कानपुरनगरम्, २९ जुलाईमासः (हि.स.)। गुरुपूर्णिमायाः पावनावसरे बुधवासरे प्रातःकालादेव नगरस्य गङ्गातटेषु श्रद्धालूनां महान् सम्मर्द: समुपस्थित:। सरसैया-घट्टे, परमट-घट्टे, नानाराव-जाजमऊ-घट्टे, गङ्गा-बैराजघट्टे तथा बिठूर-घाटे सहितेषु प्रमुख-घट्टेषु सहस्रशः श्रद्धालवः ब्रह्ममुहूर्तादारभ्य गङ्गास्नानं कृत्वा पूजाम् अर्चनां च अकुर्वन्। श्रद्धालुभिः सूर्याय अर्घ्यं समर्प्य स्वगुरोः आशीर्वादः प्रार्थितः तथा परिवारस्य सुख-समृद्धेः मङ्गलस्य च कामना कृता। प्रातःकालादेव घट्टेषु “हर-हर-गङ्गे” तथा “गुरुदेवस्य जयः” इति घोषाः प्रतिध्वनिताः, येन समग्रं वातावरणं भक्तिमयं जातम्।

श्रद्धालूनां वर्धमानां सङ्ख्यां दृष्ट्वा प्रशासनद्वारा सर्वेषु प्रमुख-घट्टेषु सुरक्षायाः व्यापकाः व्यवस्थाः कृताः। आरक्षकबलस्य, जल-आरक्षकबलस्य, पीएसी-दलस्य, जलनिमज्जकानां तथा मोटर-नौकानां नियुक्तिः कृता, येन कस्यापि आपत्कालीन-स्थितेः त्वरितं निवारणं शक्यं भवेत्। नगरनिगमेन घाटानां स्वच्छता, पेयजल-व्यवस्था च सुनिश्चिता, स्वास्थ्यविभागेन च चिकित्सादलानि तथा रोगिवाहिकाः अपि तत्र नियुक्तानि।

अस्मिन्नेव क्रमे आरक्षक-उपायुक्तः (पश्चिम) एस. एम. कासिम-आबिदी-महोदयः बिठूर-थाना-क्षेत्रस्थितस्य बिठूर-घट्टस्य निरीक्षणं कृत्वा सुरक्षाव्यवस्थायाः समीक्षाम् अकरोत्। तेन सह सहायक-आरक्षक-आयुक्तः कल्याणपुर-महोदयः अपि उपस्थितः आसीत्। उपायुक्तेन श्रद्धालूनां सुरक्षा, यातायात-प्रबन्धनं तथा अन्यव्यवस्थानां निरीक्षणं कृत्वा नियुक्तान् आरक्षक-अधिकारिणः कर्मिणश्च पूर्ण-सतर्कतया स्वकर्तव्यस्य निर्वहणाय निर्देशाः प्रदत्ताः।

तेन श्रद्धालूनां सुरक्षितं सुगमं च आवागमनं सर्वोच्च-प्राथमिकतारूपेण स्वीकर्तुं बलं दत्तम्। सर्वे अधिकारिणः कर्मिणश्च परस्पर-समन्वयं रक्षेयुः तथा कस्यापि आपत्कालीन-स्थितेः प्रभावक-रूपेण सामना कर्तुं सर्वदा सज्जाः स्युरिति निर्देशाः अपि प्रदत्ताः।

सनातन-परम्परायां गुरुपूर्णिमायाः विशेषं महत्त्वं मन्यते। परम्परानुसारम् अस्मिन् दिने गङ्गास्नानेन, पूजार्चनया तथा गुरु-वन्दनेन ज्ञानं, सद्बुद्धिः तथा जीवने सफलता च प्राप्यते। एतस्याः श्रद्धायाः कारणात् प्रातःकालादेव नगरस्य गङ्गातटेषु श्रद्धालूनां निरन्तरः समागमः अभवत्।

Hindusthan Samachar / Divya Ranjan