– मुख्यमन्त्री पन्ना-नगरे गुरुपूर्णिमा-महोत्सवे सहभागं कृत्वा सन्तेभ्यः आशीर्वादम् अलभत

भोपालनगरम्, २४ जुलाईमासः (हि.स.)। मध्यप्रदेशस्य मुख्यमन्त्री डॉ. मोहन-यादवः उक्तवान् यत् अलौकिकलोके सन्तानां वाण्या श्रेष्ठजीवनस्य मार्गः प्रशस्यते। अस्माकं जीवने संस्काराणां उपस्थितिरपि अत्यावश्यकी अस्ति। देशस्य सर्वे उत्सवाः पर्वाणि च सार्थकसन्देशेन मानव-कल्याणस्य सन्देशं वहन्ति।

मुख्यमन्त्री डॉ. यादवः शुक्रवासरे पन्ना-प्रवासस्य समये श्री-जुगलकिशोर-मन्दिरे आयोजिते गुरुपूर्णिमा-महोत्सवे उपस्थितान् सम्बोधयन् एतानि अवदत्। अस्मिन् अवसरे सः श्रीधाम-वृन्दावनतः समागतस्य सन्तस्य श्रीश्री १०८ महन्त-स्वामी किशोरदास-महाराजस्य आशी-र्वादम् अलभत। सः विभिन्नस्थानेभ्यः समागतान् भक्तजनान् अभिवाद्य सन्तानां सान्निध्ये प्रेरणाप्रदानं प्रवचनम् अनुसर्तुं प्रेरितवान्।

मुख्यमन्त्री डॉ. यादवः अवदत् यत् पन्ना-नगरस्य पवित्रा धरा वृन्दावनस्य लघुरूपम् अस्ति। तथैव बुन्देलखण्डप्रदेशे ओरछा अयोध्यायाः स्वरूपेण प्रसिद्धा अस्ति। सः गौमातुः सेवां कर्तुं तथा विभिन्नधर्माणां सर्वाणि पर्वाणि उत्साहेन आचरितुं प्रेरितवान्। अपि च विक्रमसंवत्सरस्य आयोजनं, भगवतः श्रीरामस्य श्रीकृष्णस्य च सम्बन्धितस्थानानां तीर्थरूपेण विकासं कर्तुम् अपि उक्तवान्। अधुना प्रदेशस्य सीएम-राइज-विद्यालयाः सांदीपनि-विद्यालयः इति नाम्ना सञ्चाल्यन्ते। प्रदेशस्य सर्वेषु नगरीयनिकायेषु गीताभवनस्य तथा ग्रन्थालयस्य स्थापना भविष्यति। एतदतिरिक्तं प्रदेशसर्वकारः वृन्दावनग्राम-निर्माणस्य अवधारणां शीघ्रतया साकारयितुं प्रयतते। अस्माभिः धर्मार्थात् परमार्थस्य मार्गे अग्रे गन्तव्यम्।

सर्वेषां धर्माणां कृते प्रदेशे एकः एव नियमः

मुख्यमन्त्री डॉ. यादवः अवदत् यत् अधुना प्रदेशे सर्वेषां धर्माणां कृते एकः एव नियमः भविष्यति। सर्वधर्मसमभावस्य माध्यमेन प्रदेशः प्रगतिपथे अग्रे गच्छति। सः अपि अवदत् यत् पन्ना-नगरे प्रतिवर्षं त्रिदिवसीयः कथा-महोत्सवः आयोजितः भविष्यति तथा पन्ना-नगरे संस्कृत-विद्यालयः अपि उद्घाटितः भविष्यति।

पन्ना-विधानसभाक्षेत्रस्य विधायकः तथा पूर्वमन्त्री बृजेन्द्र-प्रताप-सिंहः अवदत् यत् पन्ना-नगरे सन्तानां समागमः महत् सौभाग्यम् अस्ति। सः अपि अवदत् यत् मुख्यमन्त्रिणः डॉ. यादवस्य नेतृत्वे प्रदेशे सांस्कृतिकधरोहराणां संरक्षणकार्यं सम्यक् प्रचलति।

अस्मिन् अवसरे सांसदः विष्णुदत्त-शर्मा, विधायकः अरविन्द-पटेरिया, अन्ये जनप्रतिनिधयः, बहवः नगरवासिनः तथा भक्तजनाश्च उपस्थिताः आसन्।

मुख्यमन्त्री श्री-जुगलकिशोर-भगवतः दर्शनम् अकरोत्

मुख्यमन्त्री डॉ. यादवः श्री-जुगलकिशोर-मन्दिरं गत्वा भगवतः श्री-जुगलकिशोरस्य दर्शनं कृत्वा आशीर्वादम् अलभत। सः विधिपूर्वकं पूजनार्चनं कृत्वा प्रदेशवासिनां सुख-समृद्ध्योः कृते प्रार्थनाम् अकरोत्।

Hindusthan Samachar / Divya Ranjan