लखनऊ, 06 जुलाईमासः (हि.स.)। मुख्यमन्त्री योगी आदित्यनाथः सोमवासरे डा श्यामाप्रसादमुखर्जिनः जयन्त्यवसरे तस्य प्रतिमायां पुष्पाञ्जलिं समर्प्य नमनं कृतवान्। मुख्यमन्त्री योगी अवदत् यत् यदा नेहरूसर्वकारस्य तुष्टीकरणनीतिः देशस्य अखण्डतायाः समक्षं चुनौतीरूपेण समुपस्थिता तदा मुखर्जी सत्ताराजनीतिं परित्यक्तवान्। सः सर्वकारात् पृथक् अभवत्।

अस्मिन् अवसरे पत्रकारान् सम्बोधयन् मुख्यमन्त्री योगी अवदत् यत् भारतमातुः महान् सुपुत्रः महान् स्वतन्त्रतासङ्ग्रामसेनानी शिक्षाविद् स्वतन्त्रभारतस्य प्रथमः खाद्योद्योगमन्त्री एकस्मिन् देशे द्वे विधाने द्वौ प्रधानौ द्वे चिह्ने न चलिष्यन्ति इति उद्घोषं कृतवान् डा मुखर्जी यस्य अद्य १२५ तमी पावनी जयन्ती अस्ति। अस्मिन् अवसरे भारतमातुः अस्य महानः सुपुत्रस्य स्मृतीः नत्वा उत्तरप्रदेशशासनस्य उत्तरप्रदेशस्य जनताजनार्दनस्य च पक्षतः अहं विनम्रां श्रद्धाञ्जलिं समर्पयामि।

योगी अवदत् यत् डा मुखर्जी १९०१ तमे वर्षे बङ्गाले जातः। उच्चशिक्षाम् अधिगम्य सः प्राध्यापकरूपेण स्वजीवनस्य आरम्भं कृतवान्। केवलं ३३ वर्षाणां वयसि कोलकाताविश्वविद्यालयस्य कुलपतिरूपेण महत्त्वपूर्णाः सेवाः प्रदत्तवान्। सः देशस्य स्वतन्त्रतान्दोलने प्रमुखरूपेण सम्बद्धः अभवत्। यदा बङ्गालं पाकिस्तानस्य भागं कर्तुं कुत्सिताः योजनाः क्रियमाणाः आसन् तदा सः तासां विरुद्धम् उत्थितवान्। अद्य यत् पश्चिमबङ्गालं भारतस्य भागः अस्ति तस्य कृते ये महानः नेतारः स्वात्मानं समर्प्य अस्य आन्दोलनस्य भागाः अभवन् स्वस्वरं च प्रबलं कृतवन्तः तेषु डा श्यामाप्रसादमुखर्जिनः नाम प्रमुखतया ग्रहीतुं शक्यते।

मुख्यमन्त्री अवदत् यत् स्वतन्त्रभारते देशस्य खाद्योद्योगमन्त्रिरूपेण सः खाद्यनीतिम् उद्योगनीतिं च प्रमुखतया कार्यान्वितवान्। किन्तु यदा नेहरूसर्वकारस्य तुष्टीकरणनीतिः देशस्य अखण्डतायाः समक्षं चुनौतीरूपेण समुपस्थिता तदा सः सत्ताराजनीतिं परित्यक्तवान्। सः सर्वकारात् पृथक् अभवत्। भारतीयजनसङ्घस्य गठनानन्तरं तस्य संस्थापकाध्यक्षरूपेण सः देशस्य अखण्डतायै कार्यं कृतवान्। एकस्मिन् देशे द्वे विधाने द्वे चिह्ने द्वौ प्रधानौ च न चलिष्यन्ति इति उद्घोषयन् सः कश्मीरस्य अनुमतिपत्रप्रणाल्याः विरोधं कृतवान्। सः निगृहीतः। १९५३ तमे वर्षे कश्मीरे एव तस्य बलिदानम् अभवत्। डा मुखर्जी अनुच्छेदस्य ३७० विरुद्धं नेहरूसर्वकारस्य तुष्टीकरणनीतेः विरुद्धं च यं शङ्खनादं कृतवान् तं स्वप्नं प्रधानमन्त्रिणः मोदिनः नेतृत्वे भारतीयजनतापक्षस्य सर्वकारेण साकारितम्। २०१९ तमे वर्षे कश्मीरे अनुच्छेदं ३७० निराकृत्य कश्मीरक्षेत्रे अपि भारतस्य विधीन् प्रभाविरूपेण कार्यान्वितुं कार्यं कृतम्।

एतत् अस्माकं सर्वेषां कृते सौभाग्यस्य विषयः अस्ति। अद्य पश्चिमबङ्गाले भारतीयजनतापक्षस्य सर्वकारः अस्ति। बङ्गाले डा मुखर्जिना सम्बद्धानां सर्वेषां स्थलानां पुनरुद्धाराय तत्रत्यः द्विचक्रसर्वकारः प्रभाविरूपेण कार्यं करोति। अद्य वयं भारतमातुः अस्य महानः सुपुत्रस्य स्मृतीः नत्वा विनम्रां श्रद्धाञ्जलिं समर्पयामः।

अस्मिन् अवसरे उपमुख्यमन्त्री ब्रजेशपाठकः कृषिमन्त्री सूर्यप्रतापशाही जलशक्तिमन्त्री स्वतन्त्रदेवसिंहः मन्त्री कपिलदेवअग्रवालः भारतीयजनतापक्षस्य महानगराध्यक्षः आनन्दद्विवेदी इत्यादयः अन्ये जनाश्च उपस्थिताः आसन्।--------

Hindusthan Samachar / Dheeraj Maithani