नवदेहली, २६ जुलाईमासः (हि.स.)। कारगिलविजयदिवसस्य अवसरे कृतज्ञं राष्ट्रम् अद्य वीरसैनिकान् प्रणमति। अस्मिन् वर्षे मुख्यः कार्यक्रमः नवदेहल्याः स्थाने लद्दाखस्य द्रासस्थिते कारगिलयुद्धस्मारके आयोजितः अस्ति। अस्य दिवसस्य पूर्वसन्ध्यायां रक्षामन्त्री राजनाथसिंहः द्रासनगरम् आगत्य शत्रून् पराजितवतः भारतीयसेनायाः वीर-सैनिकान् प्रति श्रद्धाञ्जलिम् अर्पितवान्। उपराष्ट्रपतिः सी.पी. राधाकृष्णनः, केन्द्रीयगृहमन्त्री तथा सहकारितामन्त्री अमितशाहः, जम्मू-कश्मीरस्य उपराज्यपालः मनोजसिन्हा च अद्य प्रातः स्वस्य एक्स-सन्देशेन भारतीय-सशस्त्रबलानां वीरसैनिकेभ्यः श्रद्धाञ्जलिम् अर्पितवन्तः।

उपराष्ट्रपतिः राधाकृष्णनः अलिखत्— “कारगिलविजयदिवसे राष्ट्रं भारतीयसशस्त्रबलानां तेषां वीरसैनिकान् प्रति श्रद्धाञ्जलिम् अर्पयति, येषाम् असाधारणं धैर्यम्, अचलः सङ्कल्पः तथा सर्वोच्चबलिदानं कारगिलयुद्धे भारतस्य ऐतिहासिकं विजयम् असाधयत् तथा च अस्माकं राष्ट्रस्य सार्वभौमत्वं प्रादेशिकाखण्डतां च संरक्षितवत्। एषा विजयः भारतस्य सैन्यसामर्थ्यस्य, राष्ट्रियैक्यस्य तथा मातृभूमेः प्रत्येकम् अङ्गुलप्रदेशस्य रक्षणे अटूटसङ्कल्पस्य प्रमाणम् अस्ति। राष्ट्रं स्ववीरसैनिकान् तेषां परिवारान् च प्रति सदा कृतज्ञं भविष्यति। जय हिन्द।”

केन्द्रीयगृहमन्त्री अमितशाहः अलिखत्— “कारगिलविजयदिवसः भारतीयसेनायाः अदम्यशौर्यस्य अद्भुतपराक्रमस्य च प्रतीकः अस्ति। १९९९ तमे वर्षे हिमालयस्य दुर्गमेषु हिमाच्छादितशिखरेषु विषम-परिस्थितिषु, शत्रोः उन्नतस्थान-स्थितेषु स्थानेष्वपि, अस्माकं वीरसैनिकाः ‘ऑपरेशन विजय’ इति अभियानस्य माध्यमेन शत्रुं पराजयं स्वीकर्तुं विवशं कृतवन्तः। कारगिलविजयदिवसे तान् सर्वान् वीरसपूतान् स्मरामि प्रणमामि च, ये सर्वोच्चबलिदानं दत्त्वा राष्ट्रस्य अखण्डताम् अक्षुण्णाम् अरक्षन्।”

जम्मू-कश्मीरस्य उपराज्यपालः मनोजसिन्हा अलिखत्— “कारगिलविजयदिवसे अहं तान् बलिदानिनः प्रणमामि, ये ‘ऑपरेशन विजय’-अभियानकाले मातृभूमेः सार्वभौमत्वस्य सम्मानस्य च रक्षणार्थं सर्वोच्चबलिदानम् अयच्छन्। अस्माकं सशस्त्रबलानाम् असाधारणं साहसं भाविवंशं सदा प्रेरयिष्यति। बलिदानिनवीराणां परिवारेषु अपि मम श्रद्धा वर्तते। तेषां निःस्वार्थसमर्पणं अस्माकं परमराष्ट्रीयगौरवस्य शाश्वतं प्रतीकम् अस्ति।”

उल्लेखनीयम् अस्ति यत् अस्मिन् वर्षे कारगिलविजयदिवसस्य मुख्यः कार्यक्रमः नवदेहल्याः स्थाने लद्दाखस्य द्रासस्थिते कारगिलयुद्धस्मारके आयोजितः। कार्यक्रमस्य पूर्वसन्ध्यायां रक्षामन्त्री राजनाथसिंहः द्रासनगरम् आगत्य बलिदानीवीरान् श्रद्धया स्मृतवान्। एतत् युद्धं १९९९ तमस्य वर्षस्य मे-मासात् आरभ्य २६ जुलाईमास-पर्यन्तं प्रायः षष्टिदिनानि प्रवृत्तम् आसीत्।

शीतकाले शत्रुणा कृतः अवैधप्रवेशः ज्ञातः, ततः भारतीयस्थलसेनया ‘ऑपरेशन विजय’ तथा भारतीयवायुसैन्येन ‘ऑपरेशन सफेद सागर’ नामकं अभियानम् आरब्धम्। भारतीयसैनिकाः दुर्गमपर्वतान्, हिमशून्यतापमानं च सम्यक् सहमानाः तोलोलिङ्ग, टाइगरहिल् तथा प्वाइण्ट् ४८७५ इत्यादीनि महत्त्वपूर्णानि शिखराणि पाकिस्तान-अधिकारात् पुनः स्वाधीनानि अकुर्वन्। भारतीयसेनायाः अदम्यसाहसस्य पराक्रमस्य च परिणामस्वरूपं २६ जुलाई १९९९ दिनाङ्के राष्ट्रं सर्वाणि नष्टानि स्थानानि पुनः स्वाधीनानि अकरोत्। अस्य विजयस्य स्मरणार्थं प्रतिवर्षं २६ जुलाईमासे कारगिलविजयदिवसः आचर्यते।

Hindusthan Samachar / Divya Ranjan