ग्लासगो, 28 जुलाईमासः (हि.स.)।

भारतस्य प्रमुखः उच्चकूदक्रीडकः सर्वेशकुशारे सोमवासरे स्थानीयसमयानुसारं राष्ट्रमण्डलक्रीडा २०२६ स्पर्धायां उत्कृष्टं प्रदर्शनं कृत्वा पुरुषाणाम् उच्चकूदस्पर्धायाः रजतपदकं विजितवान्। अनेन सह तेन ग्लासगोक्रीडासु भारताय क्रीडाक्षेत्रे प्रथमं पदकं प्राप्तम्।

एकत्रिंशद्वर्षीयः सर्वेशः अन्तिमस्पर्धायां २.०५ मीटर २.१० मीटर २.१५ मीटर २.२० मीटर च उच्चताः प्रथमप्रयत्नेन एव सफलतया अतिक्रान्तवान्। ततः परं तेन २.२५ मीटर उच्चतां तृतीयप्रयत्नेन अतिक्रम्य रजतपदकं प्रायः सुनिश्चितम् अकरोत्।

जमैकादेशस्य रोमेनबेकफोर्ड अपि २.२५ मीटर उच्चताम् अतिक्रान्तवान् किन्तु सः ताम् उच्चतां प्रथमप्रयत्नेन एव अतिक्रान्तवान्। एतेन कारणेन तस्मै स्वर्णपदकं प्राप्तम्। ततः परं उभौ क्रीडकौ २.२८ मीटर उच्चताम् अतिक्रमितुं त्रिषु प्रयत्नेषु असफलौ अभवताम्। इङ्ग्लैण्डदेशस्य किमानीजैक २.२० मीटर उच्चतां लङ्घित्वा कांस्यपदकं स्वनाम्नि कृतवान्।

सर्वेशकुशारे उत्कृष्टया स्थित्या राष्ट्रमण्डलक्रीडासु प्रविष्टवान् आसीत्। तेन जूनमासस्य सप्तविंशतितमे दिने भुवनेश्वरे आयोजितायां राष्ट्रियान्तरराज्यक्रीडाप्रतियोगितायां २.३१ मीटर उच्चतां लङ्घित्वा नूतनं राष्ट्रियकीर्तिमानं स्थापितम्। एतदतिरिक्तं २०२५ विश्वक्रीडाप्रतियोगितायां पुरुषाणाम् उच्चकूदस्य अन्तिमस्पर्धां प्राप्तवान् प्रथमः भारतीयः भूत्वा इतिहासमपि रचितवान् यत्र सः षष्ठं स्थानं प्राप्तवान्।

भारतस्य पक्षतः अस्याः स्पर्धायाः अन्तिमचरणे त्रयः क्रीडकाः अवतीर्णाः। तथापि तेजस्विनशङ्करः प्रारम्भिकां २.०५ मीटर उच्चतां लङ्घितुं असफलः भूत्वा आघातकारणात् स्पर्धातः निवृत्तः। तथापि बर्मिङ्घम २०२२ कांस्यपदकविजेता तेजस्विनः सम्पूर्णस्पर्धाकालं क्रीडाङ्गणस्य पार्श्वे स्थित्वा सर्वेशस्य उत्साहवर्धनं कृतवान्। भारतस्य अपरः क्रीडकः जे आदर्शराम अपि अन्तिमस्पर्धायां सहभागी आसीत्।

सर्वेशकुशारेण प्राप्तेन अस्मिन् रजतपदकेन सह भारतेन ग्लासगो राष्ट्रमण्डलक्रीडा २०२६ स्पर्धासु क्रीडाक्षेत्रे पदकप्राप्तेः आरम्भः कृतः येन भारतीयदलस्य पदकसम्भावनाः अधिकं सुदृढाः अभवन्।

---------------

Hindusthan Samachar / Dheeraj Maithani