पूर्व मेदिनीपुरम्, 25 जुलाईमासः (हि.स.)।

पश्चिमबङ्गे सत्तापरिवर्तनानन्तरं पूर्वमेदिनीपुरजनपदे तृणमूलकाङ्ग्रेसदलम् सङ्गठनात्मकसङ्कटेन पीड्यमानम् अस्ति। दलस्य बहवः नेतारः कारागारे सन्ति, केचन क्षेत्रं परित्यक्तवन्तः, बहवश्च नेतारः कार्यकर्तारश्च सार्वजनिकरूपेण सक्रियाः न दृश्यन्ते। एतादृश्यां परिस्थितौ सङ्गठनस्य संरक्षणाय कार्यकर्तृभिः सह सम्पर्कस्य च निरन्तरतायै जिल्लानेतृत्वेन गुप्तोपवेशनानाम् आश्रयः स्वीकृतः। यथार्थतृणमूलनकलीतृणमूलयोः विवादात् परिहारार्थम् एतेषु उपवेशनेषु दलस्य ध्वजोऽपि न स्थाप्यते।

पूर्वमेदिनीपुरजनपदः, यः अधुना मुख्यमन्त्रिणः शुभेन्दु अधिकारी इत्यस्य जनपदः अस्ति, तत्र विधानसभानिर्वाचने तृणमूलकाङ्ग्रेसदलम् सर्वासु षोडशसु आसन्दीषु पराजयं प्राप्तवान्। भारतीयजनतापक्षः जनपदे प्रायः षट्पञ्चाशत्प्रतिशतं मतानि प्राप्तवान्, तृणमूलकाङ्ग्रेसदलस्य तु प्रायः चत्वारिंशत्प्रतिशतं मतानि अभवन्। राज्ये पराजयानन्तरं भ्रष्टाचारसम्बद्धेषु प्रकरणेषु दलस्य अनेकाः नेतारः कारागारं गतवन्तः। अद्यतनकाले पश्चिममेदिनीपुरस्य तृणमूलदलस्य जिल्लानेता देवाशीष चौधरी अपि रिमाण्डाधीने स्थापितः। एतेन सह दलं कालीघाट (ममता) तृणमूल तथा ऋतब्रत तृणमूल इति द्वयोः गुटयोः विभक्तम् अस्ति, येन अधःस्तरीयकार्यकर्तृषु समर्थकेषु च सम्भ्रमः उत्पन्नः।

अस्यां परिस्थितौ पूर्वमन्त्री अखिल गिरी तथा चित्तरञ्जन माइती इत्यादयः वरिष्ठनेतारः सङ्गठनस्य दायित्वं वहन्ति। ते कार्यकर्तृभिः समर्थकैश्च सह निरन्तरं सम्पर्कं धारयन्ति। अधुना सार्वजनिककार्यक्रमाणां स्थाने समर्थकानां गृहेषु गुप्तोपवेशनानि आयोज्यन्ते। नेतारः दूरभाषमाध्यमेनापि कार्यकर्तृभिः सह संवादं कुर्वन्ति।

वर्तमानकाले जनपदे तृणमूलकाङ्ग्रेसदलस्य काचिदपि औपचारिकी जिल्ला-समितिः नास्ति। जिल्लानेतृत्वं पूर्वखण्डाध्यक्षानां माध्यमेन मतदानकेन्द्रस्तरीयां सूचनां सङ्गृह्णाति। गुप्तोपवेशनानां अतिरिक्तं विवाहसमारोहेषु, अन्नप्राशनसमारोहेषु, मेलासु, पूजोत्सवेषु च सामाजिकावसरेषु नेतारः कार्यकर्तृभिः सह सम्पर्कं स्थापयन्ति।

सूत्राणां अनुसारम् आगामिनि अगस्तमासे कालीघाट (ममता) तृणमूलदलस्य जिल्ला-समितेः गठनं भविष्यति। दुर्गापूजानन्तरं जिल्ला-सम्मेलनस्य आयोजनस्य योजना वर्तते। एतदुद्दिश्य जुलैमासस्य अन्तिमे सप्ताहे तमलुके सर्वेषां खण्डनेतॄणां बैठकम् प्रस्ताविता अस्ति।

गुप्तोपवेशनानां विषये तृणमूलनेता पूर्वमन्त्री अखिल गिरी उक्तवान् यत् विभिन्नस्थानेषु दलस्य कार्यकर्तारः समर्थकाश्च भयभीताः क्रियन्ते तथा तृणमूलदलस्य जनप्रतिनिधिभ्यः त्यागपत्रप्रदानाय दबावः क्रियते। अत एव कार्यकर्तृभिः सह गुप्तरूपेण सम्पर्कः धार्यते। तेनोक्तं यत् शीघ्रमेव जिल्ला-खण्डस्तरीयसमितीनां घोषणा भविष्यति तथा दुर्गापूजानन्तरं जिल्ला-सम्मेलनम् आयोजयिष्यते।

अपरतः भारतीयजनतापक्षेण अस्मिन् विषये कटाक्षः कृतः। पक्षस्य प्रदेशमहासचिवः सिन्टू सेनापति अवदत् यत् तृणमूलकाङ्ग्रेसदलस्य ध्वजवाहकोऽपि अधुना न अवशिष्टः। तेन दावीकृतं यत् कालेन सह तृणमूलकाङ्ग्रेसदलम् पश्चिमबङ्गात् पूर्णतया लुप्स्यते।

---------------

Hindusthan Samachar / Dheeraj Maithani