गुवाहाटीनगरम्, २६ जुलाईमासः (हि.स.)। राष्ट्रीयस्वयंसेवकसंघस्य तथा सेवा-भारत्याः स्वयंसेवकाः ऊपरी-असमस्य जलपीडितेषु क्षेत्रेषु निरन्तरं उद्धारकार्यं कुर्वन्ति। शिवसागर-जोरहाट-जनपदयोः भीषणजलवृद्ध्या पीडितानां सहस्रशः परिवाराणां समीपं जीवनसामग्री प्राप्यते, तथा च आपन्नाः जनाः सुरक्षितस्थानेषु नीयन्ते।

निर्गत-वक्तव्यस्य अनुसारं शिवसागर-जनपदस्य बेतबाड़ी-क्षेत्रस्य काकतीग्रामे, डी-ग्रामे, द्वितीय-कोंवरग्रामे तथा चेतिया-कैवर्तग्रामे व्यापकम् उद्धार-अभियानं सञ्चालितम्। तेन द्विशताधिकाः जनाः सुरक्षिततया उद्धृत्य उद्धार-शिविरेषु सुरक्षितस्थानेषु च स्थापिताः।

सुन्दर-पुखुरी, बामुन-पुखुरी, गेलेकी तथा राजाबाड़ी इत्यादिषु जलमग्नक्षेत्रेषु लघुनौकाभिः स्वयंसेवकाः पक्वभोजनं, शुद्धपेयजलम्, जीवनरक्षकौषधानि, वस्त्राणि तथा अन्यावश्यकसामग्रीं वितरन्ति। अपरञ्च जोरहाटजनपदस्य अलेंगमोरा, कातिराम-चुकः, कुलई-चुकः, नालिया-चुकः, शेनचोवा-चुकः तथा चारिघरिया-चुकः इत्यादिषु स्थानेष्वपि सहायता-अभियानं तीव्रतया प्रवर्तते।

जलपीडितपरिवारेषु वितानानि, द्रव-वर्तिकाः, मशक-निवारक-कुण्डलिकाः, शुष्कखाद्यान्नम्, पिस्टकानि, शुद्धपेय-जलम्, फेनकम्, फिटकरी तथा आवश्यकौषधानि वितीर्यन्ते। स्वयंसेवकाः नौकाभिः जलमग्नगृहेषु जीवनसामग्रीं प्रापयन्ति, वृद्धान्, महिलाः, बालकान् तथा रोगिणः सुरक्षितस्थानेषु नीत्वा आवश्यकां चिकित्सासहायतामपि प्रददति।

आरएसएस तथा सेवा-भारती इत्येते संस्थे अवदतां यत् एतत् मानवीय-सेवाभियानं तयोः निःस्वार्थ-सेवासंकल्पस्य प्रतीकः अस्ति। “नरसेवा एव नारायणसेवा” इति आदर्शेन प्रेरिताः स्वयंसेवकाः प्राकृतिक-विपदः अस्यां कठिनघटिकायां जलपीडित-जनैः सह दृढतया तिष्ठन्तः तेभ्यः साहाय्यम्, संबलञ्च प्रददति।

Hindusthan Samachar / Divya Ranjan