Enter your Email Address to subscribe to our newsletters
हजारीबागः, 28 जुलाईमासः (हि.स.)। श्रावणस्य पवित्रमासे हजारीबागसहितसमीपवर्तिजनपदानां शिवभक्तानां कृते हर्षजनका वार्ता अस्ति। बाबाबैद्यनाथधाम्नि जलाभिषेकार्थं गच्छतां श्रद्धालूनां सुविधां दृष्ट्वा रेलविभागेन राञ्ची भागलपुर श्रावणीमेलाविशेषयानस्य ०८६४६ ०८६४५ परिचालनम् आरब्धम्। अस्य विशेषयानस्य आरम्भेण श्रद्धालवः पूर्वापेक्षया अधिकां सुगमां सुविधाजनकां च यात्रां प्राप्स्यन्ति।
रेलविभागेन प्रकाशितसमयसारण्यानुसारं यानसङ्ख्या ०८६४६ राञ्चीतः भागलपुरपर्यन्तं प्रत्येकं सोमवासरे शुक्रवासरे च २७ जुलै २०२६ तः ११ सेप्टेम्बर २०२६ पर्यन्तं सञ्चालिता भविष्यति। तथा यानसङ्ख्या ०८६४५ भागलपुरतः राञ्चीपर्यन्तं प्रत्येकं मङ्गलवासरे शनिवासरे च २८ जुलै २०२६ तः १२ सेप्टेम्बर २०२६ पर्यन्तं सञ्चालिता भविष्यति। सम्पूर्णश्रावणमासे एषा विशेषयानसेवा उभयदिशि चतुर्दश चतुर्दशवारं सञ्चरिष्यति।
एतत् यानं राञ्ची मुरी बरकाकाना हजारीबागटाउन तिलैया कोडरमा गयाजीजङ्क्शन सुल्तानगञ्ज इत्यादिषु प्रमुखस्थानकेषु स्थितिं करिष्यति। अनेन हजारीबागस्य अतिरिक्तं रामगढ कोडरमा समीपवर्तिक्षेत्राणां श्रद्धालवः अपि प्रत्यक्षलाभं प्राप्स्यन्ति। अधुना तेषां बाबाबैद्यनाथधामगमनार्थं पुनः पुनः यानपरिवर्तनस्य मार्गयानस्य वा आश्रयस्य आवश्यकता न भविष्यति।
हजारीबागतः प्रतिवर्षं सहस्रशः श्रद्धालवः श्रावणमासे बाबाबैद्यनाथधामे जलाभिषेकार्थं प्रस्थिताः भवन्ति। किन्तु प्रत्यक्षरेलसेवायाः अभावात् अधिकांशजनाः बसयानानां निजवाहनानां वा आश्रयं गृह्णन्ति स्म। अस्याः समस्यायाः समाधानार्थं भाजपानेत्री शेफालीगुप्ता गतत्रिवर्षेभ्यः निरन्तरं रेलमन्त्रालयस्य समक्षं श्रावणीमेलाविशेषयानस्य सञ्चालनस्य आग्रहं कुर्वती आसीत्। तस्याः निरन्तरप्रयत्नानन्तरम् अस्याः सेवायाः आरम्भः सम्भवः अभवत्।
परिचालनस्य प्रथमे दिने याने अपेक्षया न्यूनैव यात्रिकाणां भीड दृश्यते स्म किन्तु रेलाधिकारिणां मतम् अस्ति यत् श्रावणस्य प्रमुखदिवसेषु यात्रिकाणां सङ्ख्या उल्लेखनीयरूपेण वर्धिष्यते। श्रद्धालवः अपि आग्रहं कृतवन्तः यत् एषा सेवा केवलं श्रावणमासपर्यन्तं न सीमिता भवेत् अपितु सम्पूर्णवर्षं नियमितरूपेण सञ्चालिता भवेत्।
उल्लेखनीयं यत् पूर्वम् अस्य विशेषयानस्य परिचालनं चतुर्दशयानकोष्ठैः सह क्रियते स्म किन्तु अस्मिन् वारे श्रद्धालूनां सम्भावितसङ्ख्यां दृष्ट्वा षट् अतिरिक्तयानकोष्ठाः संयोजिताः सन्ति। अधुना एतत् यानं विंशतियानकोष्ठैः सह सञ्चाल्यते येन अधिकसङ्ख्याकाः यात्रिकाः यात्रासुविधां प्राप्नुयुः।----------