नव दिल्ली, 08 जुलाईमासः (हि.स.)।

हरियाणातः कांग्रेसदलस्य नवनिर्वाचितः राज्यसभासदस्यः कर्मवीरसिंहबौद्धः उक्तवान् यत् तस्य संसदं प्रति गमनं केवलं राजनैतिकोपलब्धिः नास्ति अपितु सामाजिकन्यायस्य संवैधानिकमूल्यानां वञ्चितवर्गाणां स्वरस्य च राष्ट्रियस्तरे सुदृढतया उत्थापनस्य अवसरः अपि अस्ति। सः उक्तवान् यत् आगामि वर्षाकालीनसत्रं तस्य प्रथमं सत्रं भविष्यति। अस्मिन् सः स्वच्छताकर्मचारिणां स्थितिम् अनुसूचितजातिजनजात्योः प्रति अत्याचारान् कृषकाणां विषयान् युवानां रोजगारं शिक्षां संविधानसम्बद्धविषयांश्च प्रमुखतया उत्थापयिष्यति।

कर्मवीरबौद्धः हिन्दुस्थानसमाचाराय प्रदत्ते साक्षात्कारे राज्यसभानिर्वाचनकाले घटितानां घटनानां सामाजिकन्यायस्य राजनीतेः कृषकाणां समस्यानां रोजगारस्य अग्निवीरयोजनायाः संविधानसंशोधनस्य परिसीमनस्य राममन्दिरचढावधनचौर्यस्य नीटपरीक्षाप्रश्नपत्रप्रस्रवणस्य च इत्यादीनां विषयाणां विषये विस्तरेण स्वविचारान् प्रस्तुतवान्।

राज्यसभानिर्वाचने अत्यन्तनिकटस्पर्धायां प्राप्तां विजयम् अधिकृत्य बौद्धः उक्तवान् यत् एषा लोकतन्त्रे संविधाने च विश्वासस्य विजयः अस्ति। निर्वाचनकाले कांग्रेसदलस्य समीपे पर्याप्तमतानि सन्ति चेदपि भयस्य अनिश्चिततायाश्च वातावरणं निर्मितम्। लोकतन्त्रे जनैः निर्वाचितैः विधायकैरपि येन प्रकारेण दबावस्य आशङ्कानां च सामना कर्तव्यः अभवत् तत् चिन्ताजनकम् अस्ति।

बौद्धः उक्तवान् यत् प्रशासनिकानुभवस्य कारणेन तस्य व्यवस्थायाः न्यूनतानां समाह्वानानां च गहनं ज्ञानम् अस्ति। संविधाने विधौ च सामाजिकन्यायाय पर्याप्ताः प्रावधानाः सन्ति किन्तु क्रियान्वयनस्तरे गम्भीराः त्रुटयः सन्ति। दलितानां पिछडवर्गाणाम् आदिवासिनां च कृते निर्मिताः अनेकाः योजनाः धरातले अपेक्षितपरिणामान् दातुं न शक्नुवन्ति।

सः उक्तवान् यत् तस्य प्रथमं ध्यानं स्वच्छताकर्मचारिणां समस्यानां विषये भविष्यति। बाह्यस्रोतव्यवस्थया अस्य वर्गस्य स्थितिः अधिकम् असुरक्षिता कृता अस्ति। एतदतिरिक्तम् अनुसूचितजात्यनुसूचितजनजात्यत्याचारनिवारणाधिनियमस्य प्रभावपूर्णक्रियान्वयनस्य विषयः अपि तस्य प्राथमिकतासु सम्मिलितः भविष्यति। अत्याचारप्रकरणेषु विधयः सन्ति किन्तु पीडितेभ्यः समये न्यायः न प्राप्यते।

संविधानसंशोधनस्य परिसीमनस्य च विषयेषु बौद्धः उक्तवान् यत् कांग्रेसदलं तादृशस्य कस्यापि प्रयासस्य विरोधं करिष्यति यः संविधानस्य मूलभावनां लोकतान्त्रिकसन्तुलनं वा प्रभावितं कुर्यात्। विभिन्नराजनैतिकदलानि विभज्य दबावराजनीतेः माध्यमेन सत्तायाः विस्तारस्य प्रयासः क्रियते। संसदि संविधानस्य लोकतान्त्रिकसंस्थानां च रक्षणाय कांग्रेसदलं पूर्णशक्त्या स्वमतं प्रस्तोष्यति।

बौद्धः उक्तवान् यत् कृषकाणां न्यूनतमसमर्थनमूल्यस्य एमएसपी वर्धमानव्ययस्य आयस्य च सम्बद्धाः प्रश्नाः अद्यापि असमाहिताः सन्ति। कृषकेभ्यः कृतानि अनेकानि आश्वासनानि पूर्णानि न कृतानि। कृषकपरिवारात् आगतः बौद्धः उक्तवान् यत् सः कृषकहितसम्बद्धान् विषयान् निरन्तरं संसदि उत्थापयिष्यति।

------------

Hindusthan Samachar / Dheeraj Maithani