नवदेहली, २६ जुलाईमासः (हि.स.)। कारगिल-विजय-दिवसस्य अवसरे लक्ष्मी-तरु-फाउण्डेशन-पक्षतः रविवासरे रोहिणी-स्थितात् जापानी-प्रांगणात् त्रिरङ्ग-मोटरद्विचक्रिका-यात्रा आयोजिता। अस्याः यात्रायाः उद्देश्यं कारगिल-युद्धस्य अमर-बलिदानिभ्यः श्रद्धाञ्जलिं समर्पयितुं तथा अग्रिमे २ अगस्त-दिनाङ्के आयोज्यमानस्य महा-स्वैच्छिक-रक्तदान-अभियानस्य विषये जनजागरणं कर्तुम् आसीत्।

यात्रायां बहुसंख्यया युवानः, मोटरद्विचक्रिका-चालकाः, सामाजिक-कार्यकर्तारः तथा स्वयंसेवकाः सहभागिनः अभवन्। सहभागिन: हस्तेषु त्रिरङ्ग-ध्वजं धारयन्त: देशभक्तेः, राष्ट्रिय-एकतायाः तथा स्वैच्छिक-रक्तदानस्य सन्देशः प्रसारितः। अस्मिन् अवसरे जनाः अधिकाधिक-संख्यया रक्तदान-अभियाने सम्मिलितुं प्रार्थिताः।

कार्यक्रमे देहली-सर्वकारस्य मन्त्रिमण्डल-मन्त्री रविन्द्रसिंह-इन्द्राजः, सांसदः योगेन्द्र-चन्दोलिया, आयरन-लेडी दिव्या-सन्धू तथा प्रीतसिंह-सिरोही विशिष्ट-अतिथित्वेन उपस्थिताः आसन्। सर्वैरतिथिभिः कारगिल-युद्धस्य वीर-बलिदानिभ्यः श्रद्धाञ्जलिः समर्पिता तथा तेषाम् अदम्य-साहसस्य सर्वोच्च-बलिदानस्य च प्रणामः कृतः।

मन्त्री रविन्द्रसिंह-इन्द्राजः उक्तवान् यत् कारगिलस्य वीरैः राष्ट्रस्य मान-गौरव-रक्षणार्थं स्वप्राणानां सर्वोच्चं बलिदानं कृतम्। सः अवदत् यत् यदि बलिदानिभ्यः सत्या श्रद्धाञ्जलिः दातव्या, तर्हि सेवा, राष्ट्रहितम् तथा स्वैच्छिक-रक्तदानम् इत्यादिषु जनकल्याणकार्येषु सर्वैः संलग्नं भवितव्यम्। तेन उक्तं यत् रक्तदानं महादानम् अस्ति, मानवसेवायाः च अस्मात् श्रेष्ठतरं माध्यमम् अन्यत् नास्ति। सः सर्वान् नागरिकान् २ अगस्त-दिनाङ्के आयोज्यमाने महा-स्वैच्छिक-रक्तदान-अभियाने उत्साहेन सहभागितां कर्तुम् आहूतवान्।

सांसदः योगेन्द्र-चन्दोलिया अन्ये वक्तारश्च उक्तवन्तः यत् कारगिल-विजय-दिवसः केवलं शौर्यस्य पराक्रमस्य च प्रतीकं नास्ति, अपितु राष्ट्रं प्रति स्वकर्तव्य-पालनस्य प्रेरणामपि ददाति। तैः युवभ्यः स्वैच्छिक-रक्तदान-अभियाने सहभागीभूत्वा राष्ट्रसेवायां योगदानं दातुम् आह्वानं कृतम्।

अन्ते लक्ष्मी-तरु-फाउण्डेशन-पक्षतः सर्वेभ्यः नागरिकेभ्यः २ अगस्त-दिनाङ्के आयोज्यमाने महा-स्वैच्छिक-रक्तदान-अभियाने अधिकाधिक-संख्यया सहभागितां कर्तुं आह्वानं कृत्वा, एतदभियानं जनान्दोलनरूपेण विकसितुं स्वसंकल्पः पुनः व्यक्त:।

Hindusthan Samachar / Divya Ranjan