः पदभारग्रहणदिनाङ्कात् आरभ्य पञ्चवर्षपर्यन्तं वा अग्रिमादेशपर्यन्तं वा, यद् पूर्वं भवति, प्रभावी भविष्यति।
विभागेन हिमाचलप्रदेशस्य मुख्यसचिवाय निर्देशः प्रदत्तः यत् विवेकभाटियः वर्तमानदायित्वेभ्यः अविलम्बं कार्यमुक्तः क्रियताम्, येन सः नवीनदायित्वं स्वीकर्तुं शक्नुयात्। आदेशे अपि निर्दिष्टं यत् नियुक्तिपत्रप्रसारणदिनाङ्कात् त्रिसप्ताहाभ्यन्तरे तेन नवीनपदे पदभारः ग्रहीतव्यः। यदि निर्धारितावधौ पदभारग्रहणं न भवति, तर्हि केन्द्रीयकार्मिकनियोजनयोजनायाः प्रावधानानुसारं तस्य डिबार-प्रक्रिया प्रारभ्येत।
विवेकभाटियः सम्प्रति मुख्यमन्त्रिणः सुखविन्दरसिंहसुक्खोः प्रधाननिजसचिवरूपेण कार्यरतः अस्ति। अर्वाचीने काले राज्यसर्वकारेण तस्मै उद्योगविभागस्य निदेशकपदस्य अतिरिक्तदायित्वमपि प्रदत्तम्। अस्य पूर्वं सः लाहुल-स्पीति, चम्बा तथा बिलासपुरजनपदेषु उपायुक्तरूपेण सेवां प्रदत्तवान्। सः मूलतः हमीरपुरजनपदस्य निवासी अस्ति तथा प्रशासकीयकार्यकुशलतायाः कारणेन अनुभवीनामधिकारिणां मध्ये परिगण्यते।
अर्वाचीनेषु कालेषु हिमाचलप्रदेशसंवर्गस्य अनेकेभ्यः आईएएस-अधिकारिभ्यः केन्द्रसर्वकारे महत्त्वपूर्णदायित्वानि प्रदत्तानि। पूर्वमेव आईएएस-अधिकारी निपुणजिन्दलः आर्थिककार्यविभागे उपसचिवपदे तथा आईएएस-अधिकारी राकेशकुमारप्रजापतिः उद्योग-अन्तःव्यापारसंवर्धनविभागे (डीपीआईआईटी) निदेशकपदे नियुक्तौ स्तः। विवेकभाटियस्य नियुक्त्या केन्द्रसर्वकारे हिमाचलप्रदेशसंवर्गीयाधिकारिणां प्रतिनिधित्वं अधिकं सुदृढं भविष्यति।
हिमाचलप्रदेशे भारतीयप्रशासनिकसेवायाः स्वीकृतसंवर्गे त्रिपञ्चाशदधिकशतं (१५३) पदानि सन्ति। विवेकभाटियस्य केन्द्रीयप्रतिनियुक्तौ गमनानन्तरं केन्द्रसर्वकारे कार्यरतानां हिमाचलप्रदेशसंवर्गीय-आईएएस-अधिकारिणां संख्या पञ्चविंशतिः भविष्यति।
---------------
Hindusthan Samachar / Dheeraj Maithani