Enter your Email Address to subscribe to our newsletters
— गौरवस्य हृदयं अहमदाबादस्थितस्य युवकस्य वक्षसि स्पन्दिष्यति, यकृत् उभे वृक्के च इन्दौरे प्रत्यारोपिते
इन्दौरनगरम्, २७ जुलाईमासः (हि.स.)। अङ्गदानक्षेत्रे देशव्यापी आदर्शरूपेण प्रतिष्ठितं मध्यप्रदेशस्य इन्दौरनगरेण पुनरेकवारं मानवतायाः उत्कृष्टम् उदाहरणम् प्रस्तुतम्। नगरस्य खजूरी-विपण-क्षेत्रनिवासी पञ्चविंशतिवर्षीयः गौरव-दवे स्वस्य अङ्गदानेन चतुर्भ्यः जनेभ्यः नूतनं जीवनम् अयच्छत्। तस्य मस्तिष्कमृत्युः घोषिता अभवत्, ततः सोमवासरे नगरे अष्टषष्टितमः ग्रीन-परिसर: निर्मितः, येन तस्य हृदयं अहमदाबादनगरं प्रेषितम्। यकृत्, उभे वृक्के, अन्यानि च अङ्गानि इन्दौरनगरे एव आवश्यकतावतां रोगिणां शरीरेषु प्रत्यारोपितानि।
चिकित्सकानां कथनानुसारं खजूरी-विपण-निवासिनोः सतीश-दवे कविता-दवे दम्पत्योः पञ्चविंशतिवर्षीयः पुत्रः गौरवः गतस्य १३ जुलाई-दिने आकस्मिकं मस्तिष्करक्तस्रावेण पीडितः अभवत्। ततः सः राजश्री-अपोलो-चिकित्सालये प्रविष्टः। चिकित्सकैः सर्वथा उपचारः कृतः, किन्तु तस्य स्वास्थ्ये सुधारः नाभवत्। नियमानुसारं द्विवारं चिकित्सकीय-परीक्षणानन्तरं विशेषज्ञवैद्यदलस्य निर्णयेन रविवासरस्य रात्रौ सः मस्तिष्कमृतः इति घोषितः।
युवपुत्रस्य वियोगदुःखमपि सहमानस्य दवे-परिवारस्य निर्णयः अनेकानां जीवनेषु नूतनाम् आशां जनितवान्। परिवारस्य सम्मत्याः अनन्तरं गौरवस्य हृदयं, यकृत्, उभे वृक्के, नेत्रे च दानरूपेण समर्पितानि। अस्य कृते सोमवासरे इन्दौरे अष्टषष्टितमः ग्रीन-परिसरः इति निर्मितः।
अङ्गदानप्रक्रियायां सहयोगिनः मुस्कान-पारमार्थिक-न्यासस्य सेवादारः सन्दीपन-आर्यः अवदत् यत् परिवारस्य एकमात्रः पुत्रः गौरवः चलचित्रोद्योगे कास्टिङ्-निर्देशकः आसीत्, अभिनेता भवितुमपि तस्य अभिलाषः आसीत्। तस्य पिता सतीश-दवे सेवानिवृत्तः शासकीयकर्मचारी, माता गृहिणी, भगिनी वैदेही च विवाहितासीत्। मस्तिष्कमृत्युः सुनिश्चितीभूतायां भगिनी वैदेही-राठी, तस्याः पतिः पल्केश-राठी, भ्राता ऋतिक-चावरे च मातापितरौ सान्त्वयित्वा अङ्गदानविषये चर्चाम् अकुर्वन्। अनन्तरं मातापितरौ तस्मै सम्मतिं प्रदत्तवन्तौ।
तेन उक्तं यत् चिकित्सकैः परिवाराय मस्तिष्कमृत्योः अङ्गदानस्य च विषये सम्यक् विवरणं प्रदत्तम्। ततः राष्ट्रीयस्तरे अङ्गप्रत्यारोपणस्य प्रक्रिया आरब्धा। सोमवासरस्य प्रातःकाले गौरवस्य यकृत् राजश्री-अपोलो-चिकित्सालये प्रविष्टाय द्विचत्वारिंशद्वर्षीयाय रोगिणे प्रत्यारोपितम्। तस्य हृदयं निर्धारितसमये विमानस्थानकं नीत्वा प्रातः ८:३६ वादने इण्डिगो-विमानेन अहमदाबादं प्रेषितम्, यत्र यू.एन्. मेहता-चिकित्सालये प्रविष्टाय अष्टाविंशति-वर्षीयाय रोगिणे प्रत्यारोपणं भविष्यति। उभे वृक्के चोइथराम-चिकित्सालये प्रविष्टाभ्यां द्वाविंशति-वर्षीयायै द्विपञ्चाशद्वर्षीयायै च महिलारोगिण्यौ प्रत्यारोपिते। नेत्रे शङ्करा-नेत्रकोषस्य माध्यमेन दत्ते। अङ्गदानानन्तरं गौरवस्य पार्थिवदेहाय गार्ड-ऑफ-ऑनर प्रदत्तः।
गौरवेन सह चलचित्रोद्योगे कार्यरतायाः ड्रीम-वर्ल्ड-मूवीज-एण्ड-प्रोडक्शन-संस्थायाः विभागाध्यक्षा महक-राज: अवदत् यत् बी.कॉम. उपाधिं प्राप्य सः चतुर्वर्षपूर्वं चलचित्रोद्योगेन सम्बद्धः अभवत्। इन्दौरे एव वसन् कार्यं करोति स्म। स्वपरिश्रमेण, प्रामाणिकतया, मिलनसारस्वभावेन च सः सर्वेषां प्रियः आसीत्। अद्य सः अस्माकं मध्ये नास्ति, किन्तु गच्छन् अपि बहुभ्यः जनाभ्यः नूतनं जीवनं दत्त्वा सः वास्तविकरूपेण नायकः अभवत्।
महक-राज् अवदत् यत् गौरवः बाल्यकालादेव मोया-मोया इति दुर्लभ-मस्तिष्करोगेण पीडितः आसीत्। अस्य रोगस्य विश्वे केवलम् अष्ट, भारते त्रयः एव रोगिणः ज्ञायन्ते। १३ जुलाई-दिने सः चिकित्सालये प्रविष्टः, द्विदिनानन्तरं मस्तिष्कशल्यक्रिया कृता, द्वौ स्टेण्टौ स्थापितौ। अनन्तरं सः सघनचिकित्सा-विभागात् सामान्यकक्षे स्थानान्तरितः, किन्तु परदिने पुनः स्वास्थ्यं विषमं जातम्, अतः वायुसहायकयन्त्रे स्थापितः। ततः परं सः पुनः सचेतनः नाभवत्।
फुफ्फुसयोः प्रत्यारोपणं अन्तिमक्षणे स्थगितम्
केन्द्रसर्वकारस्य राष्ट्रीय-अङ्ग-ऊतक-प्रत्यारोपण-सङ्गठनेन गौरवस्य फुफ्फुसे चेन्नई-स्थितस्य अपोलो-चिकित्सालयस्य रोगिणे आवंटिते। किन्तु चेन्नईनगरात् समये आवश्यकव्यवस्थायाः अभावात् अन्तिमक्षणे फुफ्फुसदानप्रक्रिया स्थगिता अभवत्। हृदय-वाल्व-इत्यस्य, अग्न्या-शयस्य, लघ्वन्त्रस्य च राष्ट्रियस्तरे आवंटनप्रक्रियापि सम्पन्ना।
अहमदाबादस्थितस्य यू.एन्. मेहता-चिकित्सालयस्य हृदयप्रत्यारोपण-शल्य-विशारदः डॉ. कार्तिक-पटेलस्य नेतृत्वे दशसदस्यीयं वैद्यदलम् रात्रौ एव रुग्णवाहन्या प्रस्थितं प्रातः ४:२० वादने इन्दौरम् अगच्छत्। ततः निर्धारित-नियमानुसारम् अङ्गनिष्कासन-प्रत्यारोपण-प्रक्रिया आरब्धा। सम्पूर्णा प्रक्रिया अपोलो-चिकित्सालयस्य वरिष्ठवैद्यैः डॉ. अभिलाष-पिल्लै, डॉ. सुशील-कुमार-जैन:, डॉ. अङ्कुर-गुप्त:, डॉ. अभि-पालीवाल: इत्येतेषां मार्गदर्शने सम्पन्ना। चिकित्सालयप्रबन्धनस्य कथनानुसारं सर्वाः वैधानिक-चिकित्सकीय-प्रक्रियाः निर्धारित-नियमानुसारमेव सम्पन्नाः।
‘ग्रीन-परिसरः’ जीवनस्य सूत्रम् अभवत्
मुस्कान-समूहस्य जीतू-बगानी सन्दीपन-आर्यश्च अवदताम् यत् येषु मार्गेषु रुग्णवाहन्या अङ्गानि विभिन्न-चिकित्सालयेषु प्रापितानि, तेषु मार्गेषु यातायात-आरश्रकेण विशेषः ग्रीन-परिसरः निर्मितः। अस्य उद्देश्यम् अङ्गानि न्यूनतमसमये सुरक्षितरूपेण सम्बन्धित-चिकित्सालयेषु प्रापयितुं, येन प्रत्यारोपणप्रक्रिया समये सम्पन्ना भवेत्।
Hindusthan Samachar / Divya Ranjan