नोएडानगरम्, २९ जुलाईमासः (हि.स.)। उत्तरप्रदेशस्य नोएडानगरे आरक्षकविभागेन कांवडयात्रायाः कृते सुदृढाः व्यवस्थाः कृताः सन्ति। कांवडयात्राकाले नगरस्य विभिन्नेषु मार्गेषु शिवालयेषु च अर्धसहस्राधिक-द्विसहस्रम् आरक्षककर्मिणः नियुक्ताः भविष्यन्ति। कांवडमार्गस्य निरीक्षणं ड्रोन-यानैः अपि करिष्यते।

अपर-आरक्षक-उपायुक्तः राजीव-नारायण-मिश्र-महोदयः अवदत् यत् श्रावणमासस्य प्रारम्भः समीपे वर्तते। नोएडानगरात् तथा एनसीआर-प्रदेशस्य विविधस्थानभ्यः जनाः जलग्रहणार्थं हरिद्वारं गमिष्यन्ति तथा जलं गृहीत्वा स्वस्व-गन्तव्यस्थानानि प्रति प्रस्थिताः भविष्यन्ति। गौतमबुद्धनगर-जनपदे कांवडयात्रायाः अष्टौ प्रमुखमार्गाः सन्ति। तेषु सर्वेषु मार्गेषु सीसीटीवी-चित्रग्रहण-यन्त्राणि स्थापितानि सन्ति तथा मार्गेषु शिवालयेषु च आरक्षकबलं नियुक्तम् अस्ति। सर्वेषां मार्गाणां स्थलीय-निरीक्षणम् अपि कृतम्। सीसीटीवी-यन्त्राणां माध्यमेन निरन्तरं पर्यवेक्षणं क्रियते। नियन्त्रण-कक्षे राजपत्रितः अधिकारी नियुक्तः अस्ति। आन्तरिक-विभागीय-समितिः अपि गठिता, यस्यां स्वास्थ्य-विभागेन, विद्युत्-विभागेन, राष्ट्रीय-राजमार्ग-प्राधिकरणेन तथा राज्य-राजमार्ग-विभागेन सह सभा: सम्पन्नाः। एते मार्गाः अपि सम्यक् संस्कारिताः।

तेन उक्तं यत् कांवडमार्गे आरक्षकबलस्य नियुक्त्यर्थं समुचिताः व्यवस्थाः कृताः सन्ति। प्रायः २५०० आरक्षककर्मिणः कांवडमार्गेषु विविधेषु शिवालयेषु च नियुक्ताः भविष्यन्ति। डीजे-सञ्चालकाः अपि निर्देशिताः यत् ध्वनिस्तरः निर्धारित-मानकानुसारमेव स्थापनीयः। तेन सूचितं यत् कांवडमार्गस्य निरीक्षणं ड्रोन-यानैः करिष्यते तथा सर्वेषां यात्रिणां सुरक्षायाः सम्यक् व्यवस्था सुनिश्चितीक्रियते।

Hindusthan Samachar / Divya Ranjan