विकसितभारतस्य निर्माणाय युवानः क्रीडासंस्कृतिं सुदृढां कुर्वन्तु : राज्यपालः

नलबारीनगरम् (असमप्रदेशः), २४ जुलाईमासः (हि.स.)। असमराज्यस्य राज्यपालः लक्ष्मणप्रसाद-आचार्यः शुक्रवासरे नलबारी-क्रीडाङ्गणे सरि-हाथली-स्थले आयोजितायाः ४७तम्याः राज्यस्तरीय-वरिष्ठ-कनिष्ठ-एथलेटिक्स-प्रतियोगिता–२०२६ इत्यस्याः उद्घाटनम् अकरोत्। अस्मिन् अवसरे सः युवभ्यः क्रीडासंस्कृतेः सुदृढीकरणाय आह्वानं कृत्वा उक्तवान् यत् क्रीडा केवलं पदकप्राप्तेः साधनं नास्ति, अपितु चरित्रनिर्माणस्य, अनुशासनस्य, सहिष्णुतायाः तथा राष्ट्रनिर्माणस्य सशक्तः आधारः अस्ति।

असम-एथलेटिक्स-सङ्घस्य उपक्रमेण नलबारी-जनपदप्रशासनस्य तथा नलबारी-जनपद-क्रीडासङ्घस्य सहयोगेन आयोजितायां अस्यां प्रतियोगितायां राज्यस्य विभिन्नभागेभ्यः प्रायः १,२०० क्रीडकाः सहभागं कुर्वन्ति।

उद्घाटनसमारोहे सम्बोधनं कुर्वन् राज्यपालः अवदत् यत् एतावता विशालसंख्यया क्रीडकाणां सहभागिता असमप्रदेशे विकसितायाः क्रीडासंस्कृतेः प्रमाणम् अस्ति। सः अवदत् यत् २०४७ तमवर्षपर्यन्तं ‘विकसितभारतम्’ इति लक्ष्यस्य प्राप्तौ क्रीडाणां महत्त्वपूर्णा भूमिका भविष्यति। एतादृश्यः प्रतियोगिताः भविष्यस्य प्रतिभाशालिनां क्रीडकाणां परिचयाय तथा तान् राष्ट्रीय-अन्ताराष्ट्रिय-स्तरस्य प्रतियोगिताभ्यः सज्जीकर्तुं प्रभावीमञ्चं प्रददति।

राज्यपालः अवदत् यत् असमभूमिः देशाय अनेकान् उत्कृष्टक्रीडकान् प्रदत्तवती, ये स्वसंघर्षेण, परिश्रमेण, समर्पणेन च राज्यस्य राष्ट्रस्य च गौरवं वर्धितवन्तः। सः एथलेटिक्स-क्षेत्रस्य भोगेश्वर-बरुवा, हिमा-दासः, अमलान-बोरगोहाईं, मौमिता-मण्डलः, मुक्कायुद्धक्रीडकौ लवलीना-बोरगोहाईं, शिव-थापा तथा धनुर्विद्यायाः क्रीडकः जयन्त-तालुकदारः इत्येषां उल्लेखं कृत्वा अवदत् यत् तेषां उपलब्धयः युव-क्रीडकाणां प्रेरणास्रोतांसि सन्ति।

आचार्यः अवदत् यत् एथलेटिक्स-क्रीडकाणां मध्ये सहिष्णुता, आत्मानुशासनम्, धैर्यम्, प्रतिबद्धता च इत्यादीन् गुणान् विकसति, ये कस्यापि क्रीडकस्य सफलतायाः दृढाधाराः भवन्ति। सः प्रतिभागिनः क्रीडाभावनायाः, निष्पक्षतायाः, प्रामाणिकतायाश्च उच्चतम-मानकानां पालनाय प्रेरितवान् तथा अवदत् यत् पदकानि सफलतायाः प्रतीकानि भवितुमर्हन्ति, किन्तु अनुशासनं दृढसंकल्पश्च एव उत्तरदायिनः नागरिकस्य निर्माणं कुर्वन्ति।

राज्यपालः प्रधानमन्त्रिणः नरेन्द्रमोदिनः क्रीडासम्बद्धानां ‘खेलो इण्डिया’, ‘फिट् इण्डिया मूवमेण्ट्’ तथा ‘टार्गेट् ओलम्पिक पोडियम स्कीम’ इत्येतेषां प्रयत्नानाम् उल्लेखं कृत्वा अवदत् यत् एताभिः योजनाभिः देशस्य क्रीडाक्षेत्रे व्यापकं परिवर्तनम् अभवत्। सः मुख्यमन्त्री डॉ. हिमन्त-बिस्व-सरमा इत्यस्यापि प्रशंसां कृत्वा अवदत् यत् तस्य प्रयत्नेन असमप्रदेशे विश्वस्तरीया क्रीडामूलसंरचना विकसिता भवति तथा आधारस्तरे क्रीडाप्रतिभाः प्रोत्साह्यन्ते। अस्य सकारात्मकः परिणामः एषः यत् राज्यस्य क्रीडकाः राष्ट्रीय-अन्ताराष्ट्रिय-प्रतियोगितासु निरन्तरं श्रेष्ठं प्रदर्शनं कुर्वन्ति।

सः विश्वासं प्रकटितवान् यत् अस्यां प्रतियोगितायां सहभागं कुर्वन्तः अनेके क्रीडकाः भविष्ये असमप्रदेशस्य भारतस्य च गौरवं वर्धयिष्यन्ति। सः अवदत् यत् क्रीडासु कृतः निवेशः वस्तुतः राष्ट्रस्य भविष्ये निवेशः एव अस्ति, यः स्वस्थस्य, आत्मविश्वासयुक्तस्य, सशक्तस्य युवा-वंशस्य निर्माणे महत्त्वपूर्णां भूमिकां निर्वहति।

अस्मिन् कार्यक्रमे असमसर्वकारस्य क्रीडा-युवकल्याणमन्त्री बिस्वजीत-दैमारी, वित्तमन्त्री जयन्त-मल्ला-बरुवा, विधायकः ऋतुबरण-शर्मा, नलबारी-आयुक्तः निबेदन-दास-पटवारी, नलबारी-जनपदस्य वरिष्ठ-आरक्षक-अधीक्षकः बिबेकानन्द-दासः तथा अन्ये बहवः गणमान्यजनाः उपस्थिताः आसन्।

हिन्दुस्थान समाचार / Divya Ranjan