भुवनेश्वरम्, ०६ जुलाईमासः (हि.स.)। ओडिशा-राज्यस्य मुख्यमन्त्री मोहनचरण-माझी रथयात्रायाः सुचारु-निर्विघ्न-आयोजनस्य कृते पुरी-नगरस्य टाउन-हॉल-प्रेक्षागृहे आयोजितस्य विशेष-समीक्षा-समागमस्य अध्यक्षतां कृतवान्। अस्मिन् अवसरे सः प्रशासनस्य, विविध-विभागानाम् अधिकारिणां, कर्मचारिणां तथा सेवायतानां मध्ये उत्तम-समन्वयस्य आवश्यकतायां विशेषं बलम् अयच्छत्।

मुख्यमन्त्री अवदत् यत् भगवत: श्रीजगन्नाथस्य आशीर्वादेन, समर्पणभावेन, अनुभवेन, दक्षतया च सामूहिक-प्रयत्नैः सह सर्वैः सम्बद्ध-विभागैः मिलित्वा कार्यं करणीयम्, येन विश्वविख्याता रथयात्रा सफलतया निर्विघ्नतया च सम्पन्ना भवेत्।

सः अवदत् यत् भगवान् श्रीजगन्नाथः केवलम् ओडिशायाः न, अपितु सम्पूर्णस्य भारतस्य विश्वस्य च कोटिशः श्रद्धालूनाम् आस्थायाः केन्द्रम् अस्ति। रथयात्रां प्रति सम्पूर्णविश्वस्य दृष्टिः भवति। अतः सुरक्षितस्य सुव्यवस्थितस्य सफलस्य च रथयात्रा-आयोजनस्य दायित्वं केवलं प्रशासनिकम् एव न, अपितु सर्वेषां सम्बद्धानां नैतिक-दायित्वमपि अस्ति।

मुख्यमन्त्री सर्वान् अधिकारिणः स्वकर्तव्य-पालनं भगवतः सेवारूपेण मन्यमानाः पूर्ण-निष्ठया समर्पणभावेन च कार्यं कर्तुम् आहूतवान्। तेन उक्तं यत् सुरक्षा-जनसमूह-व्यवस्थापनयोः कृते व्यापकं आरक्षक-बलं नियुक्तम् अस्ति। तदतिरिक्तं स्वास्थ्य-सेवाः, स्वच्छता, पेयजल-व्यवस्था, यातायात-व्यवस्थापनम्, यातायात-नियन्त्रणं तथा अन्याः आवश्यक-व्यवस्थाः अपि सम्यक् सुनिश्चिताः सन्ति।

सः गत-द्विवर्षयोः अनुभवान् आधारीकृत्य विविध-विभागानां मध्ये प्रभावी-समन्वयस्य पालनं सर्वासां व्यवस्थाः निरन्तरं निरीक्षितुं च निर्देशान् अददात्। मुख्यमन्त्री महाप्रभोः सर्वासां धार्मिक-परम्पराणां धार्मिक-अनुष्ठानानां च समयबद्ध-निर्वहणाय सेवायतानां प्रशंसाम् अकरोत्।

मुख्यमन्त्री श्रद्धालुभ्यः समये सम्यक् सूचनाप्रदानार्थं मुद्रित-माध्यमानां, विद्युत्-माध्यमानां, एफ.एम.रेडियो, सार्वजनिक-उद्घोषणा-प्रणाल्याः, सामाजिक-माध्यमानां तथा विभागीय-जालपुटानां प्रभावी-उपयोगस्य परामर्शम् अददात्। सः अवदत् यत् महाप्रभोः नीतयः, दर्शन-व्यवस्था, यातायात-स्थितिः तथा अन्याः महत्त्वपूर्णाः सूचनाः नियमितरूपेण प्रसारिताः चेत् श्रद्धालूनां महती सुविधा भविष्यति। सहैव दुष्प्रचार-प्रसारकेषु कठोर-दृष्टिं स्थापयितुं तेषां विरुद्धं कठोर-कार्यवाहीं कर्तुं च निर्देशान् अयच्छत्।

मुख्यमन्त्री अवदत् यत् यदि सर्वे सम्बद्ध-पक्षाः भगवन्तं श्रीजगन्नाथं प्रति श्रद्धया सेवाभावेन च स्वदायित्वानि निर्वहेयुः, तर्हि रथयात्रायाः सफल-आयोजनं सुनिश्चितं भविष्यति। सः विश्वासं व्यक्तवान् यत् सर्वे श्रद्धालवः सुरक्षितेन सुखदेन च आध्यात्मिक-अनुभवेन सह महाप्रभोः दर्शनं कृत्वा प्रत्यागमिष्यन्ति; एषा एव प्रशासनस्य सर्वेषां सेवकानां च महान् सफलता भविष्यति।

अस्मिन् अवसरे मुख्यमन्त्री पुरी-जनपद-प्रशासनेन प्रकाशितायाः ‘रूपरेखा–रथयात्रा २०२६’ इति पुस्तिकायाः विमोचनम् अकरोत्।

अस्मिन् समागमे उपमुख्यमन्त्री कनकवर्धनसिंहदेवः, उपमुख्यमन्त्री प्रभाती-परिडा, अनेके वरिष्ठ-मन्त्रिणः, मुख्य-सचिवः, पुलिस-महानिदेशकः तथा विविध-विभागानां वरिष्ठ-अधिकारिणः उपस्थिताः आसन्। मुख्य-सचिवः रथयात्रायाः समग्र-व्यवस्थानां विषये विवरणम् अयच्छत्, आरक्षक-महानिदेशकः च सुरक्षा-व्यवस्थायाः विस्तृतं विवरणम् प्रस्तुतवान्।

Hindusthan Samachar / Divya Ranjan