— आठवलेन उत्तरप्रदेशे भाजपापक्षस्य समीपे पञ्च विधानसभास्थानानां याचना कृता

लखनऊनगरम्, २६ जुलाईमासः (हि.स.)। रिपब्लिकन-पार्टी-ऑफ-इण्डिया इत्यस्य राष्ट्रीयाध्यक्षः केन्द्रीय-सामाजिक-न्याय-अधिकारिता-मन्त्री च रामदास-आठवले रविवासरे लखनऊ-नगरे उक्तवान् यत् कॉकरोच-जनता-पार्टी इत्यस्य संस्थापकः अभिजीत-दीपके नीट-परीक्षा-विवादस्य प्रश्नपत्र-प्रस्रवणस्य च विरुद्धम् आन्दोलनं कृत्वा देशस्य युवजनान् जागरूकान् कृतवान्। प्रत्येकस्मिन् नगरे तस्य समर्थनार्थं सहस्रशः युवानः समागताः। महाराष्ट्रस्य प्रत्येकस्मिन् जनपदे अपि बहुसंख्यया युवभिः तस्य समर्थनं कृतम्।

केन्द्रीयमन्त्री आठवले लखनऊ-नगरस्य वीवीआईपी-अतिथिगृहे आयोजितायां पत्रकार-वार्तायाम् अवदत् यत् युवजनेषु जातस्य दंड-प्रहारस्य अहं समर्थनं न करोमि, किन्तु अस्य आन्दोलनस्य राजनैतिकीकरणस्य प्रयासः अवश्यम् अभवत्। अस्य श्रेयः अभिजीत-दीपके तथा सोनम-वाङ्चुक इत्येताभ्यां दातव्यम्।

सः अवदत् यत् युवजनानाम् एव समर्थनेन भारतीय-जनता-पार्टी-सर्वकारः सत्ताम् प्राप्तवान्। युवभिः नरेन्द्रमोदिनः नेतृत्वं दृष्टम्, अतः तैरेव नरेन्द्रमोदी त्रिवारं प्रधानमन्त्री कृतः। अस्मिन् विषये प्रधानमन्त्री नरेन्द्रमोदी उदारतां प्रदर्शितवान्। धर्मेन्द्र-प्रधानस्य त्यागपत्रम् अभवत्। सप्तचत्वारिंशदधिकारिणां विरुद्धं कार्यवाही कृता। प्रधानमन्त्री नूतनं कठोरं विधेयकं निर्मातुं निर्णयम् अकरोत्। युवजनः मोदिना सह एव भविष्यति, राहुलगान्धिनः पक्षे गमनस्य प्रश्नः एव नास्ति।

२६ नवम्बरमासे लखनऊ-नगरे आठवलेन विशाल-सभा आयोजयिष्यते

आठवले अवदत् यत् २६ नवम्बर-दिने संविधान-दिवसस्य अवसरे लखनऊ-नगरस्य डिफेन्स-एक्स्पो-समीपे रिपब्लिकन-पार्टी-ऑफ-इण्डिया-पक्षतः विशाल-सभा आयोजयिष्यते। अस्यां सभायां प्रदेशस्य विभिन्न-भागेभ्यः प्रायः एकलक्षं कार्यकर्तारः सहभागिनः भविष्यन्ति। सः अवदत् यत् वयं भाजपायाः समीपे उत्तरप्रदेश-विधानसभा-निर्वाचने पञ्च स्थानानि याचिष्यामः। यदि भाजपया पञ्च स्थानानि न प्रदीयन्ते, तर्हि वयं पञ्चविंशति-स्थानेषु स्वप्रत्याशिनः स्थापयिष्यामः।

Hindusthan Samachar / Divya Ranjan