जयपुरम्, 26 जुलाईमासः (हि.स.)।

राजस्थानस्य मुख्यमन्त्री भजनलालशर्मा उक्तवान् यत् प्रवासीराजस्थानीदिवसः विश्वस्य विविधेषु देशेषु निवसतां राजस्थानीजनानां स्वमातृभूम्या सह सम्बन्धान् अधिकं दृढीकर्तुं महत्त्वपूर्णं माध्यमम् अस्ति। तेन उक्तं यत् अस्य आयोजनस्य माध्यमेन प्रवासीराजस्थानिभ्यः प्रदेशस्य विकासे निवेशे च सहभागित्वस्य सुअवसरः भविष्यति।

मुख्यमन्त्री रविवासरे प्रवासीराजस्थानीदिवसस्य आयोजनसम्बद्धायाः उपवेशनस्य अध्यक्षतां कृतवान्। तेन आगामिनः डिसम्बरमासस्य दशमदिनाङ्के प्रस्तावितस्य अस्य आयोजनस्य सर्वेषां पक्षाणां समयबद्धाः सुव्यवस्थिताश्च सिद्धताः सुनिश्चितुं निर्देशाः प्रदत्ताः। तेन उक्तं यत् अध्यायव्यवस्थया प्रवासीराजस्थानिभिः सह निरन्तरं सक्रियसंवादः स्थापनीयः। तथा च प्रवासीराजस्थानीनां सुविधानुसारं नवानाम् अध्यायानां शीघ्रं सञ्चालनमपि सुनिश्चितं भवेत्। अपरञ्च, जिलाधिकारिणां माध्यमेन अपि प्रवासीराजस्थानिभिः सह निरन्तरः समन्वयः स्थापनीयः, येन तेषां मातृभूम्या सह सम्बन्धः अधिकं सुदृढः भवेत्।

मुख्यमन्त्री उक्तवान् यत् प्रवासीराजस्थानीदिवसस्य अवसरस्य कार्यक्रमे विविधविषयेषु आयोज्यमानानां क्षेत्रविशिष्टसत्राणां सफलसम्पादनार्थं सम्बन्धितविभागैः समये एव सर्वाः सिद्धताः सम्पन्नाः करणीयाः। तेन आयोजनात् पूर्वं विविधनगरेषु आयोज्यमानानां मार्गप्रदर्शनकार्यक्रमाणामपि प्रभावीसम्पादनाय निर्देशाः प्रदत्ताः।

मुख्यमन्त्री निर्देशितवान् यत् अस्य उपलक्ष्ये शेखावाटीप्रदेशसम्बद्धानां प्रवासीराजस्थानीनां कृते विशेषकार्यक्रमः शेखावाटीप्रदेशे एव आयोजनीयः। तेन उक्तं यत् राज्यसर्वकारेण शेखावाटीप्रदेशे पर्यटनस्य संवर्धनार्थं षट्षष्ट्यधिकषट्शतानि ऐतिहासिकहर्म्याणि चिह्नितानि सन्ति। अनेन स्थानीयपर्यटनस्य विकासः भविष्यति तथा प्रवासिनः स्वविरासतया सह पुनः सम्बद्धाः भविष्यन्ति।

उपवेशने निवेदितं यत् प्रवासीराजस्थानीदिवसे ऊर्जा, अक्षयऊर्जा, पर्यटनम्, आतिथ्यसेवा, नगरीयविकासः, औद्योगिकविकासः, खननम्, पेट्रोरसायनम् इत्यादिविषयेषु क्षेत्रविशिष्टसत्राणि आयोजयिष्यन्ते। तथैव अधिकाधिकान् प्रवासीराजस्थानीनः अस्मिन्नायोजने सम्बद्धान् कर्तुं विविधनगरेषु मार्गप्रदर्शनकार्यक्रमाः अपि आयोजयिष्यन्ते।

उल्लेखनीयं यत् मुख्यमन्त्री भजनलालशर्मा २०२४ तमस्य वर्षस्य डिसम्बरमासस्य दशमदिनाङ्के राइजिङ्ग् राजस्थान ग्लोबल् इन्भेस्टमेण्ट् समिट् इत्यस्य उद्घाटनसमये प्रतिवर्षं डिसम्बरमासस्य दशमदिनाङ्के प्रवासीराजस्थानीदिवसस्य आयोजनस्य घोषणाम् अकरोत्। तस्याः घोषणायाः अनुक्रमेण अस्मिन् वर्षे द्वितीयः प्रवासीराजस्थानीदिवसः आयोजयिष्यते।

अस्मिन् उपवेशने मुख्यसचिवः वी. श्रीनिवासः, उद्योगवाणिज्यविभागस्य, नगरीयविकासावासनविभागस्य, वित्तविभागस्य, राजस्वविभागस्य, कृषिविभागस्य, स्वायत्तशासनविभागस्य, ऊर्जाविभागस्य, पर्यटनविभागस्य तथा अन्येषां विभागानां वरिष्ठाधिकारिणः उपस्थिताः आसन्।

----------

हिन्दुस्थान समाचार / Dheeraj Maithani