नवदिल्ली, 06 जुलाईमासः (हि.स.)।केन्द्रीयमार्गपरिवहनराजमार्गमन्त्री नितिनगडकरी सोमवासरे अत्र राष्ट्रियराजमार्गलाजिस्टिक्सप्रबन्धनलिमिटेड इति संस्थायाः समीक्षां कृतवान्। सः बैठकस्य अध्यक्षतां कुर्वन् देशव्यापिरूपेण विकसितानां बहुमाध्यमीयलाजिस्टिक्सउद्यानानां रज्जुमार्गाणाम् अन्तरमाध्यमीयस्थानकानां मार्गपार्श्वसुविधानां च परियोजनास्तरीयप्रगतेः आकलनं कृतवान्। सः एताः परियोजनाः भविष्यत्कालाय सज्जस्य एकीकृतपरिवहनतन्त्रस्य निर्माणे महत्त्वपूर्णाः इति वर्णयन् तासां समयबद्धकार्यान्वयने बलं दत्तवान्।

केन्द्रीयमार्गपरिवहनराजमार्गमन्त्रालयेन सूचितं यत् बैठकस्य समये गडकरी अवदत् यत् एताः परिवर्तनकारिण्यः परियोजनाः देशे बहुमाध्यमीयसम्पर्कव्यवस्थां सुदृढां करिष्यन्ति नूतनान् आर्थिकावसरान् स्रक्ष्यन्ति सन्तुलितक्षेत्रीयविकासं प्रोत्साहयिष्यन्ति तथा भारतस्य लाजिस्टिक्सप्रतिस्पर्धात्मकतायै नूतनं बलं प्रदास्यन्ति। आधुनिकस्य एकीकृतस्य च परिवहनसञ्जालस्य विकासः विकसितभारतस्य निर्माणदिशि महत्त्वपूर्णं पदम् अस्ति।

गडकरी अवदत् यत् एतासां परियोजनानां समये पूर्णतया सम्पन्नतया लाजिस्टिक्सक्षेत्रस्य दक्षता वर्धिष्यते मालपरिवहनस्य व्ययः न्यूनीभविष्यति यात्रिभ्यश्च विश्वस्तरीयाः सुविधाः उपलब्धाः भविष्यन्ति। एषा पहल आत्मनिर्भरभारतस्य विकसितभारतस्य च लक्ष्यसिद्धौ महत्त्वपूर्णां भूमिकां निर्वक्ष्यति।

सः विविधपरियोजनानां कार्यान्वयने समुत्पद्यमानानां समस्यानां बाधानां च समीक्षाम् अपि कृतवान्। सः निर्देशं दत्तवान् यत् लम्बितविषयाणां प्राथमिकताधारेण समाधानं क्रियतां परियोजनानां निष्पादने च गतिः वर्ध्यतां येन निर्धारितसमयसीमायाः अन्तः कार्याणि पूर्णानि कर्तुं शक्येरन्।

---------------

हिन्दुस्थान समाचार / Dheeraj Maithani