भोपालम्, 08 जुलाईमासः (हि.स.)।

मध्यप्रदेशस्य मुख्यमन्त्री डा मोहनयादवः उक्तवान् यत् प्रधानमन्त्रिणः नरेन्द्रमोदिनः केन्द्रीयगृहमन्त्रिणः अमितशाहस्य च प्रयासैः विगतवर्षत्रिंशतः सरदारसरोवरपरियोजनां विषयी कृत्वा लम्बितस्य जटिलविषयस्य सर्वसम्मत्या समाधानं जातम् अस्ति। मुख्यमन्त्री अस्याः उपलब्धेः कृते प्रधानमन्त्रिणं मोदिनं केन्द्रीयगृहमन्त्रिणम् अमितशाहं केन्द्रीयजलशक्तिमन्त्रिणं सीआरपाटिलं च प्रति आभारं प्रकटितवान्।

मुख्यमन्त्री बुधवासरे मन्त्रिपरिषदः सभायाः पूर्वं सूचनां ददन् उक्तवान् यत् सरदारसरोवरपरियोजनायाः विषयः मध्यप्रदेशस्य गुजरातस्य महाराष्ट्रस्य राजस्थानस्य च मध्ये लम्बितः आसीत्। भारतस्य महान्यायवादिना फरवरी २०२६ मासे अभिमतं प्रदत्तं यत् पुनर्वासस्य व्ययः सहभागिराज्यानां मध्ये विभाजितः भवेत्। अभिमतानुसारं मध्यप्रदेशेन प्रायः सार्धसहस्रकोटिरूप्यकाणां भुगतानं करणीयम् आसीत्। नवदिल्ल्यां सम्पन्नायां सभायां निश्चितं यत् ५० प्रतिशतस्य स्थाने ७५ प्रतिशतं व्ययं गुजरातराज्येन एव वहनीयम् तथा अनेन प्रकारेण मध्यप्रदेशेन अधुना केवलं २१७ कोटिरूप्यकाणां राशिः दातव्या भविष्यति।

मुख्यमन्त्री डा मोहनयादवः उक्तवान् यत् प्रदेशे नवीनाधिनियमानुसारं वक्फमण्डलस्य गठनं कृतम् अस्ति। वक्फमण्डलस्य पुनर्गठनं कुर्वत् मध्यप्रदेशं देशस्य प्रथमं राज्यम् अभवत्। मुख्यमन्त्री उक्तवान् यत् दुर्लभप्राचीनपाण्डुलिपीनां संरक्षणाय सञ्चाल्यमानायां ज्ञानभारतम् योजनायां मध्यप्रदेशः सम्पूर्णे देशे प्रथमस्थानं प्राप्तवान्। अधुना यावत् ३४ दशमलव ४५ लक्षाधिकानां पाण्डुलिपिपृष्ठानां पञ्जीकरणं तथा १२ लक्षाधिकानां सत्यापनं कृतम् अस्ति। टीकमगढतः १० पाददीर्घः जम्बूद्वीपस्य मानचित्रः पन्नातः रसिकप्रिया बुरहानपुरतः २२० वर्षप्राचीनं हस्तलिखितं श्रीमद्भागवतम् तथा दतियातः ऐतिहासिकताम्रपत्रम् इत्यादयः अमूल्याः धरोहराः प्राप्ताः सन्ति।

मुख्यमन्त्री उक्तवान् यत् जलगङ्गासंवर्धनाभियाने मध्यप्रदेशेन नवीनः इतिहासः रचितः अस्ति। प्रदेशे विगतवर्षत्रये १५८१९ कोटिरूप्यकाणां व्ययेन ५२०४०० अधिकानि कार्याणि सम्पन्नानि सन्ति। वर्षे २०२४ १३६७ कोटिरूप्यकाणां व्ययेन ६०४२८ कार्याणि कारितानि। वर्षे २०२५ ४ सहस्रकोटिरूप्यकाणां व्ययेन एकलक्षाधिकानि कार्याणि सम्पन्नानि। वर्षे २०२६ १०४५२ कोटिरूप्यकाणां व्ययेन ३ दशमलव ६० लक्षं कार्याणि प्रदेशे सम्पन्नानि। अस्मिन् वर्षे जलगङ्गासंवर्धनाभियाने प्रथमेषु पञ्चसु जनपदेषु बडवानी खण्डवा नीमच उज्जयिनी खरगोन च आसन्।

प्रदेशेन क्रीडाक्षेत्रे महती सफलता प्राप्ता अस्ति। जापानदेशे आयोजिते अष्टादशवर्षाधः पुरुषमहिलाहाकी एशियाकप २०२६ प्रतियोगितायां प्रदेशस्य क्रीडकैः ६ स्वर्णपदकानि ४ कांस्यपदकानि च प्राप्तानि। भारतीयबालकबालिकाहाकीदलयोः प्रदेशस्य कुलं १० क्रीडकाः सम्मिलिताः आसन्। एते क्रीडकाः भोपाल जबलपुर नर्मदापुरम सिवनी बडवानी जनपदानां सामान्यपरिवारेभ्यः सन्ति। राज्यसर्वकारेण हाकीस्वर्णपदकविजेतृदलस्य क्रीडकेभ्यः प्रतिक्रीडकं ३ लक्षरूप्यकाणि तथा कांस्यपदकविजेतृदलस्य क्रीडकेभ्यः प्रतिक्रीडकं १ लक्षरूप्यकाणि प्रोत्साहनराशिरूपेण प्रदत्तानि।

मुख्यमन्त्री उक्तवान् यत् अधुना मध्यप्रदेशस्य भूमौ रक्षोपकरणानि प्रक्षेपास्त्राणि शस्त्राणि च निर्मास्यन्ते। शिवपुरीजनपदस्य पालीक्षेत्रे १०३ हेक्टेयरभूमौ प्रायः २५०० कोटिरूप्यकाणां अडाणी डिफेन्स एण्ड एयरोस्पेस इकाइयाः शिलान्यासः कृतः अस्ति। अत्र शस्त्रेषु प्रयुज्यमानानां सिङ्गलबेस डबलबेस ट्रिपलबेस प्रणोदकपदार्थानां निर्माणं भविष्यति। चम्बलक्षेत्रस्य १० सहस्राधिकेभ्यः जनेभ्यः रोजगारस्य नवीनाः अवसराः प्राप्स्यन्ते।

अस्मिन्नेव क्रमे मुख्यमन्त्री डा यादवः उक्तवान् यत् भोपालस्य कोलाररोडक्षेत्रे डा श्यामाप्रसादमुखर्जीस्मार्टइण्डस्ट्रियलपार्क सतगढी इत्यस्य गतदिने भूमिपूजनं कृतम्। एतत् पुण्यकार्यं भारतस्य प्रथमस्य उद्योगापूर्तिमन्त्रिणः डा श्यामाप्रसादमुखर्जिनः जयन्त्यां सम्पन्नम्। सतगढीपार्कः १५० कोटिरूप्यकाणां व्ययेन ७० हेक्टेयरक्षेत्रे विकसितः भविष्यति। अनेन १५ सहस्राधिकेभ्यः जनेभ्यः रोजगारः प्राप्स्यति। सतगढ्यां २५ एकडभूमौ १० सहस्रक्षमतायुक्तं सम्मेलनप्रदर्शनीकेन्द्रमपि निर्मास्यते। एषा परियोजना वर्क लिव ग्रो प्रतिरूपे आधारिता अस्ति। अस्याम् वस्त्रनिर्माण क्रीडनक सूचनाप्रौद्योगिकी कृत्रिमबुद्धिमत्ता रसदव्यवस्था इत्यादिभिः सम्बद्धाः उद्योगाः स्थापयिष्यन्ते।

---------------

Hindusthan Samachar / Dheeraj Maithani