Enter your Email Address to subscribe to our newsletters
कोलकाता, 29 जुलाईमासः (हि.स.)। पश्चिमबङ्गसर्वकारेण भारतीयजनसङ्घस्य संस्थापकस्य डाक्टर श्यामाप्रसादमुखर्जीमहाभागस्य हुगलीजनपदस्य बलागढस्थिते जिराटग्रामे विद्यमानं पैतृकगृहं एककोटिपञ्चविंशतिलक्षनवनवतिसहस्राष्टशतद्वाविंशत्यधिकरूप्यकैः क्रीतम्। अस्य सम्पत्तेः पञ्जीकरणकार्यं जुलैमासस्य तृतीयदिने कोलकातास्थिते पञ्जीकरणकार्यालये सम्पन्नम्। तस्मिन्नेव दिने उत्तराधिकारिणां लेखेषु धनराशिः बैङ्कमाध्यमेन प्रेषिता। अनेन सह एषा पूर्वं निजीसम्पत्तिः इदानीं राज्यसर्वकारस्य सूचनासंस्कृतिविभागस्य स्वामित्वे आगता।
राज्यमन्त्रिमण्डलेन अस्याः सम्पत्तेः क्रयस्य निर्णयः जूनमासस्य तृतीयदिने सम्पन्नायां मन्त्रिमण्डलोपवेशने कृतः। ततः जूनमासस्य एकोनत्रिंशद्दिने हुगलीजनपदस्य विशेषभूम्यधिग्रहणाधिकारी जिल्ला प्रत्यक्षभूमिक्रयसमित्या सह उपवेशनम् अकरोत्। उपवेशनात् त्रिदिनाभ्यन्तरे सम्पूर्णा क्रयप्रक्रिया सम्पन्ना।
स्थानीयविधायकः राज्यस्य स्वास्थ्यराज्यमन्त्री च सुमनासर्वकारः गुरुवासरे अवदत् यत् निर्वाचनप्रचारकाले केन्द्रीयगृहमन्त्री अमितशाहः श्यामाप्रसादमुखर्जीमहाभागस्य पैतृकगृहस्य संरक्षणं कृत्वा तत्र सङ्ग्रहालयं पुस्तकालयं च निर्मास्यते इति प्रतिज्ञां कृतवान्। तस्याः दिशायाः अनुगुणं राज्यसर्वकारेण अधुना कार्यारम्भः कृतः।
राज्यसर्वकारेण अस्मिन् वर्षे जुलैमासस्य षष्ठदिने डाक्टर श्यामाप्रसादमुखर्जीमहाभागस्य जयन्त्यवसरे राजकीयकर्मचारिणां कृते अवकाशः घोषितः तथा तस्य जन्मदिवसः विशेषरूपेण आचरितः। राज्यस्य वित्तविनियोजने तस्य पैतृकगृहस्य विकासाय पञ्चविंशत्यधिकशतफुटोन्नतप्रतिमानिर्माणाय पुरातनभवनस्य जीर्णोद्धाराय समीपवर्तिक्षेत्रस्य सौन्दर्यीकरणाय च द्विशतकोटिरूप्यकाणां प्रावधानं कृतम्।
योजनानुसारं तस्मिन् परिसरे स्मृतिउद्यानं पुस्तकालयं सङ्ग्रहालयं सभागारं च विकसितं भविष्यति। सहैव डाक्टर श्यामाप्रसादमुखर्जीमहाभागस्य पूर्णाकृतिप्रतिमा अपि स्थापिता भविष्यति।
अधुना अस्याः सम्पत्तेः परिपालनकार्यं डाक्टर श्यामाप्रसादमुखर्जीमहाभागस्य भ्रातुः बामाप्रसादमुखर्जीमहाभागस्य पौत्रः बाणीप्रसादमुखर्जी तथा परिवारस्य अन्ये सदस्याः कुर्वन्ति। जिराटग्रामे बङ्गालस्य व्याघ्रः इति विख्यातस्य आशुतोषमुखर्जीमहाभागस्य नाम्ना पूर्वमेव विद्यालयः पुस्तकालयश्च स्तः किन्तु श्यामाप्रसादमुखर्जीमहाभागस्य नाम्ना अद्यावधि किमपि प्रमुखस्मारकं नासीत्। अधुना राज्यसर्वकारस्य उपक्रमेण तस्य पैतृकगृहं सङ्ग्रहालयरूपेण विकसितुं प्रक्रिया प्रारब्धा।
Hindusthan Samachar / Dheeraj Maithani