बालाघाटः, 25 जुलाईमासः (हि.स.)।

मध्यप्रदेशसर्वकारस्य महत्त्वाकाङ्क्षिण्याः मुख्यमन्त्रीतीर्थदर्शनयोजनायाः अन्तर्गतं बालाघाटजनपदस्य चयनिताः १९६ तीर्थयात्रिणः अद्य शनिवासरे विशेषरेलयानद्वारा भगवान् श्रीकृष्णस्य नगरीं मथुरावृन्दावनं प्रति प्रस्थास्यन्ति। एतत् विशेषरेलयानं बालाघाटनगरस्य रेलस्थानकात् प्रातः ११:३० वादने प्रस्थास्यति।

जिल्लाप्रशासनेन प्रदत्तसूचनानुसारं अस्यां यात्रायां बालाघाटजनपदस्य अतिरिक्तं जबलपुरकटनीजनपदयोः चयनिततीर्थयात्रिणोऽपि सहभागिनः भविष्यन्ति। तीर्थयात्रायाः सर्वाः आवश्यकव्यवस्थाः सम्पन्नाः सन्ति। चयनितयात्रिणः प्रातः १०:०० वादनात् पूर्वं स्वस्वसाधनैः बालाघाटरेलस्थानकं प्राप्नुयुः, यतः तेषां दस्तावेजसत्यापनं, पञ्जीकरणम् तथा अन्याः औपचारिकक्रियाः समये सम्पन्नाः भविष्यन्ति।

विशेषरेलयानं बालाघाटात् प्रस्थाय नैनपुरं, जबलपुरं, कटनीनगरं च अतिक्रम्य मथुरावृन्दावनं प्राप्स्यति। यात्राकाले तीर्थयात्रिणां कृते सर्वाः आवश्यकसुविधाः विनियोजिताः सन्ति, येन ते सुरक्षितां सुगमां च यात्रामनुभवितुं शक्नुयुः। योजनायाः अन्तर्गतं श्रद्धालवः मथुरावृन्दावनयोः प्रमुखधार्मिकस्थलानां दर्शनं करिष्यन्ति। यात्रा समाप्तेः अनन्तरं एतदेव विशेषरेलयानं जुलै-मासस्य २८ तमे दिने अपराह्णे ३:०० वादने बालाघाटरेलस्थानकं प्रत्यागमिष्यति।

जिल्लाप्रशासनेन सर्वेभ्यः चयनिततीर्थयात्रिभ्यः निर्धारितसमयस्य पालनं, यात्राकाले आवश्यकपरिचयपत्राणि अन्यानि आवश्यकदस्तावेजानि च सह धारयितुम् अनुरोधः कृतः। तथा च प्रशासनेन प्रदत्तनिर्देशानां पालनमपि कर्तव्यमिति अपीलिता, येन यात्रा सुव्यवस्थितरूपेण निर्विघ्नं सम्पन्ना भवेत्।

उल्लेखनीयं यत् मुख्यमन्त्रीतीर्थदर्शनयोजनायाः माध्यमेन मध्यप्रदेशसरकारः वरिष्ठनागरिकेभ्यः पात्रश्रद्धालुभ्यश्च देशस्य प्रमुखतीर्थस्थानानां दर्शनस्य अवसरं प्रददाति। अस्याः योजनायाः अन्तर्गतं यात्रा, निवासः, भोजनम् तथा अन्याः आवश्यकव्यवस्थाः शासनद्वारा सुनिश्चिताः भवन्ति, येन श्रद्धालवः आर्थिकभारं विना श्रद्धाभक्तिपूर्वकं तीर्थयात्राफलं प्राप्नुयुः।

---------------

Hindusthan Samachar / Dheeraj Maithani