शिमला, 08 जुलाईमासः (हि.स.)।

हिमाचलप्रदेशभाजपाध्यक्षः डा राजीवबिन्दलः लोकनिर्माणमन्त्रिणः विक्रमादित्यसिंहस्य सद्यःकृतकथनानां प्रत्युत्तरं ददन् उक्तवान् यत् भाजपायै अथवा तस्याः नेतृभ्यः कस्मादपि प्रमाणपत्रग्रहणस्य आवश्यकता नास्ति। सः उक्तवान् यत् विगतवर्षेभ्यः ३५ वर्षेभ्यः हिमाचलप्रदेशस्य जनतायाः आशीर्वादेन निरन्तरं जनप्रतिनिधिरूपेण कार्यं कुर्वन् अस्ति तथा च तस्य कृते प्रदेशजनतायाः विश्वासः एव बृहत्तमं प्रमाणपत्रम् अस्ति।

डा बिन्दलः बुधवासरे उक्तवान् यत् सद्यः सम्पन्नेषु पञ्चायतीराज नगरनिकाय नगरनिगमनिर्वाचनेषु जनतया काङ्ग्रेसाय राज्यसर्वकाराय च स्पष्टः सन्देशः प्रदत्तः अस्ति। तस्यानुसारं निर्वाचनपरिणामैः जनैः काङ्ग्रेससर्वकारस्य नीतयः न स्वीकृताः तथा भाजपां प्रति स्वविश्वासः प्रकटितः। सः आरोपितवान् यत् निर्वाचनपराजयानन्तरं काङ्ग्रेसनेतृषु निराशा दृश्यते अत एव ते एतादृशानि कथनानि कुर्वन्ति। सः उक्तवान् यत् एतादृशैः कथनैः प्रदेशस्य वास्तविकविषयेभ्यः जनानां ध्यानं विचालयितुं न शक्यते।

भाजपाप्रदेशाध्यक्षः उक्तवान् यत् काङ्ग्रेससर्वकारस्य चतुर्वर्षीयकार्यकाले प्रदेशः आर्थिकसमाह्वानानां बहूनां समस्यानां च सम्मुखीकरणं कुर्वन् अस्ति। सः आरोपितवान् यत् सर्वाधिकनिराशा बेरोजगारयुवकेषु उत्पन्ना अस्ति। तस्यानुसारं विधानसभानिर्वाचनात् पूर्वं काङ्ग्रेसेन पञ्चलक्षरोजगारप्रदानस्य एकलक्षसर्वकारीयवृत्तीनाम् उपलब्धीकरणस्य च प्रतिज्ञा कृता आसीत् किन्तु एतासां प्रतिज्ञानां पूर्तिदिशि किमपि ठोसरूपं पदं दृश्यमानं नास्ति। सः उक्तवान् यत् प्रदेशस्य युवजनाः अधुना सर्वकारात् एतासां प्रतिज्ञानाम् उत्तरं पृच्छन्ति।

डा बिन्दलः राममन्दिरविषये अपि काङ्ग्रेसं लक्ष्यीकृतवान्। सः उक्तवान् यत् भगवान् श्रीरामस्य जन्मस्थाने मन्दिरनिर्माणार्थं दीर्घकालं संघर्षः अभवत् तथा विधिकप्रक्रियायाः पूर्णतायाः अनन्तरं मन्दिरनिर्माणं सम्भवम् अभवत्। तेन आरोपितं यत् अस्मिन् सम्पूर्णकाले काङ्ग्रेसेन प्रत्यक्षरूपेण परोक्षरूपेण वा मन्दिरनिर्माणस्य समर्थनं न कृतम् अपितु तुष्टीकरणराजनीतये प्राथमिकता प्रदत्ता। सः उक्तवान् यत् अधुना काङ्ग्रेसः राममन्दिरस्य भगवान् श्रीरामस्य च नाम्ना राजनीतिकलाभं प्राप्तुं प्रयतते यत् देशस्य प्रदेशस्य च जनता सम्यक् जानाति।

डा बिन्दलः उक्तवान् यत् काङ्ग्रेससर्वकारेण विपक्षे आरोपकरणस्य स्थाने स्वचतुर्वर्षीयकार्यकालस्य कार्याणां निर्वाचनप्रतिज्ञानां च विषये उत्तरं दातव्यम्।

सः उक्तवान् यत् प्रदेशस्य जनता जीविकायाः विकासस्य आर्थिकस्थितेः सर्वकारीयघोषणानां च विषये उत्तरं वाञ्छति। तस्य कथनम् अस्ति यत् भाजपा अग्रे अपि जनसम्बद्धान् विषयान् उत्थापयिष्यति तथा सर्वकारात् तस्य प्रतिज्ञानां कार्याणां च विषये उत्तरं पृच्छन्ती स्थास्यति।

---------------

Hindusthan Samachar / Dheeraj Maithani