नवदिल्ली, 28 जुलाईमासः (हि.स.)।

केन्द्रीयसर्वकारेण मङ्गलवासरे अमृतसरविमानस्थानकात् हब एण्ड स्पोक प्रतिमानस्य आधारेण अन्ताराष्ट्रियविमानसेवानां शुभारम्भः कृतः। अनेन सह वाराणस्याः अनन्तरम् अमृतसरविमानस्थानकं अस्य व्यवस्थायाः सह सम्बद्धं भवितुं राष्ट्रस्य द्वितीयं विमानस्थानकं जातम्। नागरविमानयनमन्त्रालयेन प्रकाशिते विज्ञप्तिपत्रे उक्तं यत् मन्त्रालयेन अमृतसरात् हब एण्ड स्पोक अन्ताराष्ट्रियविमानसञ्चालनसुविधायाः शुभारम्भः कृतः। एषा सुविधा पूर्वम् अमृतसरात् केवलं सप्त अन्ताराष्ट्रियगन्तव्यस्थानेषु प्रत्यक्षविमानयात्रायै एव उपलब्धा आसीत्।

अधुना नवीनव्यवस्थायाः प्रवर्तनानन्तरं यात्रिकाः अमृतसरात् एव देहलीविमानस्थानकस्य वैश्विकजालस्य लाभं प्राप्स्यन्ति। अनेन ते विंशत्यधिकेषु अन्ताराष्ट्रियगन्तव्यस्थानेषु सुकरतया यात्रां कर्तुं समर्थाः भविष्यन्ति। अस्मिन्नवसरे केन्द्रीयनागरविमानयनमन्त्री के राममोहननायडू स्वस्य चलच्चित्रसन्देशेन अमृतसरविमानस्थानके उपस्थितान् सर्वान् हितधारिणः अभिनन्द्य उक्तवान् यत् हब एण्ड स्पोक इति केवलं विमानसञ्चालनस्य प्रतिमानं नास्ति अपितु एतत् एकः उत्कृष्टः अवसरः अस्ति। अस्य कृते देहली केन्द्ररूपेण कार्यं करिष्यति यदा अमृतसरं पञ्जाब जम्मूकश्मीर हिमाचलप्रदेशानां कृते प्रमुखम् अन्ताराष्ट्रियप्रवेशद्वारं भविष्यति।

तेन उक्तं यत् अमृतसरं तेषु भारतीयनगरेषु अन्यतमम् अस्ति यत् प्रवासीभारतीयैः सह स्वस्य दृढसम्बन्धस्य विशालक्षेत्रीयजनसंख्यायाः आकर्षणस्य च कारणात् अस्य परिवर्तनस्य महान् लाभं प्राप्स्यति। यात्रिकाः अधुना एकेन एव चेक इन प्रक्रियया एकेन एव बैगेज टैग माध्यमेन सम्पूर्णाम् अन्ताराष्ट्रिययात्रां सम्पन्नां कर्तुं शक्नुवन्ति।

नागरविमानयनमन्त्री उक्तवान् यत् अनेन यात्रा पूर्वापेक्षया अधिका सुकरा सुविधाजनका च भविष्यति। प्रतिवर्षम् प्रायः लक्षपञ्चाशत्सहस्रं यात्रिकाः अमृतसरात् देहलीम् अन्ताराष्ट्रियविमानग्रहणार्थं गच्छन्ति। तथैव प्रायः लक्षपञ्चाशत्सहस्रं यात्रिकाः विदेशेभ्यः देहलीमार्गेण अमृतसरं प्राप्नुवन्ति। नवीनव्यवस्थया यात्रिकाणां सङ्ख्यायाम् अधिकवृद्धेः अपेक्षा अस्ति।

मन्त्रालयस्य अनुसारम् नवीनव्यवस्थायाम् अन्ताराष्ट्रिययात्रिकाः अमृतसरविमानस्थानके एव चेक इन आप्रवासन सीमाशुल्कसम्बद्धाः सर्वाः प्रक्रियाः सम्पन्नाः करिष्यन्ति। तेषां सामानं च अन्तिमम् अन्ताराष्ट्रियगन्तव्यस्थानं यावत् प्रत्यक्षतया प्रेषयिष्यते। देहलीम् उपगम्य तेषां पुनः आप्रवेशनस्य अथवा सीमाशुल्कसम्बद्धप्रक्रियायाः आवश्यकता न भविष्यति। ते प्रत्यक्षतया स्वस्य अग्रिमाम् अन्ताराष्ट्रियविमानसेवाम् आरोढुं शक्नुवन्ति।

भारते हब एण्ड स्पोक प्रतिमानस्य प्रारम्भः पञ्चविंशतितमे जूनमासे द्विसहस्रषड्विंशत्यधिकद्विसहस्रतमे वर्षे वाराणसीविमानस्थानकात् अभवत्। गतैकमासे वाराणस्याः यात्रिकाः देहलीमार्गेण अष्टादश अन्ताराष्ट्रियगन्तव्यस्थानैः सह सम्बद्धाः अभवन्।

मन्त्रालयस्य अध्ययनेन ज्ञायते यत् विमाननकेन्द्राणां सञ्चालनविकासेन प्रायः चत्वारि लक्षाणि प्रत्यक्षाप्रत्यक्षरोजगाराः सृज्येरन्। द्विसहस्रत्रिंशत्तमवर्षपर्यन्तं भारतस्य अर्थव्यवस्थायाम् त्रिंशत् अरब अमेरिकीडालरपरिमितम् अतिरिक्तयोगदानं सम्भाव्यते। समग्रतया द्विसहस्रसप्तचत्वारिंशत्तमवर्षपर्यन्तं प्रायः षोडशलक्षप्रत्यक्षाप्रत्यक्षरोजगारप्राप्तेः अनुमानम् अस्ति। राष्ट्रियार्थव्यवस्थायां च प्रायः एकदशमलवचत्वारि ट्रिलियन अमेरिकीडालरपरिमितं योगदानं भविष्यतीति मन्त्रालयेन अनुमानं व्यक्तम्।

------------

Hindusthan Samachar / Dheeraj Maithani