नवदेहली, २५ जुलाईमासः (हि.स.)। केन्द्रीय-आयुष-मन्त्री स्वास्थ्य-परिवार-कल्याण-राज्यमन्त्री च प्रतापराव-जाधवः सन्त-गजानन-महाराजस्य १५०तम-प्राकट्य-दिवसोपलक्ष्ये १५०-रूप्यकाणां स्मारक-मुद्रायाः तथा स्मारक-डाक-चिटिकाया: निर्गमनार्थं केन्द्रीय-सर्वकारम् आग्रहं कृतवान्।

प्रतापराव-जाधवः अस्मिन् विषये शनिवासरे केन्द्रीय-वित्त-निर्माणी-कार्य-मन्त्री निर्मला-सीतारमण:, केन्द्रीय-सञ्चार-मन्त्री ज्योतिरादित्य-सिन्धियाम् तथा केन्द्रीय-संस्कृति-पर्यटन-मन्त्री गजेन्द्रसिंह-शेखावतम् पत्रं प्रेष्य प्रस्तावस्य विषये सकारात्मक-विचारं कर्तुं सम्बन्धित-अधिकारिभ्यश्च आवश्यक-निर्देशान् दातुम् अनुरोधं कृतवान्।

पत्रे सः अवदत् यत् सन्त-गजानन-महाराजस्य जन्म १८७८ तमस्य वर्षस्य फरवरी-मासे महाराष्ट्रस्य बुलढाणा-जनपदस्य शेगांव-नगरे अभवत्। ततः प्रभृति शेगांव देशस्य प्रमुख-तीर्थस्थानेषु परिगणितम् अस्ति, यत्र देश-विदेशेभ्यः लक्षशः श्रद्धालवः दर्शनार्थम् आगच्छन्ति।

सः उक्तवान् यत् सन्त-गजानन-महाराजस्य जीवनम्, तेषां आध्यात्मिक-सन्देशाश्च—भक्तिः, करुणा, निःस्वार्थ-सेवा, मानव-कल्याणं च—अद्यापि कोटिशः जनान् प्रेरयन्ति। तेषां जीवनस्य उपदेशानां च वर्णनं प्रसिद्धे धार्मिक-ग्रन्थे ‘श्रीगजानन-विजयः’ इति नाम्नि लभ्यते, यं श्रद्धालवः महता श्रद्धया पठन्ति।

जाधवः शेगांवस्थितस्य श्रीगजानन-महाराज-संस्थानस्य शिक्षायां, स्वास्थ्ये, ग्राम-विकासे, सामाजिक-कल्याणे, मानवीय-सेवायां च क्रियमाणानां उल्लेखनीय-कार्याणामपि उल्लेखं कृतवान्। सः अवदत् यत् स्मारक-मुद्रायाः स्मारक-डाक-चिटिकाया: च निर्गमनं सन्त-गजानन-महाराजस्य आध्यात्मिक-सांस्कृतिक-परम्परायाः राष्ट्रीय-स्तरे सम्मानस्य दिशि महत्त्वपूर्णं पदम् भविष्यति।

सः पुनरुक्तवान् यत् २५ फरवरी २०२६ दिनाङ्के राष्ट्रपतिः आयुष-मन्त्रालयस्य तत्त्वावधाने आयोजितस्य राष्ट्रिय-आरोग्य-मेलापकस्य उद्घाटनार्थं शेगांव-नगरस्य भ्रमणं कृतवान्। अनेन शेगांवस्य आध्यात्मिक-सांस्कृतिक-जनसेवा-केन्द्रत्वेन विशिष्टा परिचितिः अधिकं सुदृढा अभवत्।

उल्लेखनीयं यत् १७ फरवरी २०२८ दिनाङ्के सन्त-गजानन-महाराजस्य १५०तमः प्राकट्य-दिवसः आचरितः भविष्यति।

Hindusthan Samachar / Divya Ranjan