लखनऊ, 26 जुलाईमासः (हि.स.)।

प्रधानमन्त्री नरेन्द्रमोदी रविवासरे मन की बात कार्यक्रमस्य १३६ तमसंस्करणे उत्तरप्रदेशस्य प्रशंसाम् अकरोत्। तेन उक्तं यत् एकः वृक्षः मातुः नाम्ना इति अभियानस्य अन्तर्गतं उत्तरप्रदेशे जनशक्तेः अद्भुतः सङ्कल्पः दृष्टः। तत्र १२ जुलै दिनाङ्के एकस्मिन्नेव दिवसे पञ्चत्रिंशत्कोट्यधिकाः वृक्षाः रोपिताः। उत्तरप्रदेशात् लोकसभासदस्यत्वेन एषा मम कृते विशेषगौरवस्य विषयः अस्ति।

प्रधानमन्त्री अवदत् यत् अद्य देशव्यापिनः जनाः एकः वृक्षः मातुः नाम्ना इति अभियानस्य माध्यमेन प्रकृतेः प्रति स्वकर्तव्यं निर्वहन्ति। यदा समाजः एतादृशया भावनया सम्बध्यते तदा अनेके सुन्दराः प्रेरणादायकाः च उदाहरणानि दृश्यन्ते। तेन उक्तं यत् वृक्षाः केवलं मनुष्याणां कृते न सन्ति, ते असंख्यजीवानां निवासस्थानानि अपि सन्ति।

प्रधानमन्त्री देशवासिनः प्रार्थितवान् यत् सर्वे स्वजीवनस्य कञ्चन विशेषावसरं प्रकृत्या सह अवश्यं सम्बध्नीयुः। मातुः नाम्ना एकः वृक्षः रोप्यताम्। अद्य रोपितः लघुवृक्षः आगामिपीढीनां कृते हरितिमा, शुद्धवायुः, सुन्दरं भविष्यं च इति रूपेण अमूल्यविरासतां दातुं शक्नोति।

हरितविकासस्य राष्ट्रियसङ्कल्पाय निरन्तरं नूतनाम् ऊर्जां प्रदास्यति उत्तरप्रदेशः योगी आदित्यनाथः

मन की बात कार्यक्रमे उत्तरप्रदेशस्य प्रशंसां कृतवन्तं प्रधानमन्त्रिणं प्रति मुख्यमन्त्री योगीआदित्यनाथः सामाजिकमाध्यमे एक्स इत्यत्र स्वसन्देशेन कृतज्ञतां व्यक्तवान्। मुख्यमन्त्री अलिखत् यत् प्रधानमन्त्रिणा नरेन्द्रमोदिना अद्य मन की बात कार्यक्रमे एकः वृक्षः मातुः नाम्ना अभियानस्य अन्तर्गतं उत्तरप्रदेशे एकस्मिन् दिवसे पञ्चत्रिंशत्कोट्यधिकवृक्षारोपणस्य उल्लेखः कृतः। एषः पर्यावरणसंरक्षणस्य प्रति प्रदेशस्य सामूहिकचेतनायाः जनभागीदाऱ्याः च ऐतिहासिकसफलतायाः सम्मानः अस्ति।

मुख्यमन्त्री अलिखत् यत् उत्तरप्रदेशः एतत् सिद्धं कृतवान् यत् प्रकृतेः प्रति संवेदनशीलः समाजः एव विकसितभारतस्य दृढतमा आधारशिला भवितुम् अर्हति। तेन विश्वासः व्यक्तीकृतः यत् प्रधानमन्त्रिणः मार्गदर्शनेन उत्तरप्रदेशः प्रकृतिसंरक्षणस्य, जनभागीदाऱ्याः, हरितविकासस्य च अस्य राष्ट्रियसङ्कल्पस्य निरन्तरं नूतनाम् ऊर्जां प्रदास्यति।

_______________

Hindusthan Samachar / Dheeraj Maithani