नवदेहली, जुलाईमासः २४ (हि.स.)। केन्द्रीयवित्तमन्त्री निर्मलासीतारमणः शुक्रवासरे आयकर-अधिकारिभ्यः सत्यनिष्ठेभ्यः करदातृभ्यः सुविधाः प्रदातुं, करापवञ्चनस्य प्रकरणेषु च कठोरकार्यवाहीं कर्तुम् आह्वानम् अकरोत्।सा नवदेहल्यां १६७-तमस्य आयकर-दिवसस्य उपलक्ष्ये आयोजिते कार्यक्रमे सम्बोधनं कुर्वती अवदत्— “करनिर्धारणे निश्चितता अर्थव्यवस्थायै अत्यावश्यकी अस्ति।” ततः पूर्वं सा विशिष्टातिथिरूपेण पारम्परिक-दीपप्रज्वालनं कृतवती, विभागस्य अधिकारिभिश्च सरस्वती-वन्दना प्रस्तुताभूत्।

स्वीये सम्बोधने वित्तमन्त्री आयकर-अधिकारिणः संवेदनशीलाः भवितुम् उपदिदेश। सा अवदत् यत् ज्ञात्वा करापवञ्चनं कुर्वतां जनानां तथा अज्ञानवशात् त्रुटिं कुर्वतां जनानां मध्ये स्पष्टः भेदः करणीयः। तया आयकर-विभागस्य कृते पञ्च प्राथमिकताः अपि निर्दिष्टाः— अभिज्ञानम्, प्रतिक्रिया, निवारणम्, आत्ममन्थनम् तथा सुधारः।

सा अधिकारिणः प्रति उक्तवती - “करविधिना प्रदत्तानाम् अधिकाराणां विनयेन उपयोगः क्रियताम् तथा कार्यप्रणाली अधिका सुचारु-प्रभावी च क्रियताम्।” गतवर्षे स्वया प्रतिपादितं स्मारितवती यत् आधुनिकस्य करप्रशासनस्य कृते केवलम् आधुनिकविधयः प्रौद्योगिकी च न पर्याप्ताः, अपितु आधुनिककार्यालयाः, उत्कृष्ट-सुविधायुक्ताः कार्यालयाः, प्रेरितः कार्यबलश्च समानरूपेण आवश्यकाः सन्ति।सीतारमणः अवदत् यत् विभागेन गतवर्षे एतेषां प्राथमिकतानां पूर्त्यर्थं निरन्तरं प्रगतिः कृता। मुम्बई, देहली, बेंगलूरु, चेन्नै, नोएडा इत्यादिषु स्थानेषु नूतन-कार्यालय-समुच्चयानां निर्माणे आधुनिकीकरण-परियोजनासु च उल्लेखनीया प्रगतिः अभवत्। अधिकारिणां कर्मचारिणां च कृते आवासीय-कल्याणसुविधासु अपि निरन्तरं निवेशः क्रियते।

सा अपि अवदत् यत् द्वाभ्यां दिवसाभ्यां परं मुम्बई-नगरे नूतनस्य ‘आयकर-सिन्धु’ कार्यालय-समुच्चयस्य उद्घाटनं करिष्यामि, यत् विश्वस्तरीय-अवसंरचना-निर्माणस्य दिशि महत्त्वपूर्णः मीलपाषाणः भविष्यति। विश्वस्तरीय-अवसंरचनायां निवेशेन सह अधिकारिणां ज्ञानम्, कौशलम्, नेतृत्वक्षमताश्च विकसितुं समानप्रतिबद्धतया निवेशः करणीयः।

अन्ते वित्तमन्त्री उक्तवती यत् कृत्रिमबुद्धिमत्ता, दत्तांश-विश्लेषणम्, न्याय-वैज्ञानिक-लेखाङ्कनम्, अन्ताराष्ट्रिय-कराधानम्, स्थानान्तरण-मूल्यनिर्धारणम्, डिजिटल-सम्पत्तयः, साइबर-सुरक्षा तथा उन्नत-वित्तीय-अन्वेषणम् इत्यादिषु विषयेषु विशेष-प्रशिक्षणं प्रोत्साहनीयम्। तया एतदपि प्रतिपादितं यत् अधिकारिभ्यः नेतृत्व-विकासस्य नियमितं व्यवस्थितं प्रशिक्षणम् अपि प्रदातव्यम्।

Hindusthan Samachar / Divya Ranjan