गुवाहाटी, 07 जुलाईमासः (हि.स.)।

असमसर्वकारस्य मन्त्री विश्वजीत् दैमारी उक्तवान् यत् राज्ये धर्मान्तरणं विधिना प्रतिबन्धितम् अस्ति तथा च तस्य विरुद्धं कठोरः विधिः पूर्वमेव प्रवर्तते। सः उक्तवान् यत् धर्मान्तरणसम्बद्धा कापि परिवेदना प्राप्यते चेत् आरोपितानां विरुद्धं तत्क्षणमेव वैधानिकी कार्यवाही करिष्यते। मन्त्री दैमारी अद्य असमविधानसभायाः कार्यवाह्यां भागं गृहीत्वा सदनात् बहिः पत्रकारैः सह वार्तालापं कुर्वन् आसीत्।

दैमारी जनान् धर्मान्तरणसम्बद्धेषु प्रकरणेषु सतर्कान् स्थातुं तथा च एतादृशीनां गतिविधीनां विषये प्रशासनाय सूचनां दातुं प्रार्थितवान्। उल्लेखनीयम् अस्ति यत् विधानसभायाः आयव्ययकसत्रस्य प्रथमदिने जनजातीयसंस्कृतेः धार्मिकस्वतन्त्रतायाश्च सम्बद्धस्य एकस्य प्रश्नस्य उत्तरे अपि मन्त्री दैमारी स्थानीयजनानां धार्मिकसामाजिकसुरक्षाविषये उत्तरं दत्तवान् आसीत्।

सः उक्तवान् यत् बोडोजनैः एतत् निश्चितव्यं यत् ते स्वकीयां जनजातीयपरम्पराम् अक्षुण्णां रक्षितुम् इच्छन्ति अथवा ख्रिस्तधर्मावलम्बिनः भूत्वा स्थातुम् इच्छन्ति। मन्त्री एतदपि आरोपितवान् यत् राज्ये धार्मिकाल्पसंख्यकानां कश्चन वर्गः अल्पसंख्यकसमुदायाय उपलब्धानां सर्वासां सुविधानां लाभं प्राप्नोति, तेन सह अवैधरूपेण अनुसूचितजनजातिस्थितिं प्राप्य जनजातीयसमुदायानां कृते आरक्षितानां सुविधानामपि लाभं प्राप्नोति। सः उक्तवान् यत् एतादृशानां प्रकरणानां परीक्षणं कृत्वा आवश्यकी कार्यवाही करणीया।

---------------

Hindusthan Samachar / Dheeraj Maithani